បើបងមិនបានអូន អូនក៏មិនអាចបានទៅអ្នកផ្សេងដែរ
ខេត្តកំពង់ស្ពឺ ៖ សេចក្តីរាយការណ៍បឋមបានឲ្យដឹងថា បុរសម្នាក់ព្រោះតែតាមស្រលាញ់នារីម្នាក់ជាច្រើនខែមិនបាន ក៏ចូលមកចាប់ក្រៀកនាងជាប់ចាក់ប្រហារជាច្រើនកាំបិត …
ខេត្តកំពង់ស្ពឺ ៖ សេចក្តីរាយការណ៍បឋមបានឲ្យដឹងថា បុរសម្នាក់ព្រោះតែតាមស្រលាញ់នារីម្នាក់ជាច្រើនខែមិនបាន ក៏ចូលមកចាប់ក្រៀកនាងជាប់ចាក់ប្រហារជាច្រើនកាំបិត រួចចាក់ខ្លួនឯងធ្លាយពោះវៀនចេញមកក្រៅគួរអោយញញើត ។ ករណីឃាតកម្មនេះកើតឡើងកាលពីវេលាម៉ោង៧ និង៤៥នាទីព្រឹក ថ្ងៃទី២៨ ខែសីហា ឆ្នាំ២០១៦ នៅចំណុចផ្សារឧដុង្គ ស្រុកឧដុង្គខេត្តកំពង់ស្ពឺ ។
សមត្ថកិច្ចស្រុកឧដុង្គបានឲ្យដឹងថា នារីរងគ្រោះឈ្មោះ ណែម ចន្ឋូ អាយុ២៤ឆ្នាំ មុខរបរជាងកាត់ដេរ មានទីលំនៅភូមិឃ្លាំងប្រាំ ឃុំវាំងចាស់ ស្រុកឧដុង្គ ចំណែកបុរសដៃដល់ឈ្មោះស៊ឹម ម៉ូត អាយុ៣២ឆ្នាំ មុខរបរជាងតោន និងបាញ់ថ្នាំឡាន មានទីលំនៅភូមតាជាល ឃុំព្រះស្រែ ស្រុកឧដុង្គ ។
ប្រភពពីសមត្ថកិច្ចស្រង់សំដីសាក្សីនៅជិតកន្លែងកើតហេតុបានឲ្យដឹងថា មុនពេលកើតហេតុនារីរងគ្រោះកំពុងតែអង្គុយដេរខោអាវនៅកន្លែងកាត់ដេររបស់ខ្លួន ស្រាប់តែបុរសខកស្នេហ៍បានមកចាប់ក្រៀកនាង ហើយចាក់ប្រហារជាច្រើនកាំបិត បណ្តាលឲ្យត្រដរខ្យល់យ៉ាងអាណោចអធ័មបំផុត ភ្លាមៗនោះជនដៃដល់ក៏ចាក់ខ្លួនឯងធ្លាយពោះវៀនចេញមកក្រៅគួរឲ្យញញើត ។
ក្រោយពេលកើតហេតុ នារីរងគ្រោះត្រូវបានសាច់ញាតិ និងអ្នកជិតខាងបញ្ជូនទៅសង្គ្រោះជីវិត តែអកុសលបានស្លាប់បាត់បង់ជីវិតនៅពាក់កណ្តាលផ្លូវ ។
ប្រភពក្រៅផ្លូវការនៅកន្លែងកើតហេតុបានបង្ហើបឲ្យដឹងថា ជនដៃដល់បានតាមសុំស្នេហ៍នារីរងគ្រោះច្រើនខែមកហើយ តែនារីរងគ្រោះមិនព្រម គាប់ជួនបងរបស់នារីរងគ្រោះមានបំណងយកប្អូនស្រីទៅរស់នៅបរទេសដោយមានបំណងមិនចង់ឲ្យជនដៃដល់ចេះតែមកបង្កើតទំនាក់ទំនងជាមួយប្អូនស្រីផង មិនយូរប៉ុន្មានដំណឹងនេះក៏ដឹងដល់ជនដៃដល់ ធ្វើឲ្យជនដៃដល់មានការខឹងសម្បារជាខ្លាំង ហើយបានបោះពាក្យថា «បើបងមិនបានអូន អូនក៏មិនអាចបានទៅអ្នកផ្សេងដែរ ហើយបើបងរបស់នាងនៅតែមានះបំបែកនាងចេញពីខ្លួនទៀត ជម្រើសចុងក្រោយ គេនឹងសម្លាប់នាងមិនឲ្យមានជីវិតឡើយ ហើយក៏សម្លាប់ខ្លួនឯងឲ្យស្លាប់ជាមួយគ្នាដែរ» ។ ប៉ុន្តែសំណាងល្អជនដៃដល់គ្រាន់តែធ្លាយពោះវៀន ពេលសមត្ថកិច្ចមកដល់ក៏បានបញ្ជូនតាមរថយន្តសង្គោះ ដើម្បីបញ្ជូនបន្តនៅមន្ទីរពេទ្យក្រុងភ្នំពេញ ។
ទាក់ទងនឹងករណីនេះដែរ បើទោះជាមានការលើកឡើងបែបនេះក្តី ក៏មិនទាន់អាចសន្និដ្ឋានថា ជារឿងពិតឡើយព្រោះពុំមានក្រុមគ្រួសារនារីរងគ្រោះណាម្នាក់ចេញមុខមកអះអាងឡើយ នេះគ្រាន់តែជាការលើកឡើងរបស់អ្នករកស៊ីក្បែរកន្លែងនារីរងគ្រោះនិយាយតគ្នាតែប៉ុណ្ណោះ ។ មូលហេតុ និងរឿងរ៉ាងពិតយ៉ាងណានោះ ទាល់តែក្រុមគ្រួសារនាររីរងគ្រោះណាម្នាក់ចេញមុខមកអះអាង ទើបដឹងការពិតថា រឿងរ៉ាវយ៉ាងណា ៕
ចែករំលែកព័តមាននេះ