ខេត្តបន្ទាយមានជ័យ ៖ នៅវេលាម៉ោង៨ និង៤៥នាទីព្រឹកថ្ងៃទី៨ មីនា មានគ្រោះថ្នាក់ចរាចរណ៍មួយបានកើតឡើង គឺរថយន្តតូយ៉ូតាបុករថយន្តនីស្សាន់ពីក្រោយបណ្តាលឱ្យមនុស្សប្រុសស្រី៦នាក់រងរបួសធ្ងន់ និងស្រាល ហើយត្រូវបានរថយន្តសង្គ្រោះរបស់ស្នងការដ្ឋាននគរបាលខេត្ត ដឹកយកទៅមន្ទីរពេទ្យភ្លាមៗផងដែរ ។ ហេតុការណ៍នេះបានកើតឡើងត្រង់ចំណុចស្ពានទី២ លើផ្លូវជាតិលេខ៦ ស្ថិតក្នុងភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។ មន្ត្រីប៉ូលិសចរាចរខេត្តបានឱ្យដឹងថា អ្នកបើកបររថយន្តនីស្សាន់ឈ្មោះហ៊ី ហ៊ាន ភេទប្រុស អាយុ៣០ឆ្នាំ ជាអ្នករត់តាក់ស៊ីនៅភូមិថ្មី ឃុំណាំតៅ ស្រុកភ្នំស្រុក ខេត្តបន្ទាយមានជ័យ ។ ឯអ្នកបើកបររថយន្តតូយ៉ូតាឈ្មោះឡុង គុណ លាង ភេទប្រុស នៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប ។
មន្ត្រីនគរបាលចរាចរបានឱ្យដឹងយោងតាមសាក្សីដែលឃើញហេតុការណ៍នេះថា មុនពេលកើតហេតុរថយន្តទាំង២គ្រឿងបើកស្របទិសគ្នាពីកើតទៅលិចក្នុងល្បឿនលឿន លុះមកដល់ចំណុចខាងលើ រថយន្តតូយ៉ូតាបានបុកគូទរថយន្តនីស្សាន់ពីក្រោយពេញមួយទំហឹង បណ្តាលឱ្យខូចខាតទាំងស្រុងផ្នែកខាងមុខ ឯអ្នកជិះនៅលើរថយន្តនីស្សាន់រងរបួស៦នាក់ក្នុងនោះមានស្ត្រី២នាក់របួសធ្ងន់ ។ ចំពោះរថយន្តនីស្សាន់ខូចខាតផ្នែកខាងក្រោយបន្តិចបន្តួចប៉ុណ្ណោះ ។ មន្ត្រីនគរបាលចរាចរបានបញ្ជាក់ទៀតថា វត្ថុតាងបង្កគ្រោះថ្នាក់ទាំង២គ្រឿង សមត្ថកិច្ចជំនាញបានយកមករក្សាទុកនៅស្នងការដ្ឋាននគរបាលខេត្ត ដើម្បីរង់ចាំធ្វើការដោះស្រាយតាមច្បាប់ ៕
ចែករំលែកព័តមាននេះ