រាជធានីភ្នំពេញ ៖ ក្រសួងពាណិជ្ជកម្ម,ក្រសួងកសិកម្ម រុក្ខាប្រមាញ់និងនេសាទ, ក្រសួងឧស្សាហកម្មនិងសិប្បកម្ម និងក្រសួងទេសចរណ៍ បានពិភាក្សារួមគ្នាជាមួយម្ចាស់ឧស្សាហកម្មក្នុងស្រុកដើម្បីធ្វើយ៉ាងណា ឱ្យផលិតផលខ្មែរបានដាក់លក់ និងទទួលបានការគាំទ្រកាន់តែទូលំទូលាយ ដើម្បីកាត់បន្ថយការប្រើប្រាស់ទំនិញនាំចូលពីបរទេស ។
ក្នុងកិច្ចពិគ្រោះយោបល់រវាងអ្នកផ្គត់ផ្គង់ផលិតផលខ្មែរជាមួយអ្នកប្រើប្រាស់ និងអ្នកចែកចាយ កាលពីថ្ងៃទី២៧ សីហា នៅសណ្ឋាគារសូហ្វីតែលភ្នំពេញ ភូគីត្រា កន្លងមក រដ្ឋមន្ត្រីក្រសួងពាណិជ្ជកម្ម បានលើកឡើងថា ការអនុវត្តគោលនយោបាយលើកស្ទួយផលិតផលខ្មែរឱ្យមានលទ្ធភាពអាចប្រកួតប្រជែងជាមួយទំនិញនាំចូលពីបរទេស ចាំបាច់ត្រូវមានការចូលរួមគាំទ្រពីផ្នែកពាក់ព័ន្ធនានា ដូចជា អ្នកទទួលចែកចាយបន្ត ក្រុមហ៊ុនទំនិញនាំចេញ ម្ចាស់ផ្សារទំនើបក្នុងស្រុក ម្ចាស់សណ្ឋាគារ ម្ចាស់បណ្ណាគារ ជាពិសេស ប្រជាពលរដ្ឋខ្មែរដែលជាអ្នកប្រើប្រាស់ផ្ទាល់ ។
ទន្ទឹមជាមួយគ្នានេះ ដើម្បីសម្រេចបាននូវគោលដៅនេះ ផលិតផលខ្មែរទាំងអស់ក៏ត្រូវមានគុណភាព អនាម័យខ្ពស់ និងមានការវេចខ្ចប់ត្រឹមត្រូវតាមស្ដង់ដាបច្ចេកទេសផងដែរ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានថ្លែងថា ៖ « ផលិតផលខ្មែរដែលចរាចរនៅលើទីផ្សារ ត្រូវមានគុណភាព និងសុវត្ថិភាពប្រើប្រាស់ខ្ពស់ ស្របតាមបទដ្ឋានបច្ចេកទេសត្រឹមត្រូវដើម្បីធានាថា ការប្រើប្រាស់ទំនិញទាំងនោះ នឹងមិនមានគ្រោះថ្នាក់ដល់សុខភាព ។ ជាមួយគ្នានេះ ត្រូវមានសោភ័ណភាព និងភាពទាក់ទាញលើការវេចខ្ចប់ ដោយមានស្លាកសញ្ញាពាណិជ្ជនាម និងចុះបញ្ជីត្រឹមត្រូវ ដើម្បីធានាឱ្យមានទំនុកចិត្ត និងការទាក់ទាញពីអ្នកប្រើប្រាស់ ហើយមានតម្លៃសមរម្យអាចប្រកួតប្រជែងជាមួយទំនិញនាំចូលផងដែរ ព្រោះថា ប្រសិនបើទំនិញក្នុងស្រុកមានតម្លៃខ្ពស់ជាងទំនិញនាំចូល អាចនឹងជួបការលំបាកក្នុងការទាក់ទាញការគាំទ្រពីអ្នកប្រើប្រាស់ ។ ទន្ទឹមនឹងនេះ អ្នកផ្គត់ផ្គង់ផលិតផលខ្មែរ ត្រូវសហការយ៉ាងជិតស្និទ្ធជាមួយអ្នកចែកចាយបន្តមានដូចជា ម្ចាស់ផ្សារទំនើប ម្ចាស់សណ្ឋាគារ ម្ចាស់ភោជនីយដ្ឋាន ម្ចាស់បណ្ណាគារ និងអ្នកនាំចេញ ជាពិសេសត្រូវសហការជាមួយក្រសួងពាណិជ្ជកម្ម ដើម្បីចូលរួមពិព័រណ៍តាំងបង្ហាញផលិតផលខ្មែរ និងជំនួបពាណិជ្ជកម្មនានា » ។
លោកស្រី កែវ មុំ តំណាងសហគ្រាសធុនតូចនិងមធ្យម បានឱ្យដឹងថា ប្រសិនបើគ្រប់ស្ថាប័នរួបរួម សហការគ្នាធ្វើការទៅតាមជំនាញរៀងៗខ្លួន ជួយទិញ និងប្រើប្រាស់ផលិតផលខ្មែរ នឹងធ្វើឱ្យចរន្តសាច់ប្រាក់បង្វិល ចែកចាយដល់ប្រជាពលរដ្ឋខ្មែរមានចំណូលកើនឡើង។ លោកស្រីថា ៖ « ក្រោមកិច្ចខិតខំប្រឹងប្រែងជំរុញ និងប្រើប្រាស់ផលិតផលខ្មែរ យើងសង្កេតឃើញថា ផ្សារមួយចំនួនមានការទទួលយកលក់ និងរៀបចំតាំងផលិតផលបានល្អ និងមានកំណើនឡើង ។ ប៉ុន្តែបើទោះបីជាយ៉ាងណា យើងនៅតែបន្តស្នើសុំដល់ថ្នាក់ដឹកនាំក្រសួងពាក់ព័ន្ធ រួមទាំងម្ចាស់សណ្ឋាគារ ភោជនីយដ្ឋាន និងផ្សារនានានៅក្នុងស្រុក ជួយសម្របសម្រួល និងលើកស្ទួយធ្វើយ៉ាងណា ឱ្យឧស្សាហកម្មក្នុងស្រុកផ្សេងទៀតដែលមិនទាន់ដំណើរការល្អនៅលើទីផ្សារ ឱ្យទទួលបានភាពរីកចម្រើនផងដែរ » ។
បើតាមលោករដ្ឋមន្ត្រីក្រសួងពាណិជ្ជកម្មបានបញ្ជាក់ថា ឆ្លងកាត់ការរៀបចំពិព័រណ៍ពាណិជ្ជកម្មផលិតផលខ្មែរនាពេលកន្លងមក សង្កេតឃើញថា ប្រជាពលរដ្ឋទូទៅមានការគាំទ្រផលិតផលខ្មែរយ៉ាងខ្លាំង និងមានអ្នកចូលរួមទស្សនាយ៉ាងច្រើនកុះករ ហើយពួកគាត់ក៏បានទិញផលិតផលខ្មែរយ៉ាងច្រើនសន្ធឹកសន្ធាប់យកទៅប្រើប្រាស់ផងដែរ ៕
ចែករំលែកព័តមាននេះ