ខេត្តកណ្ដាល ៖ ស្ត្រីវ័យក្មេងម្នាក់បានទូរស័ព្ទចូលទៅវិទ្យុក្នុងស្រុកមួយរៀបរាប់ផ្តាំផ្ញើទៅអតីតប្តី ព្រមទាំងលាក្រុមគ្រួសាររបស់នាងជាលើកចុងក្រោយ ហើយថែមទាំងបាននិយាយថា នាងបានលេបថ្នាំជាង៤០គ្រាប់សម្លាប់ខ្លួនទៀតផង ។ បន្ទាប់ពីទទួលបានដំណឹងនោះហើយ បានបង្កឲ្យមានការភ្ញាក់ផ្អើលកាលពីវេលាម៉ោង១០ និង១៥នាទីព្រឹក ថ្ងៃទី២៩ ខែសីហា ឆ្នាំ២០១៦ ហើយកម្លាំងសមត្ថកិច្ចនគរបាលស្រុកអង្គស្នួលបានចេញធ្វើការស្រាវជ្រាវរហូតរកទីតាំងឃើញ និងនាំទៅសង្គ្រោះជីវិតនៅមន្ទីរពេទ្យព្រះកុសុមៈ ។
សមត្ថកិច្ចនគរបាលឲ្យដឹងទៀតថា ស្ត្រីរូបនោះមិនទាន់ត្រូវបានស្គាល់អត្តសញ្ញាណនៅឡើយទេ មានអាយុប្រហែលជាង២០ឆ្នាំ ហើយអ្វីដែលមានការភ្ញាក់ផ្អើលនោះ គឺស្ត្រីរងគ្រោះបានទូរស័ព្ទទៅវិទ្យុក្នុងស្រុកមួយ ដោយបាននិយាយថា នាងបានលេបថ្នាំសម្លាប់ខ្លួនអស់ជាង៤០គ្រាប់រួចទៅហើយ ។ មិនតែប៉ុណ្ណោះ នាងបាននិយាយថា នាង និងស្វាមីបានលែងលះគ្នារយៈពេល៧ឆ្នាំហើយ ប៉ុន្តែអតីតស្វាមីនោះបានតាមរករឿងនាងរហូត មិនបានឲ្យនាងរស់នៅបានសុខទេ ទើបពេលនោះនាងបានផ្ដាំផ្ញើទៅអតីតស្វាមីរបស់នាងឲ្យឈប់តាមចងកម្មចងពារនាងទៀត ហើយនាងក៏លាក្រុមគ្រួសារសាច់ញ្ញាតិរបស់នាងជាលើកចុងក្រោយហើយ ។
ការនិយាយទូរស័ព្ទជាមួយបុគ្គលិកវិទ្យុនោះ គឺមានសម្លេងខ្សោយបន្តិចម្ដងៗ ហើយបន្តិចក្រោយមកទូរស័ព្ទក៏បានដាច់ការទាក់ទង ទើបពេលនោះបុគ្គលិកវិទ្យុខាងលើបានធ្វើការទំនាក់ទំនងទៅកាន់នគរបាលស្រុកអង្គស្នួលឲ្យជួយតាមស្វែងរកទីតាំងកើតហេតុ រហូតដល់ឃើញ គឺនាងស្នាក់នៅក្នុងបន្ទប់លេខ១ ផ្ទះជួល ស្ថិតក្នុងភូមិកៅ ឃុំបែកចាន ស្រុកអង្គស្នួល ហើយនាងបានបិទទ្វារ ខ្ទាស់គន្លឹះពីខាងក្នុងជាប់ បន្ទាប់មកកម្លាំងនគរបាលក៏បានគាស់ទ្វារចូលទៅ រួចបានហៅរថយន្តពេទ្យដឹកនាងចេញទៅកាន់មន្ទីរពេទ្យបង្អែកស្រុកអង្គស្នួល ដើម្បីសង្គ្រោះបន្ទាន់ ប៉ុន្តែពេលទៅដល់ពេទ្យនោះបន្តិច ក៏បានបញ្ជូនបន្តទៅកាន់មន្ទីរពេទ្យព្រះកុសុមៈវិញ ។
នគរបាលបានឲ្យដឹងបន្តទៀតថា កម្លាំងនគរបាលមិនទាន់យកអត្តសញ្ញាណស្ត្រីនោះ និងអតីតប្ដីរបស់នាងបាននៅឡើយទេ គ្រាន់តែដឹងថា នាងជាអ្នកស្រុកស្អាង ខេត្តកណ្ដាល នាងកំពុងត្រូវបានក្រុមគ្រូពេទ្យមន្ទីរពេទ្យព្រះកុសុមៈជួយសង្គ្រោះ ហើយបើតាមគ្រូពេទ្យបានប្រាប់ថា ថ្នាំដែលនាងលេបនោះជាប្រភេទប៉ារ៉ា និងថ្នាំងងុយដេក ប៉ុន្តែនាងលេបអស់មិនដល់៤០គ្រាប់នោះទេ អស់តែប៉ុន្មានគ្រាប់ប៉ុណ្ណោះ ហើយសំខាន់គឺនាងបានរួចផុតពីគ្រោះថ្នាក់ដល់ជីវិតហើយ និងបានចេញទៅផ្ទះវិញក្នុងពេលឆាប់ៗនេះហើយ ៕
ចែករំលែកព័តមាននេះ