ធ្វើយ៉ាងម៉េចដើម្បីកុំឱ្យកើតមានជំងឺពុកឆ្អឹង?
ឆ្អឹងដើរតួយ៉ាងសំខាន់នៅក្នុងរាងកាយមនុស្ស ក្នុងនោះមានដូចជា ធ្វើឱ្យមានលំនឹងដល់តួខ្លួនទាំងមូល ការពារបណ្តាសរីរាង្គ សាច់ដុំ ហើយជាកន្លែងស្តុកទុកសារធាតុកាល់ស្យូមផងដែរ។
ឆ្អឹងដើរតួយ៉ាងសំខាន់នៅក្នុងរាងកាយមនុស្ស ក្នុងនោះមានដូចជា ធ្វើឱ្យមានលំនឹងដល់តួខ្លួនទាំងមូល ការពារបណ្តាសរីរាង្គ សាច់ដុំ ហើយជាកន្លែងស្តុកទុកសារធាតុកាល់ស្យូមផងដែរ។ ការប្រើប្រាស់កាល់ស្យូមបានគ្រប់គ្រាន់និងធ្វើសកម្មភាពរាងកាយដោយការលេងកីឡាផ្សេងៗនឹងជួយធ្វើឱ្យឆ្អឹងរឹតតែរឹងមាំ ព្រមទាំងមានទម្ងន់ធ្ងន់ ហើយពិសេសជាងនេះគឺអាចកាត់បន្ថយឱកាសកើតជំងឺពុកឆ្អឹងពេលមានវ័យចាស់។
តើគេគួរប្រើប្រាស់កាល់ស្យូមនិងហាត់ប្រាណបែបណាខ្លះដើម្បីជួយជំរុញដល់សុខភាពឆ្អឹង?
១-កាល់ស្យូម ៖ វាជារ៉ែមួយប្រភេទដែលរាងកាយត្រូវការជាចាំបាច់ដើម្បីជំរុញដល់សុខភាពឆ្អឹង សុខភាពធ្មេញ និងព្រមទាំងជំរុញការបំពេញមុខងារដ៏ត្រឹមត្រូវរបស់បេះដូង សាច់ដុំនិងសរសៃប្រសាទ ។ រាងកាយមនុស្សមិនអាចផលិតសារធាតុកាល់ស្យូមបានដោយខ្លួនឯងទេ ។ ដូច្នេះ វាត្រូវស្រូបយកពីអាហារដែលទទួលទាន។ កាល់ស្យូមមាននៅក្នុងអាហារដូចជា បន្លែស្លឹកពណ៌បៃតងចាស់ (ស្ពៃតឿ និងខាត់ណាខៀវជាដើម) ផលិតផលអាហារធ្វើពីទឹកដោះគោ ទឹកក្រូចពោធិ៍សាត់ នំប៉័ង គ្រាប់ធញ្ញជាតិ ទឹកសណ្តែក និងផ្លែអាល់ម៉ុនជាដើម ។
+តើបរិមាណកាល់ស្យូមប៉ុន្មានដែលរាងកាយត្រូវការក្នុងមួយថ្ងៃ ?
-អាយុ៦ខែចុះ ត្រូវការ២១០មីល្លីក្រាមក្នុងមួយថ្ងៃ
-អាយុ៦ខែ-១ឆ្នាំត្រូវការ២៧០មិល្លីក្រាមក្នុងមួយថ្ងៃ
-អាយុ១ឆ្នាំ-៣ឆ្នាំ ត្រូវការ៥០០មីល្លីក្រាមក្នុងមួយថ្ងៃ
-អាយុ៤ឆ្នាំ-៨ឆ្នាំ ត្រូវការ៨០០មីល្លីក្រាមក្នុងមួយថ្ងៃ
-អាយុ៩-១៣ឆ្នាំនិង១៤-១៨ឆ្នាំ ត្រូវការ ១៣០០មីល្លីក្រាមក្នុងមួយថ្ងៃ
-អាយុ១៩-៣០ឆ្នាំនិងពី៣១ឆ្នាំ-៥០ឆ្នាំ ត្រូវការ១០០០មីល្លីក្រាមក្នុងមួយថ្ងៃខណៈអាយុ៥១ឆ្នាំ-៧០ឆ្នាំឡើងទៅត្រូវការ១២០០មីល្លីក្រាមក្នុងថ្ងៃ ។
២-ការហាត់ប្រាណ ៖ ហាត់ប្រាណទៀងទាត់ផ្តល់អត្ថប្រយោជន៍យ៉ាងច្រើនដល់សុខភាពក្នុងនោះរួមទាំងជួយឱ្យឆ្អឹងរឹងមាំផងដែរ ។ ដូចជាការប្រើប្រាស់កាល់ស្យូមបានត្រឹមត្រូវដែរ ហាត់ប្រាណតាំងពីក្មេងនឹងជួយឱ្យឆ្អឹងឆាប់លូតលាស់ពេញលក្ខណៈ ។ ប្រភេទលំហាត់ប្រាណដែលជួយឱ្យឆ្អឹងរឹងមាំមានដូចជា ដើរ រត់យឺត ឬលឿន លើកទម្ងន់ លេងបាល់ទាត់ វាយកូនបាល់ បាល់បោះ កីឡាហុកគីលើវាលស្មៅ រាំ ឡើងជណ្តើរ លោតអន្ទាក់ និងដើរឡើងភ្នំជាដើម សុទ្ធតែជាលំហាត់ប្រាណមានសារសំខាន់ ៕
ចែករំលែកព័តមាននេះ