ខេត្តប៉ៃលិន ៖ គេសង្កេតឃើញកសិករមួយគ្រួសារ បានដាំដំណាំស្វាយចន្ទីចំនួន៥ហិកតា នៅលើដីចម្ការមួយកន្លែង ស្ថិតនៅចំណុចអូរតាលី ក្នុងភូមិស្រង់មានជ័យ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ហើយកំពុងជួលកម្មករឱ្យចូលទៅប្រមូលផលជាបណ្តើរៗ។ តែគាត់ត្អូញត្អែរពីតម្លៃទីផ្សារមានការធ្លាក់ចុះ ខណៈតម្លៃប្រេងសាំងឡើងថ្លៃខ្ពស់ត្រដែត ហើយក៏លំបាករកកម្មករឱ្យចូលទៅរើសគ្រាប់ស្វាយចន្ទីដែរ។ ទោះបីជាយ៉ាងណា បន្ទាប់ពីប្រមូលផលចាប់ពីពេលព្រឹក រហូតដល់ពេលល្ងាច គាត់ថ្លឹងលក់ឱ្យឈ្មួញ ដើម្បីយកថវិកាដោះស្រាយ និងផ្គត់ផ្គង់ជីវភាពប្រចាំថ្ងៃ។
បើតាមការរៀបរាប់ពីកសិករម្នាក់មានឈ្មោះ ហេង ម៉ៅ អាយុ៦០ឆ្នាំ រស់នៅក្នុងក្រុងប៉ៃលិន បានឱ្យដឹងថា ៖ គាត់បានដាំដំណាំស្វាយចន្ទីជាង១០០០ដើម នៅលើដីចម្ការ៥ហិកតា ដោយយកពូជប្រភេទ (M23) មកពីខេត្តកំពង់ចាម។ គាត់បន្តថា ពេលកំពុងដាំដុះ គឺគាត់ប្រើបច្ចេកទេសខ្លួនឯង ចន្លោះពី១ដើមទៅ១ដើមប្រវែង៧ម៉ែត្រ រួមផ្សំជាមួយនឹងការសួរនាំពីកសិករដូចគ្នានៅក្នុងខេត្តកំពង់ចាមផងដែរ។
កសិករខាងលើបន្តថា គាត់ក៏មិនធ្លាប់ឃើញមានខាងមន្ទីរកសិកម្មខេត្ត ចុះទៅអប់រំ ឬបង្រៀនពីរបៀបនៃការថែទាំដំណាំអ្វីនោះឡើយ។ ចំណែកបញ្ហាប្រឈមខ្លាំង គឺសត្វដង្កូវ សត្វល្អិត តែងតែស៊ីផ្កា និងត្រួយចន្ទី ដែលកំពុងលូតលាស់ ទើបគាត់ក៏ស្វះស្វែងរកថ្នាំពុលនៅទីផ្សារយកទៅបាញ់សម្លា.ប់ ដើម្បីឱ្យដំណាំរបស់ខ្លួនមានការលូតលាស់ល្អ បើមិនដូច្នេះទេ គឺមិនអាចទទួលបានទិន្នផល លក់ដូរបានឡើយ។
កសិកររូបនេះបន្តទៀតថា ក្នុងការប្រមូលផលវិញ គាត់បានជួលកម្មករក្នុង១ថ្ងៃចំនួន៤ទៅ៥នាក់ ដើម្បីឱ្យដើររើសគ្រាប់ស្វាយចន្ទីនៅក្នុងចម្ការរបស់ខ្លួន។ តែលំបាករកកម្មករ ខណៈអ្នកចូលទៅរើសគ្រាប់ចន្ទី គាត់ឱ្យថ្លៃឈ្នួល១គីឡូក្រាម ៨០០រៀល។ ហើយក្នុង១ថ្ងៃៗ អ្នកខ្លះអាចប្រមូលផលបានចាប់ពី៤០ទៅ៥០គីឡូក្រាមដែរ គឺទទួលបានប្រាក់កម្រៃចាប់ពី៣០០០០ទៅ៤០០០០រៀល ហើយការងារនេះមិនលំបាកនោះទេ។ គាត់ក៏សំណូមពរឱ្យប្រជាពលរដ្ឋ ដែលខ្វះការងារធ្វើ សូមនាំគ្នាចូលទៅរើសគ្រាប់ស្វាយចន្ទីរនៅក្នុងចម្ការរបស់ខ្លួន ទោះបីជា១ថ្ងៃ មានកម្មករលើសពី១០នាក់ ក៏គាត់ទទួលយកដែរ ព្រោះបច្ចុប្បន្នការប្រមូផលចន្ទីរ បានតិច ខណៈមិនសូវមានកម្មករ ពោលគឺអាចទទួលបានផលត្រឹមតែជាង១០០ទៅ២០០គីឡូក្រាមតែប៉ុ ណ្ណោះក្នុង១ថ្ងៃ។
គាត់បញ្ជាក់ថា កាលពីមុន តម្លៃទីផ្សារគ្រាប់ស្វាយចន្ទី ឈ្មួញទិញ១គីឡូក្រាម ចាប់ពី៥០០០រៀលទៅ៦០០០រៀល តែរហូតមកដល់ពេលនេះ តម្លៃទីផ្សារមានការធ្លាក់ចុះ ដោយ១គីឡូក្រាម ឈ្មួញទិញត្រឹមតែ៤៧០០រៀល ទៅ៤៨០០រៀលតែប៉ុណ្ណោះ ដោយឈ្មួញចូលទៅទិញដល់ចម្ការ ។ លុះគាត់សួរនាំ គេប្រាប់ថា ការទិញកសិផលក្នុងតម្លៃទាប ព្រោះតែប្រេងសាំងឡើងថ្លៃ មិនអាចឱ្យតម្លៃខ្ពស់បានឡើយ ព្រោះគេបើកបររថយន្តចូលទៅដឹកដល់ចម្ការ ត្រូវចំណាយអស់ច្រើន បើទិញក្នុងតម្លៃខ្ពស់ គេមិនចំណេញនោះឡើយ៕
ចែករំលែកព័តមាននេះ