ការហាត់ប្រាណទៀងទាត់អាចជួយឱ្យមនុស្សវ័យចំណាស់ឃ្លាតឆ្ងាយពីជំងឺភ្លេចភ្លាំង។ ការសិក្សាទៅលើមនុស្សប្រុស-ស្រីវ័យពី៦០ឆ្នាំដល់៨០ឆ្នាំពីសំណាក់អ្នកវិទ្យាសាស្ត្រសហរដ្ឋអាមេរិកបានរកឃើញថា
ការហាត់ប្រាណទៀងទាត់អាចជួយឱ្យមនុស្សវ័យចំណាស់ឃ្លាតឆ្ងាយពីជំងឺភ្លេចភ្លាំង។ ការសិក្សាទៅលើមនុស្សប្រុស-ស្រីវ័យពី៦០ឆ្នាំដល់៨០ឆ្នាំពីសំណាក់អ្នកវិទ្យាសាស្ត្រសហរដ្ឋអាមេរិកបានរកឃើញថា អ្នកដែលធ្វើសកម្មភាពរាងកាយយ៉ាងហោចណាស់៣ដងក្នុងមួយសប្តាហ៍គឺអាចបញ្ឈប់ខួរក្បាលពីការធ្លាក់ចុះ ។ មិនត្រឹមតែប៉ុណ្ណោះ បុគ្គលដែលមានហ្សែន APOE-e4 ក៏ត្រូវបានការពារដោយការហាត់ប្រាណមានដូចជា ដើរញាប់ រត់យឺតៗ ហែលទឹកនិងជិះកង់ផងដែរ ។ APOE-e4ត្រូវគេរកឃើញមាននៅលើមនុស្សប្រហែលជា៣០ភាគរយ ។ ហ្សែននេះគឺជាភ្នាក់ងារដែលបង្កើនហានិភ័យកើតជំងឺភ្លេចភ្លាំងទៅលើមនុស្សវ័យចំណាស់ ប៉ុន្តែមិនមែនគ្រប់ៗគ្នាដែលផ្ទុកហ្សែននេះសុទ្ធតែជាមុខសញ្ញាកើតជំងឺខាងដើមនោះឡើយ ។
ជាធម្មតា ខួរក្បាលមនុស្សចាប់ផ្តើមធ្លាក់ចុះនៅពេលមានវ័យកាន់តែចាស់ទៅ ហើយ Hippocampus ដែលជាបន្ទប់កត់ត្រាគ្រប់រឿងរ៉ាវរបស់ខួរក្បាលគឺជាផ្នែកដែលងាយរងគ្រោះជាងគេ ។
សមាជិកក្រុមស្រាវជ្រាវ វេជ្ជបណ្ឌិត J.Carson Smith មកពីសាកលវិទ្យាល័យ University Of Maryland ថ្លែងថា៖ «យើងបានរកឃើញថា សកម្មភាពរាងកាយមានកម្លាំងអភិរក្សរក្សានូវកម្រិត hippocampus របស់បុគ្គលដែលប្រឈមខ្លាំងនឹងជំងឺភ្លេចភ្លាំងឱ្យធំដដែល ។ នេះ មានន័យថា យើងអាចពន្យារការចុះអន់ថយមុខងារយល់ដឹងរបស់មនុស្សទាំងនេះបាន ។ ដូច្នេះ សម្រាប់បុគ្គលដែលប្រឈមខ្លាំងនឹងជំងឺភ្លេចភ្លាំង ការហាត់ប្រាណគឺពិតជាអន្តរាគមន៍ពិសេសនិងមានសក្តានុពល» ។
ចំណែកលោក Kirk Erickson អ្នកជំនាញសុខភាពខួរក្បាលមនុស្សចាស់បានថ្លែងថា នេះគឺជាការសិក្សាលើកដំបូងពិនិត្យមើលលើប្រសិទ្ធភាពសកម្មភាពរាងកាយទៅលើការបាត់បង់នៃទំហំ hippocampus បុគ្គលកំពុងប្រឈមនឹងជំងឺភ្លេចភ្លាំង ៕
ចែករំលែកព័តមាននេះ