រាជធានីភ្នំពេញ ៖ ដីឡូត៍នៅជាប់គ្នាគ្រាន់តែខឹងចតរថយន្តបាំងមាត់ចូលក្នុងក្រុមហ៊ុនបានយកស្នាប់ដៃវាយ បណ្តាលឲ្យរងរបួស ធ្ងន់២នាក់ និងរបួសស្រាលស្ត្រីម្នាក់ បង្កឲ្យមានការភ្ញាក់ផ្អើលដល់ប្រជាពលរដ្ឋចោមរោមមើលទាំងយប់ កាលពីវេលាម៉ោង៨យប់ ថ្ងៃទី២៨ សីហា ស្ថិតនៅចំណុចមុខដីឡូត៍លេខ1565 តាមបណ្ដោយផ្លូវវេងស្រេង ភូមិចោមចៅ សង្កាត់ចោមចៅ ខណ្ឌពោធិ៍សែនជ័យ។
ជនរងគ្រោះជាអ្នកបើករថយន្ត មានឈ្មោះមាស ប្រាក់ ភេទប្រុស អាយុ៣០ឆ្នាំ មុខរបរបើករថយន្តដឹកស៊ីម៉ង់ត៍ របួសធ្ងន់ ទី២-ឈ្មោះមាស ធីតា ភេទស្រី អាយុ៣៦ឆ្នាំ មុខរបរលក់ចាប់ហួយរស់នៅកន្លែងកើតហេតុជាមួយគ្នា ត្រូវជាបងស្រី រងរបួសស្រាល និងទី៣-ឈ្មោះឈឿន រស្មី ភេទប្រុស អាយុ២១ឆ្នាំ មុខរបរព្រូរថយន្ត មានស្រុកកំណើតនៅស្រុកបសេដ្ឋ ខេត្តកំពងស្ពឺរងរបួសធ្ងន់។
តាមប្រភពព័ត៌មានពីជនរងគ្រោះបាននិយាយថា មុនពេលកើតហេតុ ជនរងគ្រោះបានបើករថយន្តរបស់ខ្លួនប្រភេទយីឌុបម៉ាក ហ៊ីយ៉ាន់ដាយពណ៌ក្រហម ចេញពីផ្ទះរបស់ខ្លួនដើម្បីអោយរថយន្តមួយគ្រឿងទៀតចូលអូសរថយន្តមួយគ្រឿងទៀតដែលជាប់ផុងនៅក្នុងដីឡូត៍ ផ្ទះរបស់ខ្លួន ទើបគាត់បើករថយន្តខាងលើទៅចតនៅមុខដីឡូត៍ដែលនៅជាប់នឹងដីឡូត៍ របស់ភាគីបង្កជាក្រុមហ៊ុនចែកចាយវេចខ្ចប់បន្លែ និងសាច់ ។
ខណៈពេលនោះស្រាប់តែមានរថយន្តមួយគ្រឿងដែលជារថយន្តរបស់ក្រុមហ៊ុនដីឡូត៍ខាងលើព្រមទាំងមានម៉ូតូ២គ្រឿង ទៀតផងបានបើកមកដល់ទើសផ្លូវក៏បានចូលទៅស្តីអោយគាត់ថា ម្តេចបានបើករថយន្ត យកទៅចតនៅដីឡូត៍របស់អញធ្វើឲ្យអញចូលអត់កើតអញ្ចឹង ភ្លាមៗនោះជនរងគ្រោះដែល ជាព្រូបាននិយាយ ចាំបន្តិបងចាំខ្ញុំឲ្យតៃកុងរថយន្តបើកចូលក្នុងដីឡូត៍ខ្ញុំវិញ ។
ប្រភពដដែលបានបន្តទៀតថា ខណៈពេលដែលរៀបចំរ៉ឺយ៉ែរថយន្តបើកចេញហើយ ស្រាប់តែភាគីខាងម៉ូតូបានយកស្នាប់ដៃមកវាយទៅលើជនរងគ្រោះដែលជាព្រូ ឃើញដូចនេះ ជនរងគ្រោះជាអ្នកបើករថយន្តបានរត់ទៅជួយត្រូវបក្សពួកជនបង្កវាយរបួសធ្ងន់ទាំង២នាក់ស្របពេលនោះបងស្រីជនរងគ្រោះឃើញជនបង្កវាយប្អូនប្រុសក៏បានរត់ទៅជួយឃាត់ក៏ត្រូវជនដៃដល់វាយបងស្រីថែមទៀតបណ្តាលអោយរបួសស្រាល រីឯជនបង្កបន្ទាប់ពីវាយជនរង គ្រោះឲ្យរងរបួសហើយបាននាំគ្នាបើករថយន្តនិងម៉ូតូចូលក្នុងដីឡូត៍បិទទ្វាររបងជិត ។
ចំពោះករណីខាងលើនេះអ្នកយកព័ត៌មានយើងមិនអាចទាក់ទងសុំការបំភ្លឺពីភាគីខាងបង្កទេ ដោយសារតែរបងដីឡូត៍បានបិទទ្វារជិត ហើយនៅមុខក្រុមហ៊ុនមិនមានស្លាកយីហោនិង លេខទូរស័ព្ទសម្រាប់ទាក់ទងបានទេ។ ក្រោយពេលកើតហេតុជនរងគ្រោះបានទៅដាក់ពាក្យបណ្ដឹងនៅប៉ុស្តិ៍នគរបាលចោមចៅដើម្បីឲ្យសមត្ថកិច្ចជួយដោះស្រាយករណីប្រើអំពើហិង្សាដោយចេតនា ៕
ចែករំលែកព័តមាននេះ