រាជធានីភ្នំពេញ ៖ TrueMoney ដែលក្រុមហ៊ុនវេរលុយ និងទូទាត់វិក្កយបត្រ និងក្រុមហ៊ុន KOSIGN ដែលជាក្រុមហ៊ុនផ្ដល់សេវាកម្មជួលម៉ាស៊ីន ATM/BDM, សេវាកម្ម Multi-Banking
រាជធានីភ្នំពេញ ៖ TrueMoney ដែលក្រុមហ៊ុនវេរលុយ និងទូទាត់វិក្កយបត្រ និងក្រុមហ៊ុន KOSIGN ដែលជាក្រុមហ៊ុនផ្ដល់សេវាកម្មជួលម៉ាស៊ីន ATM/BDM, សេវាកម្ម Multi-Banking និងសេវាកម្មជាច្រើនទៀត បានចាប់ដៃសហប្រតិបត្តិការលើសេវាបង់វិក្កយបត្ររវាងក្រុមហ៊ុនទាំងពីរ ដើម្បីបង្កលក្ខណៈដល់អតិថិជនរបស់ក្រុមហ៊ុន KOSIGN ។ កាលពីថ្ងៃទី២៣ សីហា ក្រុមហ៊ុនទាំងពីរក៏បានចុះអនុស្សរណៈយោគយល់លើកិច្ចសហប្រតិបត្តិការនេះដែរ នៅសណ្ឋាគារភ្នំពេញ ។
តាមសេចក្តីប្រកាសព័ត៌មានរូមរវាងក្រុមហ៊ុនទាំងពីថា តាមរយៈកិច្ចព្រមព្រៀងនេះ ក្រុមហ៊ុន KOSIGN នឹងក្លាយជាដៃគូសហការ (Super Biller) ដែលមានសិទ្ធិផ្ដល់បន្តនូវសេវាកម្មបង់វិក្កយបត្ររបស់ក្រុមហ៊ុន TrueMoney ទៅឲ្យក្រុមហ៊ុនដទៃទៀត ។ ក្រុមហ៊ុនដែលជា Biller របស់ KOSIGN អាចប្រើប្រាស់ Web Platform ឈ្មោះថា WeBill ដើម្បីបង្កើតវិក្កយបត្រ និងគ្រប់គ្រងរបាយការណ៍ នៃការទូទាត់វិក្កយបត្រជូនអតិថិជន ។
នៅក្នុងពិធីចុះហត្ថលេខារវាងក្រុមហ៊ុនទាំងពីរ លោក Jung Tae Sung នាយកប្រតិបត្តិក្រុមហ៊ុន KOSIGN បានលើកឡើងថា ការសហការគ្នានេះ ដោយសារតែក្រុមហ៊ុនទាំងពីរមានចក្ខុវិស័យដូចគ្នា ដោយគោលដៅនាពេលអនាគតរបស់ពួកយើង គឺក្លាយជាក្រុមហ៊ុនលំដាប់លេខ១ ក្នុងជំនួញរបស់ពួកយើងមិនត្រឹមតែនៅក្នុងប្រទេសកម្ពុជានោះទេ ប៉ុន្តែនៅប្រទេសក្នុងតំបន់ ASEAN ផងដែរ ។
លោកបន្តថា «ជំហានបន្ទាប់របស់ពួកយើង គឺធ្វើកិច្ចសហប្រតិបត្តិការទៅលើសេវាកម្មគ្រប់គ្រងប្រាក់បៀវត្សន៍ និងសេវាកម្មបង់ប្រាក់ Online និង Offline ។ ហើយសម្រាប់សេវាកម្មគ្រប់គ្រងបៀវត្សន៍ ក្រុមហ៊ុនទាំងពីរគ្រោងនឹងចាប់ផ្ដើមដំណើរការនាពេលឆាប់ៗខាងមុខនេះ ចំណែកឯសេវាកម្មបង់ប្រាក់ Online និង Offline ពួកយើងកំពុងតែសិក្សាបន្ថែមមុននឹងដំណើរការ » ។
លោក គង់ មាន នាយកគ្រប់គ្រងទូទៅរបស់ក្រុមហ៊ុន TrueMoney ប្រចាំនៅកម្ពុជា បានឱ្យដឹងថា សេវាកម្មនេះនឹងផ្ដល់ភាពងាយស្រួលដល់ Billers ក៏ដូចជាអតិថិជនរបស់ពួកគាត់ ។ សម្រាប់ Billers ពួកគាត់អាចបង្កើតវិក្កយបត្រ និងគ្រប់គ្រងការបង់វិក្កយបត្រដោយខ្លួនគាត់ផ្ទាល់តាមរយៈ Web Platform ដែល KOSIGN បានផ្ដល់ឲ្យ ។
លោកថា «តាមរយៈការប្រើប្រាស់ Platform នេះ អាចកាត់បន្ថយភាពភ័នច្រឡំ ភាពច្រំដែល ការចំណាយផ្សេងៗ ក៏ដូចជាកាត់បន្ថយពេលវេលាផងដែរ ។ សម្រាប់អតិថិជនរបស់ Billers មិនចាំបាច់ចំណាយពេលទៅបង់វិក្កយបត្រដល់ទីតាំងនោះទេ ហើយម្យ៉ាងវិញទៀតភ្នាក់ងារ TrueMoney ក៏មានស្ទើរគ្រប់ទីកន្លែង ហេតុនេះអតិថិជនអាចបង់វិក្កយបត្របានយ៉ាងងាយស្រួល» ។
លោកបញ្ជាក់ថា បច្ចុប្បន្ននេះក្រុមហ៊ុនទ្រូម៉ាន់នី មានភ្នាក់ងារជិត៥.០០០ទីតាំង ចាំផ្ដល់សេវាកម្មជូនអតិថិជននៅទូទាំងប្រទេសកម្ពុជា ។ ក្រុមហ៊ុនមានការិយាល័យចំនួន៦នៅក្នុងតំបន់អាស៊ាន មានប្រទេសកម្ពុជា, ថៃ, ហ្វីលីពីន, ឥណ្ឌូនេស៊ី, មីយ៉ាន់ម៉ា និងវៀតណាម ។
គួរបញ្ជាក់ថា បច្ចុប្បន្នក្រុមហ៊ុនទ្រូម៉ាន់នី កំពុងតែមានឈ្មោះល្បីខាងសេវាកម្មផ្ទេរប្រាក់នៅព្រះរាជាណាចក្រកម្ពុជា ដោយសារតែក្រុមហ៊ុនទទួលបានទំនុកចិត្តខ្ពស់ពីអតិថិជន តាមរយៈការផ្ដលភាពងាយស្រួល សុវត្ថិភាពខ្ពស់ និងថ្លៃសេវាសមរម្យដោយចំណាយត្រឹមតែ២.៥០០រៀលប៉ុណ្ណោះក្នុងការផ្ទេរប្រាក់ម្ដងៗ ។ ម្យ៉ាងទៀត សេវាកម្មផ្ទេរប្រាក់នៅក្នុងប្រទេសកម្ពុជា ក៏កាន់តែពេញនិយមច្រើនពីសំណាក់ប្រជាពលរដ្ឋ ដូចជាការផ្ទេរប្រាក់របស់កម្មករ កម្មការិនីទៅកាន់ឪពុកម្ដាយ បងប្អូន និងការផ្ទេរប្រាក់ពីឪពុកម្ដាយទៅអោយកូនៗសិក្សាជាដើម ៕
ចែករំលែកព័តមាននេះ