ខេត្តបន្ទាយមានជ័យ ៖ នៅល្ងាចថ្ងៃទី២៥ ខែសីហា ឆ្នាំ២០១៦នេះ កម្លាំងកងរាជអាវុធហត្ថក្រុងប៉ោយប៉ែតចំនួន៥នាក់ ដឹកនាំដោយលោកវរៈសេនីយ៍ត្រី ជា ដា មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានចេញប្រតិបត្តិការបង្ក្រាបករណីជួញដូរគ្រឿងញៀន នៅចំណុចខាងលិចស្តង់តាងួន ស្ថិតក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ក្នុងកិច្ចប្រតិបត្តិការនោះ កម្លាំងកងរាជអាវុធហត្ថ បានធ្វើការឃាត់ខ្លួនបានជនសង្ស័យចំនួន២នាក់ និងដកហូតបានវត្ថុតាងរួមមានគ្រឿងញៀនប្រភេទម៉ាទឹកកកចំនួន១៩ថង់តូចថ្លា ក្រោយពីឃាត់ខ្លួនហើយជនសង្ស័យទាំង២នាក់ ត្រូវបានអាវុធហត្ថក្រុងប៉ោយប៉ែតបញ្ជូនមកបញ្ជាការកងរាជអាវុធហត្ថខេត្តបន្ទាយមានជ័យ ដើម្បីធ្វើការសាកសួរបន្ត។ លោកវរៈសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យ ទទួលលើការងារបទល្មើសគ្រឿងញៀន បានឲ្យដឹងថា ជនសង្ស័យទាំង២នាក់នោះ ទី១-ឈ្មោះ ទូច រដ្ឋា ភេទប្រុស អាយុ២៦ឆ្នាំ ទី២-ឈ្មោះ ផន សុជាតិ ភេទប្រុស អាយុ៣២ឆ្នាំ ទាំងពីរនាក់នេះរស់នៅក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកវរ:សេនីយ៍ឯក ស ប៊ុនសឿង បានបញ្ជាក់ទៀតថា មុនពេលកើតហេតុនោះ កម្លាំងកងរាជអាវុធហត្ថក្រុងប៉ោយប៉ែតបានទទួលព័ត៌មានពីប្រជាពលរដ្ឋថា មានយុវជនពីនាក់កំពុងនាំគ្នាជក់ និងលក់គ្រឿងញៀននៅចំណុចកើតហេតុទើបកម្លាំងចុះទៅដល់ហើយធ្វើការឃាត់ខ្លួនជនសង្ស័យបានចំនួន២នាក់ភ្លាមៗផងដែរ។ លោក វរ:សេនីយ៍ឯក ស ប៊ុនសឿង បានបញ្ជាក់ទៀតថា នៅមុខកងរាជអាវុធហត្ថខេត្ត ជនសង្ស័យទាំង២នាក់ បានឆ្លើយសារភាពថា ខ្លួនគេពិតជាបានលួចលក់គ្រឿងញៀននៅចំណុចខាងលើពិតប្រាកដមែន។
ហើយគ្រឿងញៀនទាំងអស់នេះខ្លួនបានទិញពីបុរសម្នាក់ក្នុងតម្លៃ ៣.០០០បាតយកមកវេចខ្ចប់ដាក់ក្នុងកូនថង់តូចៗ ក្នុង១ថង់មានតម្លៃ ៣០.០០០រៀល។ ក្រោយពីបានចម្លើយសារភាពហើយ ជនសង្ស័យទាំង២នាក់ត្រូវបានកម្លាំងកងរាជអាវុធហត្ថខេត្តកសាងសំណុំរឿងបញ្ជូនទៅតុលាការដើម្បីដាក់ទោសទៅតាមផ្លូវច្បាប់៕
ចែករំលែកព័តមាននេះ