រាជធានីភ្នំពេញ ៖ នៅពេលបច្ចុប្បន្ននេះ ក្រុមហ៊ុនផ្គត់ផ្គង់លំនៅឋានដែលសំដៅដល់ខុនដូ និងបុរីនានានៅក្នុងប្រទេសកម្ពុជា ហាក់ដូចជាសម្រួលដល់ប្រជាពលរដ្ឋខ្លាំង រហូតដល់មានការងឿងឆ្ងល់
រាជធានីភ្នំពេញ ៖ នៅពេលបច្ចុប្បន្ននេះ ក្រុមហ៊ុនផ្គត់ផ្គង់លំនៅឋានដែលសំដៅដល់ខុនដូ និងបុរីនានានៅក្នុងប្រទេសកម្ពុជា ហាក់ដូចជាសម្រួលដល់ប្រជាពលរដ្ឋខ្លាំង រហូតដល់មានការងឿងឆ្ងល់ ដោយសារតែក្រុមហ៊ុនទាំងនោះប្រកាសលក់គម្រោងខុនដូ និងផ្ទះល្វែងក្នុងបុរីដោយមិនទាមទារលក្ខខណ្ឌ ហើយក្រុមហ៊ុនខ្លះទៀតមិនតម្រូវឱ្យអតិថិជនបង់ប្រាក់កក់ទុកមុនឡើយ ។ វាខុសប្លែកពីរយៈពេលកន្លងមក ដោយក្រុមហ៊ុនបុរីតម្រូវឱ្យអតិថិជនដែលទិញផ្ទះល្វែងឬវីឡា ត្រូវបង់ប្រាក់មុនយ៉ាងហោច១០%នៃតម្លៃផ្ទះសរុប និងមានលក្ខខណ្ឌមួយចំនួនទៀត ។
លើសពីនេះ ក្រុមហ៊ុនខ្លះតម្រូវឱ្យអតិថិជនទៅទទួលយកកម្ចីពីធនាគារ ឬមីក្រូហិរញ្ញវត្ថុមកបង់ផ្ដាច់ជាមួយក្រុមហ៊ុនតែម្ដង និងតម្រូវឱ្យអតិថិជនបង់ជាប្រចាំខែទៅខាងធនាគារ ឬមីក្រូហិរញ្ញវត្ថុវិញ ។ ដូចនេះ តើការទិញផ្ទះ និងទិញដីដោយបង់រំលស់ជាប្រចាំខែ ឬប្រើឥណទានរបស់ធនាគារ និងមីក្រូហិរញ្ញវត្ថុ អាចនឹងមានហានិភ័យអ្វីខ្លះដល់អតិថិជននៅពេលអនាគតខាងមុខ ?
តាមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក គីម ហ៊ាង ថា វាជារឿងធម្មតាទេ នៅពេលដែលមានអ្នកផ្គត់ផ្គង់ច្រើន ត្រូវការប្រកួតប្រជែងតម្លៃ និងបង្កលក្ខណៈងាយស្រួលដល់អ្នកទិញបែបនេះហើយ។ លោកលើកឡើងថា ៖ « ជាឧទាហរណ៍ស្រាប់ កាលពី២០ឆ្នាំមុន អ្នកនាំទូរស័ព្ទចូលមានតែមួយ ហើយប្រព័ន្ធទូរស័ព្ទក៏មានតែមួយប្រព័ន្ធ តម្លៃហៅចេញខ្ពស់រហូតដល់លើសពី១ដុល្លារក្នុង១នាទី និងត្រូវគិតចំពោះអ្នកហៅចូលផងដែរ ។ តែក្រោយមកទៀត នៅពេលមានក្រុមហ៊ុនបើករកស៊ីក្នុងវិស័យហ្នឹងច្រើន ធ្វើឱ្យតម្លៃនៃការហៅចេញកាន់តែទាប មិនគិតលុយចំពោះអ្នកហៅចូល ដែលបង្កលក្ខណៈងាយស្រួលដល់អ្នកប្រើប្រាស់ ។ ចំពោះវិស័យអចលនទ្រព្យក៏ដូចគ្នា នៅពេលដែលមានការប្រកួតប្រជែងកាន់តែច្រើន ធ្វើឱ្យការចំណេញរបស់អ្នកអភិវឌ្ឍន៍កាន់តែតិច និងធ្វើឱ្យអ្នកទិញកាន់តែងាយស្រួល» ។
ទាក់ទងនឹងការប្រើប្រាស់កម្ចីពីធនាគារសម្រាប់ទិញអចលនទ្រព្យ ដែលរួមមានការទិញផ្ទះ និងការទិញខុនដូជាដើម លោក គីម ហ៊ាង បញ្ជាក់ថា មិនមានបញ្ហាអ្វីនោះទេ បើក្នុងករណីអ្នកប្រើកម្ចីនោះត្រឹមត្រូវ ឬសមស្របទៅនឹងចំណូលរបស់ខ្លួន ។ លោកនិយាយថា ៖ « វាគ្មានបញ្ហាអ្វីទេ តែយ៉ាងណា កុំខ្ចីច្រើនពេក ឧទាហរណ៍ថា តម្លៃផ្ទះ៥ម៉ឺនដុល្លារ បើយើងខ្ចីត្រឹម១ម៉ឺន៥ពាន់ ឬ២ម៉ឺនដុល្លារវាគ្មានបញ្ហាទេ កុំឱ្យតែផ្ទះ៥ម៉ឺនដុល្លារ តែយើងខ្ចីរហូតដល់៤ម៉ឺនដុល្លារ អាហ្នឹងគឺជារឿងប្រឈមហើយ » ។
