ខេត្តបន្ទាយមានជ័យ ៖ បនល្បែងភ្នាល់ តាមអនឡាញ នៅអាណាចក្រទឹកដីក្រុងប៉ោយប៉ែត កើតមានយ៉ាងគគ្រឹកគគ្រេង សង្ស័យសមត្ថកិច្ចទទួលលាភសក្ការៈយកទៅធ្វើមាន ធ្វើបានផ្ទាល់ខ្លួន ព្រោះពលរដ្ឋមិនឃើញបង្ក្រាប ឬទប់ស្កាត់ ផ្ទុយពីគោលនយោបាយភូមិ-ឃុំមានសុវត្ថិភាព ពិសេសប្រសាសន៍របស់សម្តេចប្រមុខរាជរដ្ឋាភិបាល ដែលខិតខំយកចិត្តទុកដាក់ពីសុវត្ថិភាពរបស់ពលរដ្ឋជាចំបង ។
តាមប្រភពពីតំបន់ប៉ោយប៉ែតបានឲ្យដឹងថា បនល្បែងស៊ីសងខុសច្បាប់គេសង្កេតឃើញកើតមានយ៉ាងច្រើនរបៀបអនាធិតេយ្យបំផុត ភាគច្រើនគឺសមត្ថកិច្ចមួយចំនួនជាអ្នកបើកសម្រាប់ប្រមូលកើបយកផលប្រយោជន៍តែម្តង ។ ប្រជាពលរដ្ឋដែលញៀននិងល្បែងទាំងនោះបានបង្ហើបឲ្យដឹងថា មានទីតាំងបនល្បែងភ្នាល់មួយចំនួនរបស់សមត្ថកិច្ច PM នៅប៉ោយប៉ែត ជាអ្នកបើកតែពួកគេ(PM) មិនបានទៅអង្គុយជាប្រចាំនៅក្នុងបរិវេណនោះទេ គឺគេឲ្យសាច់ញាតិរបស់គេ ជាអ្នកមើលការខុសត្រូវនៅកន្លែងនោះ ដោយសមត្ថកិច្ច PM ដែលមានអំណាចជាអ្នកកាងនៅពីក្រោយខ្នង សម្រាប់ដោះស្រាយជាមួយនឹងស្ថាប័នជំនាញពាក់ពន្ឋ័មួយចំនួនទៀត ។
ជាក់ស្តែងទីតាំងបនល្បែងភ្នាល់បាល់តាមអនឡាញ មានយីហោ«EN JOY ៧៨៩ net»ជាប់ហាងនំបុ័ង ផ្លូវដើមពុទ្រា និងនៅជាប់ស្តង់ត្រី ប្លុកផ្ទះសំណាក់ផ្កាយ៣ក្រុងប៉ោយប៉ែត ទាំង២កន្លែងនេះ ត្រូវបានគេដឹងថា ជារបស់លោក PM ម្នាក់ដែលមានតួនាទីនិងបុណ្យស័ក្កិនៅក្រុងប៉ោយប៉ែត បានបើកលេងដុះស្លែមកហើយ តែគ្មានសមត្ថកិច្ចណាមួយហ៊ានចុះទៅបង្ក្រាបឡើយ ។ដោយឡែកមានទីតាំងបនល្បែងភ្នាល់បាល់តាមឡាញមួយកន្លែងទៀត បើកនៅបន្ទប់ជួលក្នុងក្លឹបកំសាន្តហែលទឹកហ្គូតវើល របស់លោកឆាយ នៅម្តុំផ្សារដើមពុទ្រាក្រុងប៉ោយប៉ែត ដែលស្គាល់ថា ជាកម្មសិទ្ឋិរបស់កូនមេ PMម្នាក់ ជាអ្នកបើកលេង ដោយឲ្យឈ្មោះ ប៉េង ផល្លែន ជាមន្ត្រីPM មើលការខុសត្រូវនៅចំណុចនោះប៉ុណ្ណោះ។
ជុំវិញការចោទប្រកាន់ខាងលើនេះ មិនអាចសុំការបំភ្លឺពីសមត្ថកិច្ចPM ក្រុងប៉ោយប៉ែតបាននៅឡើយទេនៅរសៀលថ្ងៃទី២៨ កញ្ញានេះ ។
ប្រជាពលរដ្ឋបានលើកឡើងទៀតថា ដោយសារតែនៅក្នុងតំបន់នេះសម្បូរទៅដោយបទល្មើសខុសច្បាប់ រួមទាំងល្បែងស៊ីសងខុសច្បាប់កើតមានច្រើនគ្មានអ្នកបង្ក្រាបបែបនេះ ទើបធ្វើឲ្យកើតមានអំពើចោរកម្ម លួច ឆក់ ប្លន់ កាប់ សម្លាប់ យកទ្រព្យសម្បត្តិពលរដ្ឋស្លូតត្រង់ជារឿយៗ នាពេលកន្លងមក ធ្វើឲ្យពួកគាត់រស់នៅទាំងការភ័យខ្លាច។
លោកធិន ស៊ិនដេត អធិការក្រុងប៉ោយប៉ែត ធ្លាប់បានប្រាប់តាមទូរសព្ទ័ឲ្យដឹងថា បញ្ហាទាំងអស់នេះ លោកមិនទាន់បានដឹងសពគ្រប់ទីកន្លែងនៅឡើយទេ ដោយសារតែលោកទើបតែនឹងឡើងមកកាន់តំណែងជាអធិការក្រុងប៉ោយប៉ែត ។ទោះជាបែបណាក្តីលោកធិន ស៊ិនដេត អធិការក្រុងប៉ោយប៉ែតរូបនេះ ត្រូវបានមតិមហាជនរិះគន់ចំៗថា ប្រសិនលោក ធិន ស៊ិនដេត ជាអធិការមានចេតនាបង្ក្រាបទីតាំងបនល្បែងទាំងអស់នេះពិតមែននោះ វាមិនពិបាកនោះទេ ព្រោះទីតាំងបនល្បែងទាំងអស់នេះ បានបើកចំហ ២៤ម៉ោងលើ២៤ម៉ោងឲ្យភ្ញៀវចូលម៉ាសេរីតែម្តង ។ ប្រភពបានបន្តថា លោកអធិការប៉ូលិសជំនាន់ណាក៏ដូចតែគ្នាដែរ បើពួកគេចង់បង្ក្រាបបទល្មើសនេះពិតមែនវាគ្មាអ្វីគួរឲ្យពិបាកទេ ខ្លាចតែអស់លោកមិនចង់បង្ក្រាប ទុកដើម្បីប្រមូលយកផលប្រយោជន៍ យកទៅធ្វើមានធ្វើបានប៉ុណ្ណោះ បានចេះតែឆ្លើយដោះសារជាមួយអ្នកសារព័ត៌មានឲ្យតែរួចពីមាត់បែបនេះ៕
ចែករំលែកព័តមាននេះ