ខេត្តសៀមរាប ៖ កម្លាំងការិយាល័យនគរបាលប្រឆាំងគ្រឿងញៀ.នខេត្ត បានសហការជាមួយកម្លាំងចម្រុះឱ្យស្នងការខេត្ត ចុះប្រតិបត្តិការបង្ក្រាបករណីរក្សាទុកដឹកជញ្ជូន និងជួញដូរដោយខុសច្បាប់
ខេត្តសៀមរាប ៖ កម្លាំងការិយាល័យនគរបាលប្រឆាំងគ្រឿងញៀនខេត្ត បានសហការជាមួយកម្លាំងចម្រុះឱ្យស្នងការខេត្ត ចុះប្រតិបត្តិការបង្ក្រាបករណីរក្សាទុកដឹកជញ្ជូន និងជួញដូរដោយខុសច្បាប់នូវសារធាតុញៀនដឹកនាំដោយលោកវរសេនីយ៍ទោ អ៊ុំ សាអាត នាយការិយាល័យនគរបាលប្រឆាំងគ្រឿងញៀនខេត្ត និងដឹកនាំសម្របសម្រួលដោយតំណាងអយ្យការអមសាលាដំបូងខេត្តសៀមរាប បានឱ្យកម្លាំងការិយាល័យប្រឆាំងគ្រឿងញៀនខេត្ត ចុះបង្ក្រាបរហូតឈានដល់ធ្វើការឃាត់ខ្លួនបានក្រុមជនសង្ស័យចំនួន១៦នាក់ រួចបញ្ជូនមកកាន់ការិយាល័យជំនាញ ដើម្បីធ្វើការសួរនាំ។
ហេតុការណ៍ចុះបង្ក្រាបករណីគ្រឿងញៀនខាងលើបានធ្វើឡើងរយៈពេល៣ថ្ងៃ គឺថ្ងៃទី២៥, ២៦ និង២៧ ខែសីហា ឆ្នាំ២០១៦ ស្ថិតនៅក្នុងក្រុងសៀមរាប ខណៈពួកគេកំពុងចែកចាយតាមបន្ទប់ជួល និងនៅតាមដងផ្លូវសាធារណៈ។
លោកវរសេនីយ៍ទោ អ៊ុំ សាអាត នាយការិយាល័យនគរបាលប្រឆាំងគ្រឿងញៀនខេត្តបានប្រាប់ឱ្យដឹងថា បន្ទាប់ពីមានសេចក្តីរាយការណ៍ច្បាស់រួចមក កម្លាំងការិយាល័យជំនាញបានចុះបង្ក្រាបករណីរក្សាទុកដឹកជញ្ជូន និងជួញដូរដោយខុសច្បាប់នូវសារធាតុញៀន រហូតឈានដល់ធ្វើការឃាត់ខ្លួនបានក្រុមជនសង្ស័យបន្តបន្ទាប់ចំនួន១៦នាក់ រួចបញ្ជូនមកកាន់ការិយាល័យជំនាញ ដើម្បីធ្វើការសួរនាំ។ លោកបានបន្តទៀតថា ក្រោយពីធ្វើការឃាត់ខ្លួនបានជនសង្ស័យចំនួន១៦នាក់ ព្រមទាំងដកហូតបានវត្ថុតាងរួមមាន ម្សៅគ្រើម (ម៉ាទឹកកក) ចំនួន១៦កញ្ចប់ ស្មើទម្ងន់៣,៧ក្រាម, ទូរស័ព្ទ៧គ្រឿង និងសម្ភារវេចខ្ចប់គ្រឿងញៀនមួយចំនួន។
បច្ចុប្បន្ន ជនសង្ស័យចំនួន១៦នាក់ (ក្នុងនោះ៧នាក់បញ្ជូនទៅមណ្ឌលកែប្រៃ) ចំណែកជនសង្ស័យចំនួន៩នាក់ និងវត្ថុតាង ត្រូវបានកម្លាំងជំនាញរៀបចំសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់៕
ចែករំលែកព័តមាននេះ