លោកបញ្ជាក់ថា ការខ្ចីលុយសម្រាប់ទិញផ្ទះ មិនមែនកើតមានតែប្រទេសកម្ពុជានោះទេ ប្រទេសណាក៏មានដែរ តែសំខាន់កុំឱ្យតែប្រើកម្ចីនោះច្រើនហួសហេតុពីសមត្ថភាព ។ សម្រាប់យុទ្ធសាស្ត្ររបស់អ្នកអភិវឌ្ឍន៍លំនៅឋានមួយចំនួនដែលកំពុងធ្វើពេលបច្ចុប្បន្ន ដូចជាការទិញផ្ទះបង់រំលស់ផ្ទាល់ និងការទំនាក់ទំនងជាមួយធនាគារសម្រាប់យកឥណទានមកបង់ផ្ដាច់ជាមួយក្រុមហ៊ុនផ្គត់ផ្គង់ផ្ទះ ។ លោកបញ្ជាក់ថា ៖ « វាដល់ពេលដែលក្រុមហ៊ុនអភិវឌ្ឍន៍លំនៅឋានត្រូវយកលុយនោះជះមកវិញហើយ ។ ជាក់ស្ដែង ពេលនេះក្រុមហ៊ុនអភិវឌ្ឍន៍លំនៅឋានភាគច្រើនមានលក្ខខណ្ឌងាយៗដើម្បីផ្ដល់ឱ្យអតិថិជនរបស់ខ្លួន » ។
លោក ច័ន្ទ សុផល អ្នកវិភាគសេដ្ឋកិច្ចកម្ពុជា បានឱ្យដឹងថា បញ្ហានេះ ចំពោះអ្នកសង់លំនៅឋានលក់ នៅពេលដែលមានការប្រកួតប្រជែងកាន់តែតឹងតែង ពួកគេត្រូវដណ្ដើមភ្ញៀវ និងត្រូវការប្រថុយប្រថានច្រើន ដូចនេះ ហានិភ័យក៏ខ្ពស់ដែរ ។ លោកនិយាយថា ៖ « ការប្រកួតប្រជែងតឹងតែងបានជំរុញឱ្យក្រុមហ៊ុនមួយចំនួនហ៊ានចាប់យកហានិភ័យខ្ពស់ ។ កន្លងមកការបង់ថ្លៃមុន១០០% វាគ្មានហានិភ័យនោះទេ តែបើបង់ថ្លៃពាក់កណ្ដាល ហានិភ័យមានតិចតួច តែបើអត់បង់សោះ ហានិភ័យគឺខ្ពស់តែម្ដង » ។
លោកបន្តថា ចំពោះអ្នកទិញវិញ នៅពេលដែលក្រុមហ៊ុនតម្រូវឱ្យមានការបង់កាន់តែតិច អ្នកទិញកាន់តែច្រើនមានលទ្ធភាពទិញផ្ទះដោយបង់រំលស់ ហើយនៅពេលដំណាក់កាលណាមួយពលរដ្ឋគ្មានលទ្ធភាពបង់ ពេលនោះហានិភ័យនៃវិបត្តិនឹងកើនឡើងខ្ពស់ មានន័យថា នៅពេលនោះទីផ្សារអចលនទ្រព្យកាន់តែកៀកចូលទៅរកហានិភ័យកាន់តែច្រើន ។ លោកលើកឡើងថា ៖ « ដូចនៅអាមេរិក កាលពីឆ្នាំ២០០៨ មានការលក់ផ្ទះឱ្យអ្នកដែលមិនសូវមានលុយ លក់ឱ្យអ្នកខ្វះលទ្ធភាព ហើយនៅពេលដែលអ្នកទិញអត់លទ្ធភាពបង់បន្ត វាបានធ្វើឱ្យមានវិបត្តិកើតឡើង » ។
លោកបញ្ជាក់ថា តាមការវិភាគមួយចំនួន គឺទីផ្សារអចលនទ្រព្យកំពុងតែមានហានិភ័យហើយ ដោយសារតែការផ្គត់ផ្គង់មានច្រើនលើសពីលទ្ធភាពរបស់អ្នកទិញ ហើយអ្នកវិនិយោគដែលទិញផ្ទះហើយសម្រាប់លក់បន្តទៀត គួរតែប្រុងប្រយ័ត្នជាងមុន ខ្លាចដល់ពេលដែលទិញហើយ តែលក់មិនដាច់វិញ តែបើអ្នកទិញសម្រាប់ស្នាក់នៅ វាមិនមានជាបញ្ហាធំដុំនោះទេ ៕
ចែករំលែកព័តមាននេះ