ខេត្តកំពង់ធំ ៖ ស្របពេលក្រុមការងារដែលចុះបេសកម្មក្នុងខេត្តកំពង់ធំជាយូរមកហើយនោះ ប្រជាពលរដ្ឋ៤១គ្រួសារបាននាំគ្នាមកសំណូមពរសុំឲ្យអភិបាលខេត្តជួយពន្លឿនក្នុងការផ្តល់បណ្ណ័កម្មសិទ្ធិស្របច្បាប់ដល់ពួកគាត់ ដែលបានមករស់នៅលើដីដែលគ្រប់គ្រងរបស់មន្ទីរកសិកម្មខេត្តកំពង់ធំ តាំងពីឆ្នាំ១៩៨០ឆ្នាំ១៩៨០ជាងមកដល់បច្ចុប្បន្ននេះ ស្ថិតនៅក្នុងភូមិបល្ល័ង្កខាងលិច សង្កាត់ដំរីជាន់ខ្លា ក្រុងស្ទឹងសែន។
ដើម្បីឆ្លើយតបចំពោះការស្នើសុំរបស់បងប្អូនប្រជាពលរដ្ឋខាងលើនេះ នៅថ្ងៃទី២៦ ខែសីហា ឆ្នាំ២០១៦ ឯកឧត្តម ម៉ាន សុគ្រី អនុរដ្ឋលេខាធិការក្រសួងកសិកម្មរុក្ខាប្រមាញ់ និងនេសាទ និងជាប្រធានគណៈកម្មការអន្តរក្រសួង និងឯកឧត្តម គង់ វិមាន អភិបាលរងខេត្ត តំណាងឲ្យឯកឧត្តម អ៊ុត សំអន អភិបាលខេត្តដោយមានការអញ្ជើញចូលពីក្រុមការងារថ្នាក់ជាតិ និងថ្នាក់ខេត្តបានចុះទៅត្រួតពិនិត្យ ធ្វើបច្ចុប្បន្នភាពលើផ្ទៃដីដែលមានបញ្ហាប្រជាពលរដ្ឋស្នើសុំឲ្យបានច្បាស់លាស់ដើម្បីមានមូលដ្ឋានសម្រាប់ រកវិធីដោះស្រាយ។
បន្ទាប់ពីចុះត្រួតពិនិត្យឯកឧត្តម គង់ វិមាន មានប្រសាសន៍ថា អាជ្ញាធរខេត្តបានទទួល យកនូវសំណូមពររបស់ប្រជាជាពលរដ្ឋទាំង៤១គ្រួសារនោះហើយខេត្តក៏បានធ្វើសំណើនេះជូនទៅក្រសួងកសិកម្ម រុក្ខាប្រមាញ់ និងនេសាទរួចហើយដែរ ដែលបញ្ហានេះកើតមានតាំងពីឆ្នាំ២០០៧មកម្លេះ។ ឯកឧត្តម ម៉ាន សុគ្រី មានប្រសាសន៍ថា ក្រោយពីចុះត្រួតពិនិត្យយ៉ាងល្អិតល្អន់រួចមក និងបើកអង្គប្រជុំបានឯកភាព ប្រគល់ភារកិច្ចនេះជូនអភិបាលខេត្តកំពង់ធំធ្វើបច្ចប្បន្នភាព និងធ្វើសំណើសុំទៅថ្នាក់ដឹកនាំក្រសួងដើម្បី ពិនិត្យ និងសម្រេច ចំណែកដីប្រឡាយត្រូវរក្សាទុកជាទ្រព្យសម្បត្តិសារធារណៈរបស់រដ្ឋដោយចាត់បញ្ចូល ក្នុងបញ្ជីសារពើភ័ណរបស់មន្ទីរកសិកម្មខេត្ត។
ក្នុងនោះផងដែរឯកឧត្តម ម៉ាន សុគ្រី មានប្រសាសន៍បញ្ជាក់ថា សូមកុំឲ្យយល់ច្រឡំឲ្យសោះថាលោក ចុះមកនេះមានសិទ្ធិសម្រេចលើបញ្ហា ខាងលើនេះឲ្យសោះ គឺគ្មានទេទាល់តែថ្នាក់ក្រសួង ហើយនិងរាជរដ្ឋាភិបាលទើបលោកមានសិទ្ធិសម្រេច ចំណែកលោកចុះមកនេះគ្រាន់តែមានសិទ្ធិពិនិត្យថាដីនេះជាអាំងវាំងទ័រ របស់ក្រសួងកសិកម្មដែលគ្រប់គ្រង ដោយមន្ទីរកសិកម្មខេត្តកំពង់ធំតែប៉ុណ្ណោះ៕
ចែករំលែកព័តមាននេះ