គ្រឿងញៀ.ន9ខែ លទ្ធផលនៃការបង្ក្រាបមានវិសាលភាពធំធេងណាស់ សឹងតែគ្មានគុកដាក់
រាជធានីភ្នំពេញ ៖ តាមរបាយការណ៍បានបង្ហាញថា ការបង្ក្រាបបទល្មើសគ្រឿងញៀ.នសរុបរយៈពេល៩ខែ ឆ្នាំ២០១៦ មានចំនួន២.២៦៥ករណី ឃាត់ខ្លួន៥.០៥៧នាក់(ស្រី៤៧៦នាក់)
រាជធានីភ្នំពេញ ៖ តាមរបាយការណ៍បានបង្ហាញថា ការបង្ក្រាបបទល្មើសគ្រឿងញៀនសរុបរយៈពេល៩ខែ ឆ្នាំ២០១៦ មានចំនួន២.២៦៥ករណី ឃាត់ខ្លួន៥.០៥៧នាក់(ស្រី៤៧៦នាក់) ជនជាតិខ្មែរ៤.៩៥៨នាក់(ស្រី៤៥៧នាក់) និងជនបរទេស១១សញ្ជាតិមានចំនួន៩៩នាក់ (ស្រី១៩នាក់)រួមមាន ជនជាតិវៀតណាម៦០នាក់(ស្រី១៧នាក់), នីហ្សេរីយ៉ា១១នាក់, ស៊ុយអែត១នាក់, អាមេរិក២នាក់, កូរ៉េម្នាក់, ចិន១០នាក់(ស្រីម្នាក់), ថៃ៣នាក់(ស្រីម្នាក់), ឡាវ៨នាក់,ហ្វាំងឡង់ម្នាក់, អូស្ត្រាលីម្នាក់ និងរ៉ូម៉ានីម្នាក់ ។
នេះបើយោងតាមរបាយការណ៍របស់មន្ទីរប្រឆាំងគ្រឿងញៀនក្រសួងមហាផ្ទៃដែលអានដោយលោកឧត្តមសេនីយ៍ឯក ខៀវ សាម៉ន នាយកមន្ទីរប្រឆាំងគ្រឿងញៀនក្នុងកិច្ចប្រជុំបូកសរុបការងារប្រយុទ្ធប្រឆាំងបទល្មើសគ្រឿងញៀនរយៈពេល៩ខែ ឆ្នាំ២០១៦ របស់ផែនការប្រឆាំងបទល្មើសគ្រឿងញៀនរៀបចំនៅសាលប្រជុំអគ្គស្នងការដ្ឋាននគរបាលជាតិក្រោមអធិបតីភាពនាយឧត្តមសេនីយ៍ នេត សាវឿន អគ្គស្នងការនគរបាលជាតិកាលពីព្រឹកថ្ងៃទី២៦ខែសីហា ឆ្នាំ២០១៦ ។
របាយការណ៍ដដែលបានឲ្យដឹងទៀតថា លទ្ធផលការងារប្រយុទ្ធប្រឆាំងបទល្មើសគ្រឿងញៀនរយៈពេល៩ខែ ឆ្នាំ២០១៦ កម្ពុជានៅតែទទួលរងគ្រោះថ្នាក់លើការដឹកជញ្ជូនការជួញដូរគ្រឿងញៀនជ្រៀតចូលឆ្លងកាត់តាមផ្លូវគោក ផ្លូវទឹក និងច្រកអាកាសដោយសារឥទ្ធិពល និងទំហំបទល្មើសកើតឡើងច្រើនតាមតំបន់ ។ ជាក់ស្តែងក្នុងរយៈពេល៩ខែ ឆ្នាំ២០១៦នេះ សកម្មភាពមួយចំនួនដែលបង្ក្រាបបានតាមច្រកព្រលានយន្តហោះ៣ករណីឃាត់ខ្លួន៥នាក់(ថៃម្នាក់ស្រី) នីហ្សេរីយ៉ា៣នាក់ និងរ៉ូម៉ានីម្នាក់ក្នុងនោះ រឹបអូសកូកាអ៊ីនជាង៨គីឡូក្រាម គឺប្រភពចេញមកពីប្រទេសអារ៉ាប់រួមនិងនីហ្សេរីយ៉ា ។
នៅច្រកព្រំដែនគោកកម្ពុជា-ឡាវ (ខេត្តស្ទឹងត្រែង និងខេត្តព្រះវិហារ) កើតមាន៥ករណីឃាត់ខ្លួន៦នាក់(ខ្មែរ២នាក់ ឡាវ៤នាក់) ត្រូវមន្ទីរប្រឆាំងគ្រឿងញៀនរឹបអូសមេតំហ្វេតាមីន(ICE)បាន២គីឡូក្រាម ៧១៨ក្រាម។ លោកឧត្តមសេនីយ៍ឯក ខៀវ សាម៉ន បានបញ្ជាក់បន្ថែមថា គ្រឿងញៀនដែលរឹបអូសបានមានសារធាតុញៀនគ្រប់ប្រភេទទម្ងន់សរុប៦៥គីឡូក្រាម ៥០០ក្រាមក្នុងនោះ មានមេតំហ្វេតាមីនម្សៅក្រាម ICE ជាង៤៤គីឡូក្រាម, មេតំហ្វេតាមីនគ្រាប់(WY) ជាង៨គីឡូក្រាម, ហេរ៉ូអ៊ីនជាង៣គីឡូក្រាម, កូកាអ៊ីនជាង៨គីឡូក្រាម, កេតាមីនជាង៦៩ក្រាម, អ៊ិចស្តាស៊ីជាង៩០០ក្រាម។ ដោយឡែកកញ្ឆាក្រៀមជាង៤គីឡូក្រាម ដើមកញ្ឆា៦២.០២៣ដើម និងប្រេងម្រះព្រៅភ្នំ៩៥គីឡូក្រាម ។
នៅក្នុងកិច្ចប្រជុំនោះដែរលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិបានមានមតិថា ការ ប្រយុទ្ធប្រឆាំងគ្រឿង
ញៀន មិនមែនចប់កណ្តាលទីនោះទេ សមត្ថកិច្ចត្រូវបន្តស្រាវជ្រាវដល់ឫសគល់មេខ្លោងចែកចាយគ្រឿងញៀនខុសច្បាប់ ទោះបីតុលាការបើកសវនាការចប់ជាស្ថានពរក៏ដោយ បន្ទាប់មកសមត្ថកិច្ចត្រូវតាមដានទៀតតើការទាក់ទងរវាងទណ្ឌិតនៅក្នុងគុក និងជនល្មើស វាយ៉ាងម៉េច?
ជាមួយគ្នានោះដែរ លោកនាយឧត្តមសេនីយ៍អគ្គស្នងការនគរបាលជាតិ បានសំណូមពរឲ្យការបង្ក្រាបនេះធ្វើឲ្យដល់ឫសគល់មិនមែនគ្រាន់តែបញ្ជូនជនល្មើសទៅតុលាការហើយចប់រឿងនោះទេ ត្រូវស្រាវជ្រាវដល់ឫសគល់ថាករណីនេះអ្នកណាជាមេខ្លោងចែកចាយ? តើអ្នកណាជាអ្នកទទួលផលជាដើម? សមត្ថកិច្ចបានធ្វើការមួយជំហានហើយជាមួយអគ្គនាយកដ្ឋានពន្ធនាគារដើម្បីសិក្សាឡើងវិញពីបញ្ហានេះ ៕
ចែករំលែកព័តមាននេះ