ថង់ទឹកប្រមាត់មានទំហំតូចដូចផ្លែប៊័រដែលស្ថិតនៅខាងស្តាំនៃរង្វង់ពោះពីក្រោមថ្លើម ថង់ទឹកប្រមាត់មានតួនាទីរក្សាទុកទឹកប្រមាត់សម្រាប់រំលាយអាហារ ដើម្បីបញ្ចេញទៅក្នុងពោះវៀនតូច ចិញ្ចឹមរាងកាយឱ្យមានចលនាប្រព្រឹត្តទៅជាធម្មតា ។
ជុំវិញបញ្ហានេះ លោកវេជ្ជបណ្ឌិត Jade Suphapol ជំនាញផ្នែកថ្លើម លំពែង ថង់ទឹកប្រមាត់នៃមន្ទីរពេទ្យវេជ្ជថានីប្រចាំប្រទេសថៃ បានប្រាប់កោះសន្តិភាពឲ្យដឹងថា ជាទូទៅជំងឺក្រួសក្នុងទឹកប្រមាត់ មិនមានសញ្ញាអ្វីនោះទេ តែបើសិនជាដុំក្រួសនេះធ្លាក់ចូលទៅក្នុងបំពង់របស់វា នោះអាចនឹងធ្វើឲ្យមានការស្ទះមិនអាចបញ្ចេញទឹកប្រមាត់បាន និងបានស្តែងឲ្យដឹងតាមសញ្ញាមួយចំនួនដូចជា៖
-មានការឈឺចាប់ខ្លាំងនៅខាងលើពោះ នៅនឹងខាងស្តាំនៃពោះ
-អាចមានការឈឺចាប់នៅខាងក្រោយខ្នងត្រង់ស្លាបប្រចៀវ
-អាចឈឺនៅស្មាខាងស្តាំ
-ស្បែកឡើងពណ៌លឿង ភ្នែកលឿង
-ក្តៅខ្លួនខ្លាំងជាដើម ។
លោកវេជ្ជបណ្ឌិតបានបន្តទៀតថា ចំពោះមូលហេតុដែលបណ្តាលឲ្យកើតមានជំងឺក្រួសក្នុងថង់ប្រមាត់នេះមានដូចជា៖
-ការកើនឡើងនូវជាតិខ្លាញ់ក្នុងខ្លួន
-ទឹកប្រមាត់ធ្វើការខុសប្រក្រតី
-ឈាមសស៊ីឈាមក្រហម
-ថង់ទឹកប្រមាត់មិនបានបញ្ចេញទឹកប្រមាត់អស់ជាដើម ។
ការព្យាបាលជំងឺក្រួសក្នុងថង់ទឹកប្រមាត់នេះ មានពីរជម្រើស៖
១-ការប្រើប្រាស់ថ្នាំដើម្បីរំលាយក្រួសៈ ការព្យាបាលប្រភេទនេះគឺត្រូវប្រើពេលវេលាយូរនៅក្នុងការរំលាយក្រួសទាំងនោះ ការប្រើប្រាស់ថ្នាំសម្រាប់ព្យាបាលកម្រនឹងប្រើណាស់ ហើយអាចប្រើសម្រាប់អ្នកដែលមិនអាចធ្វើការវះកាត់តែប៉ុណ្ណោះ ។
២-ការវះកាត់ថង់ទឹកប្រមាត់ចោលៈ អ្នកជំងឺមួយចំនួនមិនចង់ធ្វើការវះកាត់ថង់ប្រមាត់ចោលនោះទេ ព្រោះពួកគាត់យល់ថាបើកាត់ថង់ប្រមាត់ចោលនោះនឹងមិនមានទឹកប្រមាត់សម្រាប់រំលាយអាហារទេ ។ ទាំងនេះគឺជាការយល់ខុស ព្រោះថ្លើមជាអ្នកផលិតទឹកប្រមាត់ ចំណែកថង់ប្រមាត់មានតួនាទីរក្សាទឹកប្រមាត់ ដូច្នេះបើសិនជាកើតមានជំងឺនេះហើយធ្វើការវះកាត់ចោលនោះមិនមានផលរំខាន់នៅក្នុងការរំលាយអាហារឡើយ។ ផ្ទុយទៅវិញ នៅពេលដែលកាត់ថង់ប្រមាត់ចោលហើយ ទឹកប្រមាត់នឹងហូរចេញពីថ្លើមចូលទៅពោះវៀនតូចដោយផ្ទាល់មិនលំបាករំលាយអាហារនោះទេ ។
គ្មានវិធីអ្វីអាចការពារមិនឲ្យកើតមានជំងឺក្រួសក្នុងថង់ទឹកប្រមាត់បាន១០០ភាគរយទេ តែអាចបង្ការបានដោយគ្រាន់តែលោកអ្នកកាត់បន្ថយនូវការទទួលទានអាហារដែលសម្បូរទៅដោយសារជាតិខ្លាញ់ច្រើន និងត្រូវធ្វើការតាមដានសុខភាពឲ្យបានញឹកញាប់ជាមួយគ្រូពេទ្យជំនាញ ជាពិសេសត្រូវធ្វើលំហាត់ប្រាណឲ្យបានទៀងទាត់ទើបជាការប្រសើរ ៕
ចែករំលែកព័តមាននេះ