រាជធានីភ្នំពេញ ៖ រថយន្តកាមរីបាឡែនពណ៌សមួយគ្រឿងបានរេចង្កូតម្តងទៅស្តាំម្តងទៅឆ្វេង ចុងក្រោយក៏រេចង្កូតទៅបុកក្បាលនាគពុះចែកទ្រូងផ្លូវបង្កឲ្យមានការភ្ញាក់ផ្អើល…
រាជធានីភ្នំពេញ ៖ រថយន្តកាមរីបាឡែនពណ៌សមួយគ្រឿងបានរេចង្កូតម្តងទៅស្តាំម្តងទៅឆ្វេង ចុងក្រោយក៏រេចង្កូតទៅបុកក្បាលនាគពុះចែកទ្រូងផ្លូវបង្កឲ្យមានការភ្ញាក់ផ្អើលកាលពីវេលាម៉ោង១ និង៣០នាទីរំលងអាធ្រាត្រឈានចូលថ្ងៃទី២៧ ខែសីហា ឆ្នាំ២០១៦ នៅចំណុចក្បែរសួនច្បារក្តាន់២ តាមបណ្តោយផ្លូវសហព័ន្ធរុស្សី ស្ថិតក្នុងសង្កាត់ស្រះចក ខណ្ឌដូនពេញ ។
តាមសំដីសាក្សីអង្គុយលេងនៅសួនច្បារក្តាន់ពីរដែលបានឃើញហេតុការណ៍នេះបានឲ្យដឹងថា មុនពេលកើតហេតុគេឃើញរថយន្តបង្កម៉ាក កាមរីបាឡែន ពណ៌ស គ្មានស្លាកលេខ បើកដោយយុវជនម្នាក់ ព្រមទាំងមានដឹកនារីវ័យក្មេង២នាក់ទៀត ធ្វើដំណើរតាមបណ្តោយផ្លូវសហព័ន្ធរុស្សី ក្នុងទិសដៅពីកើតទៅលិច ក្នុងល្បឿនល្មមមិនសូវជាលឿនណាស់ណាទេ ។ ពេលបើកមកដល់ចំណុចកើតហេតុរថយន្តស្រាប់តែរេចង្កូតទៅឆ្វេងទៅស្តាំ ហើយក៏ជ្រុលទៅបុកក្បាលនាគពុះចែកទ្រូងផ្លូវ បណ្តាលឲ្យរថយន្តខូចខាតផ្នែកខាងមុខទាំងស្រុង មិនអាចធ្វើដំណើរតទៅទៀតបាន ចំណែកក្បាលនាគគ្រាន់តែវៀចបន្តិចបន្តួចប៉ុណ្ណោះ ។
ប្រភពដដែលបានបន្តទៀតថា បន្ទាប់ពីបុកភ្លាមនោះគេឃើញនារីវ័យក្មេងទាំង២នាក់ចុះពីលើរថយន្តទាំងអាការៈភ័យស្លន់ស្លោ រួចរត់ចេញឆ្ងាយពីកន្លែងកើតហេតុទៅឈរចាំយុវជនអ្នកបើករថយន្ត មួយសន្ទុះក្រោយមកក៏មានរថយន្តមួយគ្រឿងទៀតមកដឹកអ្នកទាំង៣គេចខ្លួនបាត់ស្រមោល ។
ចំណែកសាក្សីម្នាក់ទៀតអះអាងថា មូលហេតុដែលនាំឲ្យបុកក្បាលនាគនេះ គឺដោយសារតែពួកក្មេងៗទាំងនោះរវល់តែប្រលែងគ្នាពេលកំពុងបើកបរ ។
ក្រោយពេលកើតហេតុ សមត្ថកិច្ចមូលដ្ឋានបានចុះដល់កន្លែងកើតហេតុ និងបានទាក់ទងទៅកម្លាំងជំនាញ រួច ស្ទួចយករថយន្តបង្កទៅរក្សារទុកនៅការិយាល័យចរាចរជើងគោករាជធានីដើម្បី រង់ចាំម្ចាស់ចូលខ្លួនមកដោះស្រាយ ៕
ចែករំលែកព័តមាននេះ