រាជធានីភ្នំពេញ ៖ ថ្ងៃសៅរ៍ ទី២៧ សីហា ស្អែកនេះ ការប្រកួតសន្សំពិន្ទុរវាងកីឡាករកម្ពុជា និងកីឡាករថៃក្នុងព្រឹត្តិការណ៍ប្រដាល់ដណ្ដើមខ្សែក្រវាត់ខារ៉ាបាវឈានចូលដល់សប្ដាហ៍ទី២ហើយ ដោយកីឡាករកម្ពុជា២រូបគឺរឿម វណ្ណៈ និង ឌុម កែវដា គឺជាអ្នកស្វាគមន៍កីឡាករថៃ ។ ការប្រកួតនេះទទួលបានការចាប់អារម្មណ៍យ៉ាងខ្លាំងពីសំណាក់មហាជន បន្ទាប់ពីក្នុងសប្ដាហ៍បើកឆាកកីឡាករកម្ពុជា២រូបសុទ្ធតែចាញ់បាត់បង់៣ពិន្ទុទៅឱ្យកីឡាករថៃរួចទៅហើយ ។
លោក ញាណ សុធី អ្នករៀបចំកម្មវិធីប្រដាល់ប្រចាំស្ថានីយទូរទស្សន៍អាស៊ីអាគ្នេយ៍បានអះអាងថា ការប្រដាល់ដែលមានឈ្មោះថា «ប្រដាល់អន្តរជាតិជើងឯកខ្សែក្រវាត់ខារ៉ាបាវ» កាន់តែធ្វើឱ្យមានការទាក់ទាញទ្វេដងបន្ទាប់ពីការប្រកួតនៅក្នុងសប្ដាហ៍ទី១ គឺកីឡាករកម្ពុជាចាញ់កីឡាករថៃទាំងអស់ ។ លោកថាព្រឹត្តិការណ៍នេះពោរពេញដោយវត្តមានកីឡាករវ័យក្មេង និងសុទ្ធតែខ្លាំងជាពិសេសគឺកីឡាករថៃសុទ្ធតែមានសមត្ថភាពសម្រាប់ប្រភេទទម្ងន់ ៦៣,៥គីឡូក្រាម ។ លោកថា នៅក្នុងព្រឹត្តិការណ៍នេះមានកីឡាករសរុបចំនួន៨រូបដូចជាម្ចាស់ខ្សែក្រវាត់ K-Cement ឆៃ សារ៉ា មកពីសមាគមកីឡាប្រដាល់ក្រសួងការពារជាតិ កីឡាករម៉ន ចាន់ដារ៉ា មកពីក្លិបការិយាល័យទី៥កងទ័ពជើងគោក ដែលបានចាញ់ការប្រកួតរួចទៅហើយ កីឡាកររឿម វណ្ណៈ មកពីក្លិបរាជសីហ៍ខេត្តបន្ទាយមានជ័យ និងកីឡាករ ឌុម កែវដា មកពីក្លិបមកុដរាជសីហ៍ ។
សម្រាប់កីឡាករថៃរួមមានកីឡាករ Aram Boy កីឡាករ Pha Yalek កីឡាករ Pravit និងកីឡាករYort Sayam ។ លោកថា ព្រឹត្តិការណ៍ប្រដាល់ខារ៉ាបាវនេះ កីឡាករកម្ពុជា និងថៃដ្បិតថា ឈរពូលផ្សេងគ្នា ប៉ុន្តែពួកគេត្រូវប្រកួតគ្នាទៅវិញទៅមកទើបប្រមូលពិន្ទុដើម្បីជ្រើសយកកីឡាករថៃ និងកីឡាករកម្ពុជាដែលមានពិន្ទុខ្ពស់ជាងគេក្នុងពូលរៀងខ្លួនឡើងទៅវគ្គបន្ត ។
