រាជធានីភ្នំពេញ ៖ ផ្លូវ ឬច្រកចូលព្រលានយន្តហោះអន្តរជាតិភ្នំពេញថ្មី នឹងបើកឱ្យដំណើរការចាប់ពីថ្ងៃទី៣០ សីហា ២០១៦ នេះទៅ បន្ទាប់ពីស្ថានីយអ្នកដំណើរថ្មី ត្រូវបានសម្ពោធដាក់ឱ្យប្រើប្រាស់កន្លងមក ដែលច្រកចូលចាស់ មានលក្ខណៈតូចចង្អៀតនោះ។
យោងសេចក្តីជូនដំណឹងរបស់ក្រុមហ៊ុនវិនិយោគអាកាសយានដ្ឋានអន្តរជាតិភ្នំពេញបានឱ្យដឹងថា ចាប់ពីថ្ងៃទី៣០ សីហា ២០១៦នេះទៅ ច្រកចូលព្រលានយន្តហោះអន្តរជាតិភ្នំពេញ ត្រូវបិទនិងបើកឱ្យប្រើប្រាស់ច្រកចូលថ្មី ដែលមានចម្ងាយ៣០០ម៉ែត្រ ពីច្រកចូលចាស់ សំដៅទៅរង្វង់មូលចោមចៅ រួចបត់ចូលព្រលានយន្តហោះតែម្តង ។
គួររំលឹកថា ក្នុងពិធីសម្ពោធស្ថានីយអ្នកដំណើរថ្មី នៃអាកាសយានដ្ឋានអន្តរជាតិភ្នំពេញ កាលពីពេលកន្លងមក លោកឧបនាយក រដ្ឋមន្ត្រី បណ្ឌិតសភាចារ្យ សុខ អាន មានប្រសាសន៍ថា ស្ថានីយចេញដំណើរថ្មីនៃអាកាសយានដ្ឋានអន្ដរជាតិភ្នំពេញនេះ នឹងជួយបង្កើនសមត្ថភាពទ្វេដង សម្រាប់ត្រៀមទទួលភ្ញៀវទេសចរ៥លាននាក់ ក្នុង១ឆ្នាំ និងសម្រាប់សមត្ថភាពបម្រើតម្រូវការទេសចរពី៥ទៅ៨ឆ្នាំទៅមុខទៀត ហើយក៏ជាសមិទ្ធផលថ្មីមួយទៀត ក្នុងចំណោមសមិទ្ធផលនានាដែលរាជរដ្ឋាភិបាលសម្រេចបាន ។
លោកបណ្ឌិតសភាចារ្យបានបញ្ជាក់ថា ប្រទេសកម្ពុជាបានក្លាយជាគោលដៅទេសចរណ៍ប្រកបដោយសក្តានុពលខ្ពស់មួយនៅក្នុងតំបន់ ក៏ដូចជានៅលើពិភពលោក ជាពិសេសនៅក្នុងតំបន់អាស៊ានព្រោះថា យើងមានសម្បត្តិបេតិកភណ្ឌវប្បធម៌ ប្រវត្តិសាស្ត្រ និងតំបន់អេកូទេសចរណ៍ធម្មជាតិដ៏សម្បូរបែប នាំឲ្យកម្ពុជាទទួលបានភ្ញៀវទេសចរអន្តជាតិកើនឡើងពីមួយឆ្នាំទៅមួយឆ្នាំ ធ្វើឲ្យវិស័យអាកាសចរណ៍ស៊ីវិលកម្ពុជា ក៏មានការរីកចម្រើនគួរឱ្យកត់សម្គាល់ផងដែរ ៕
ចែករំលែកព័តមាននេះ