ខេត្តមណ្ឌលគិរី ៖ បើតាមអ្នកឆ្លើយឆ្លងព័ត៌មានកោះសន្តិភាពបានឲ្យដឹងថា ឈើប្រណីតគ្រប់ប្រភេទត្រូវបានឈ្មួញដឹកជញ្ជួនទាំងយប់ទាំងថ្ងៃពីស្រុកអូររាំង យកទៅលក់ឲ្យថៅកែយួនតាមបន្ទាត់ព្រំដែនស្រុកកែវសីមា និងស្រុកស្នួលខេត្តក្រចេះ ដោយមិនឃើញមន្ត្រីជំនាញ ឬ សមត្ថកិច្ចពាក់ព័ន្ឋខាងណាបង្ក្រាប ឬទប់ស្កាត់ឡើយ ។
សេចក្តីរាយការណ៍បានឱ្យដឹងថា ចាប់តាំងពីការផ្ទេរការគ្រប់គ្រងព្រៃការពារ ពីមន្ត្រីរដ្ឋបាលព្រៃឈើទៅមន្ត្រីបរិស្ថាន គេសង្គេត ឃើញថា សកម្មភាពដឹកឈើខុសច្បាប់មិនបានថមថយនោះទេ ផ្ទុយទៅវិញក្រុមឈ្មួញរកស៊ីឈើហាក់មានការសប្បាយចិត្តជាខ្លាំង ព្រោះមន្ត្រីបរិស្ថានដែលបានផ្លាស់ប្តូរតួនាទីទៅប្រចាំការជំនួសមេព្រៃ បានត្រឹមសង់កូនតូបតាមបណ្តោយផ្លូវជាតិលេខ៧៦ ជិតអធិការដ្ឋាននគរបាលស្រុកកែវសីមា ចងអង្រឹងដេកចាំរាប់ក្បាលឡានដឹកឈើដកលុយតុងប៉ុណ្ណោះ ។
ប្រភពបានបន្តឲ្យដឹងថា មិនត្រឹមតែរថយន្តនោះទេដែលដឹកឈើខុសច្បាប់ សូម្បីតែម៉ូតូកែច្នៃ ក៏មានសកម្មភាពដឹកជញ្ជូនឈើ ចេញពីព្រៃការពាររាប់រយគ្រឿងក្នុងមួយថ្ងៃៗ។ លើសពីនេះទៀត តំបន់អភិរក្សកែវសីមាក្រោមការគ្រប់គ្រងរបស់លោក រដ្ឋ សុវណ្ណ នាយកដែនជំរកសត្វព្រៃកែវសីមា និងលោក គង់ វីរៈ នាយសង្កាត់រដ្ឋបាលព្រៃឈើអូររាំង ត្រូវបានក្រុមឈ្មួញរកស៊ីឈើអះអាងថា បានបង់លុយប្រចាំខែដល់មន្ត្រីជំនាញទាំងនោះ ។
ប្រភពដដែលបានបន្តថា មិនត្រឹមតែនាយកដែនជំរកនិងនាយជំរកសត្វព្រៃនោះទេដែលពួកគេបានបង់លុយឲ្យ នៅមានមន្ត្រីពាក់ព័ន្ឋជាច្រើនដូចជា មេប៉ុស្តិ៍នគរបាល អធិការស្រុក មេប៉េអឹមស្រុក ចៅហ្វាយស្រុក រួមទាំងមន្ត្រីមួយចំនួនដែលមកពីថ្នាក់ខេត្តនិងថ្នាក់ក្រសួងផងដែរ ។ ឈើប្រណីតដែលក្រុមឈ្មួញដឹកទៅលក់នៅស្រុកយួនមានជាច្រើនប្រភេទដូចជា បេង នាងនួន ធ្នង់ និងប្រភេទឈើសុក្រំ ។
បើតាមប្រជាសហគមន៍ភូមិអណ្តូងក្រឡឹង ឃុំសែនមនោរម្យ ស្រុកអូរាំង បាននិយាយថា សព្វថ្ងៃនេះក្នុងមូលដ្ឋានរបស់ពួកគាត់ ពិបាករកឈើប្រណីតដូចមុនណាស់ ព្រោះតែជំនួញឈើប្រណីតកក្រើកខ្លាំង ធ្វើឲ្យមានសកម្មភាពលួចចូលកាប់ឈើប្រណីតក្នុងព្រៃសហគមន៍រាល់ថ្ងៃ ទើបបានជាឈើទាំងអស់នោះប្រឈមនឹងការផុតពួជ ។
សកម្មជនព្រៃឈើបានស្នើដល់អាជ្ញាធរខេត្តមណ្ឌលគិរី ចាត់វិធានការចំពោះឧក្រិដ្ឋជនដែលបានកាប់បំផ្លាញ ជួញដូរបទល្មើសព្រៃ ឈើយកទៅដាក់ទោសតាមច្បាប់ប្រទេសកម្ពុជា បើពុំនោះសោតគ្រោះមហន្តរាយព្រៃឈើនឹងអាចកើតមានក្នុងពេលឆាប់ៗ ព្រោះតែការបណ្តែតបណ្តោយរបស់មន្ត្រីអាជ្ញាធរ និងមន្ត្រីជំនាញ ៕
ចែករំលែកព័តមាននេះ