រាជធានីភ្នំពេញ ៖ តារាចម្រៀងទិត្យ វិច្ឆិកា នឹងដឹកនាំសិល្បករជាង៣០នាក់ចូលរួមសម្តែងក្នុងព្រឹត្តិការណ៍ប្រគំតន្ត្រីមានឈ្មោះថា «តន្ត្រីសប្បុរសធម៌កម្លាំងទឹកចិត្តសិល្បករខ្មែរជួយខ្មែរ» ដើម្បីស្វែងរកប្រាក់យក
រាជធានីភ្នំពេញ ៖ តារាចម្រៀងទិត្យ វិច្ឆិកា នឹងដឹកនាំសិល្បករជាង៣០នាក់ចូលរួមសម្តែងក្នុងព្រឹត្តិការណ៍ប្រគំតន្ត្រីមានឈ្មោះថា «តន្ត្រីសប្បុរសធម៌កម្លាំងទឹកចិត្តសិល្បករខ្មែរជួយខ្មែរ» ដើម្បីស្វែងរកប្រាក់យកទៅសាងសង់សាលារៀន និងស្ពាននៅតំបន់ដាច់ស្រយាលក្នុងខេត្តកោះកុង ។ ការបញ្ជាក់នេះធ្វើឡើងក្នុងសន្និសីទកាសែតកាលពីរសៀលថ្ងៃទី២៦ ខែសីហា ឆ្នាំ២០១៦ នៅភោជនីយដ្ឋាន Jet’s Star ។
លោកទិត្យ វិច្ឆិកា និយាយថា រូបលោក និងតារាចម្រៀង តារាសម្តែង តារាកំប្លែងខ្មែរមួយចំនួនរៀបចំកម្មវិធីប្រគំតន្ត្រី និងតាំងពិព័រណ៍រយៈពេល៤ថ្ងៃ គឺចាប់ពីថ្ងៃទី៨ ដល់ថ្ងៃទី១១ ខែសីហា ឆ្នាំ២០១៦ នៅបុរីញូថោន(អូដឹម) ក្នុងសង្កាត់ចោមចៅ ខណ្ឌពោធិ៍សែនជ័យ ដើម្បីរៃអង្គាសប្រាក់ប្រាថ្នាបានជាង៣ម៉ឺនដុល្លារយកទៅសង់អគារសិក្សាមួយខ្នង៤បន្ទប់ បន្ទប់ទឹក២ និងស្ពានឆ្លងអូរប្រវែង៣០ម៉ែត្រ ។ សាលាបឋមសិក្សានោះគឺសាលាឧបសម្ព័ន្ធអូរកី នៅភូមិជាំស្លា ឃុំជីផាត ស្រុកថ្មបាំង ខេត្តកោះកុង។ ការផ្តួចផ្តើមគំនិតនេះឡើងដោយសារតែលោកវិច្ឆិកាទៅជួបប្រជាជន និងកុមារាកុមារីដែលមានជីវភាពខ្វះខាត និងត្រូវការអគារសិក្សាមួយខ្នងសម្រាប់តំបន់ដាច់ស្រយាលនោះ ។ ជាងនេះទៅទៀត ប្រជាជនជួបការលំបាកដោយសារតែគ្មានស្ពានឆ្លងកាត់អូរ ។ ប្រភពចំណូល សំខាន់ៗសម្រាប់គម្រោងសង់អគារសិក្សានេះ គឺរំពឹងទៅលើសប្បុរសជនទាំងក្នុង និងក្រៅប្រទេស ពិសេសបណ្តាក្រុមហ៊ុនដែលចូលរួមព្រឹត្តិការណ៍តាំងពិព័រណ៍លក់ផលិតផល ។ ចំពោះអ្នកចូលទស្សនានឹងអនុញ្ញាតដោយសេរី ដោយមានឱកាសបានទិញផលិតផលរបស់ក្រុមហ៊ុន ។
លោកទិត្យ វិច្ឆិកា រំពឹងថា កម្មវិធីនេះនឹងជោគជ័យ ខណៈបណ្តាក្រុមហ៊ុន និងសប្បុរសជនមួយចំនួនគាំទ្រ ។ លោកវិច្ឆិកាមិនមានគម្រោងរៀបចំកម្មវិធីបែបនេះញឹកញាប់ទេ ព្រោះតែលោកមិនចង់ឲ្យមានការលើកឡើងថាធ្វើអាជីវកម្ម។ លោកអាចនឹងរៀបចំមួយឆ្នាំម្តងប៉ុណ្ណោះ ។
លោកម៉ៅ រតនា អគ្គនាយកក្រុមហ៊ុន RGB Media បញ្ជាក់ថា RGB គឺជាក្រុមហ៊ុនផលិតភាពយន្ត បទចម្រៀងនិងរៀបចំកម្មវិធីប្រគំតន្ត្រីជាដើម ។ ថ្មីៗកន្លងមកក្រុមហ៊ុនបានបង្កើតកម្មវិធីសប្បុរសធម៌ជាមួយសមាគមសាសនារបស់ប្រទេសកូរ៉េដើម្បីស្វែងរកប្រាក់ជួយដល់មន្ទីរពេទ្យគន្ធបុប្ផា ។ លោកសម្រេចចិត្ត សហការជាមួយលោកទិត្យ វិច្ឆិកា ព្រោះតែសកម្មភាពជួយសង្គមរបស់លោកកន្លងមកធ្វើឲ្យក្រុមហ៊ុនចាប់អារម្មណ៍ ។ ក្រុមហ៊ុនមានឧបករណ៍គ្រប់គ្រាន់សម្រាប់រៀបចំកម្មវិធីប្រគំតន្ត្រី ។ លោកទិត្យ វិច្ឆិកា បានដឹកនាំសិល្បករស្ម័គ្រចិត្តចូលរួម ដូចនេះមិនមានអ្វីដែលត្រូវចំណាយច្រើនទេ ។
លោកម៉ៅ រតនា រំពឹងថា កម្មវិធីនេះនឹងទទួលបានការគាំទ្រច្រើនពីទស្សនិកជន ហើយពេលនេះក្រុមហ៊ុនលោកទទួលបានការគាំទ្រពីបណ្តាក្រុមហ៊ុនមួយចំនួន ។
កម្មវិធីប្រគំតន្ត្រីនោះធ្វើឡើងក្រោមការគាំទ្រពីក្រសួងព័ត៌មាន និងក្រសួងវប្បធម៌ និងវិចិត្រសិល្បៈ និងសហការរៀបចំដោយក្រុមហ៊ុន RGB Media ។ សិល្បករដែលនឹងចូលរួម ក្នុងកម្មវិធីប្រគំតន្ត្រីនោះ មានដូចជាកញ្ញាមាស សុខសោភា, លោកខាត់ ជេម, លោកនេនទុំ, លោកអីុណូ, កញ្ញាហង្ស សុជាតា, លោកហេង ពិទូ, កញ្ញាយូរី, កញ្ញាអ៊ុន អាលីហ្សា, លោកនៅ ស៊ីនឿន និងក្រុមតារាកំប្លែងទូរទស្សន៍CTN ជាដើម៕
ចែករំលែកព័តមាននេះ