ប៉ូលិសហ្វ៊ីលីពីនរាយការណ៍កាលពីថ្ងៃទី២៨ សីហា ថា ពួកសកម្មប្រយុទ្ធអ៊ិស្លាមនិយមដើរតាមក្រុមរដ្ឋអ៊ិស្លាមបានធ្វើការវាយប្រហារប្រឆាំងពន្ធនាគារមួយនាភាគខាងត្បូងហ្វ៊ីលីពីនដោយរំដោះមនុស្សពួកគេ៨នាក់ និងអ្នកទោស២០នាក់ទៀត ។
ការវាយប្រហារនេះធ្វើឡើងកាលពីថ្ងៃទី២៧ សីហា ប្រឆាំងពន្ធនាគារ MARAWI ដោយពួកយុទ្ធជនក្រុម MAUTE ប្រមាណជា៥០នាក់មានអាវុធគ្រប់គ្រាន់ ។ ក្រុម MAUTE ជាក្រុមមួយក្នុងចំណោមក្រុមអ៊ិស្លាមនិយមជាច្រើននៅកោះមីនដាណាវ ។ មនុស្សរបស់ក្រុមនេះ៨នាក់ ដែលរំដោះបានត្រូវចាប់ខ្លួនកាលពីថ្ងៃទី២២ សីហា ដោយកងយោធានៅចំណុចត្រួតពិនិត្យមួយ ពេលរកឃើញអាវុធ និងគ្រឿងផ្ទុះក្នុងរថយន្តដែលពួកគេជិះ ។ អ្នកទោស២០នាក់ទៀតឆ្លៀតឱកាសនៃការវាយប្រហារនេះរត់ចេញពីគុក ។
ក្រុម MAUTE សង្ស័យជាអ្នកទទួលខុសត្រូវលើការវាយប្រហារបង្ហូរឈាមកាលពីខែកុម្ភៈ លើជំរំយោធាដាច់ស្រយាល BUTIG កោះមីនដាណាវ ។ ពួកអ្នកវាយប្រហារលើកទង់ក្រុមរដ្ឋអ៊ិស្លាមដែរ វាយប្រហារលើបន្ទាយនេះ បណ្តាលឱ្យទាហានស្លាប់៥នាក់ ហើយពួកគេស្លាប់១២នាក់ ៕
ចែករំលែកព័តមាននេះ