សមាសភាពគូប្រកួតដែលមានមុខឡើងសង្វៀនថ្ងៃនេះរួមមាន កីឡាកររឿម វណ្ណៈ ប៉ះប្រកួតជាមួយកីឡាករថៃឈ្មោះ Pravit និងកីឡាករ ឌុម កែវដា ប៉ះប្រកួតជាមួយកីឡាករថៃឈ្មោះ Yort Sayam ។ ជំនួបរវាងពួកគេសុទ្ធតែមានអ្នកគាំទ្ររៀងខ្លួនយល់ថានឹងអាចដណ្ដើមបាន៣ពិន្ទុមុនមិនខុសគ្នា ដោយសារតែកីឡាករម្ខាងៗសុទ្ធតែមានក្រេឌីតមិនណយដូចគ្នា ។ សម្រាប់គូរឿម វណ្ណៈ គេជឿភាគច្រើនថាកីឡាកររូបនេះនឹងយកបាន៣ពិន្ទុបើកឆាកដោយផ្អែកតាមគេតាំងពីបានក្លាយខ្លួនជាកីឡាករដែលមានក្រេឌីត គឺមានលទ្ធផលឈ្នះកីឡាករថៃស្ទើរតែគ្រប់ពេលឡើងរេញអន្តរជាតិនៅលើសង្វៀនទូរទស្សន៍អាស៊ីអាគ្នេយ៍ ។
រីឯអ្នកគាំទ្រកីឡាករថៃមិនយល់ដូច្នោះនោះទេ បន្ទាប់ពីកីឡាករPravitក៏មានប្រវត្តិបំបាក់កីឡាករខ្លាំងៗរបស់កម្ពុជានៅលើសង្វៀនទូរទស្សន៍អាស៊ីអាគ្នេយ៍រាប់មិនអស់ឱ្យគេបានស្គាល់ពីថ្វីដៃរួចមកហើយផងដែរ ។ ក្រុមអ្នកយល់ឃើញបែបនោះ គិតថា រឿម វណ្ណៈ អាចនឹងយកមុខមាត់របស់គេទៅចាក់ចោលកណ្ដាលរេញខារ៉ាបាវនៅរសៀលថ្ងៃនេះក៏ថាបាន ប្រសិនបើការប្រកួតរបស់គេមិនមានបច្ចេកទេសខ្ពស់ណាមួយអាចធ្វើឱ្យថៃបាក់មុខ ។ គូនេះអ្វីដែលគេទស្សន៍ទាយ គឺអ្នកឈ្នះ និងអ្នកចាញ់នឹងទ្រមខ្លួនមិនខុសគ្នាដោយសារតែម្នាក់ៗសុទ្ធតែចង់បាន៣ពិន្ទុពីកម្មវិធី ។ កីឡាកររឿម វណ្ណៈ ធ្លាប់ប្រកួតបាន៦៧លើក ឈ្នះ៥០លើក ចាញ់១៦លើក និងស្មើ១លើក ក្នុងពេលដែលកីឡាករថៃប្រកួតបានរហូតដល់៩២លើក ឈ្នះ៧៩លើក ចាញ់១១លើក និងស្មើ២លើក។
មួយគូទៀត គឺជាជំនួបរវាងកីឡាករ ឌុម កែវដា និងកីឡាករថៃឈ្មោះ Yort Sayam។ គូនេះមានមនុស្សភាគច្រើនយល់ថាជើងខ្លាំងមកពីថៃនឹងមានក្រេឌីតខ្លាំងជាង ដោយសារតែមុនឡើងប្រកួតនៅក្នុងព្រឹត្តិការណ៍អន្តរជាតិខារ៉ាបាវរសៀលនេះ គេបានបង្ហាញភាពខ្លាំងជាមួយកីឡាករកម្ពុជារួចទៅហើយ ។ ទោះបីយ៉ាងណា ឌុម កែវដា ដ្បិតថាក្មេង និងខ្ចីបទពិសោធន៍ក៏មិនអន់ដល់ថ្នាក់ឱ្យកីឡាករថៃយក៣ពិន្ទុបានដោយស្រួលនោះដែរ ទើបពួកគេដាច់ខាតត្រូវតែបញ្ចេញអស់សមត្ថភាពរៀងខ្លួន ។ កីឡាករថៃធ្លាប់ប្រកួតបាន៧៦លើក ឈ្នះ៦៤លើក ចាញ់១១លើក និងស្មើ១លើក ក្នុងពេលដែលកីឡាករកម្ពុជាធ្លាប់ប្រកួតបាន៧១លើក ឈ្នះ៥៨លើក ចាញ់១១លើក និងស្មើ២លើក ៕
ចែករំលែកព័តមាននេះ