តំបន់អាកទិក ឬប៉ូលខាងជើង ជាតំបន់ដ៏ត្រជាក់ ដាច់ស្រយាល និងជាតំបន់មួយដែលលំបាក និងត្រូវការថវិកាយ៉ាងច្រើនសម្រាប់ក្រុមហ៊ុនប្រេងដែលមានបំណងចង់ពង្រីកផលិតកម្មរបស់ខ្លួន ។ ប្រាកដណាស់
តំបន់អាកទិក ឬប៉ូលខាងជើង ជាតំបន់ដ៏ត្រជាក់ ដាច់ស្រយាល និងជាតំបន់មួយដែលលំបាក និងត្រូវការថវិកាយ៉ាងច្រើនសម្រាប់ក្រុមហ៊ុនប្រេងដែលមានបំណងចង់ពង្រីកផលិតកម្មរបស់ខ្លួន ។ ប្រាកដណាស់ ការជីកកកាយក្នុងតំបន់នេះ គឺត្រូវបានជំទាស់យ៉ាងខ្លាំងពីក្រុមការពារបរិស្ថាន ព្រោះវាជាតំបន់ដែលមានសត្វសំខាន់ៗកំពុងរស់នៅ ។
ប៉ុន្តែមិនថាមានឧបសគ្គហិរញ្ញវត្ថុ ឬការជំទាស់ពីក្រុមការពារបរិស្ថានទេ ក៏មិនអាចបញ្ឈប់លោក Gazprom Neft ក្នុងការស្វែងរកប្រេង និងឧស្ម័នធម្មជាតិក្នុងតំបន់អាកទិកដែរ។ តំបន់ប្រេង Prirazlomnaya គឺជាគម្រោងជីកប្រេង និងឧស្ម័នធម្មជាតិរបស់រុស្ស៊ី ដែលមានសកម្មភាពដំបូងគេបង្អស់ ហើយប្រាកដណាស់ថា វាក៏មិនមែនជាគម្រោងចុងក្រោយដែរ ។
បច្ចុប្បន្ននេះ រុស្ស៊ី គឺជាប្រទេសដែលផលិតប្រេងឆៅធំជាងគេលើសកលលោក ទោះជាពេលខ្លះបានផ្លាស់ប្តូរតំណែងជាមួយប្រទេសអារ៉ាប៊ីសាអូឌីតក្តី ។ រុស្ស៊ី ក៏ជាប្រទេសដែលផលិតឧស្ម័នធម្មជាតិធំជាងគេលេខ២ផងដែរ បន្ទាប់ពីសហរដ្ឋអាមេរិកលេខ១ ។ ម្យ៉ាងទៀត ពាក់កណ្តាលនៃចំណូលរបស់រដ្ឋាភិបាលរុស្ស៊ី គឺបានមកពីការលក់ប្រេង និងឧស្ម័នធម្មជាតិ ដែលធ្វើឲ្យវិស័យថាមពលមានសារសំខាន់ណាស់សម្រាប់ប្រទេសនេះ ។ ប៉ុន្តែដោយសារតែតំបន់ប្រេងលើគោកជាច្រើនរបស់រុស្ស៊ី កំពុងតែមានអាយុកាលចាស់ និងរីង ដោយសារមានការបូមយកអស់ជាច្រើនទសវត្សរ៍មកហើយ វាបានក្លាយជាក្តីបារម្ភមួយរបស់រុស្ស៊ី ។
ហេតុនេះហើយទើបប្រទេសនេះចាប់ផ្តើមងាកមកប៉ែកខាងជើង ។ ការជីករុករកតំបន់ប្រេងនៅទីនោះ គឺពិតជាពិបាកណាស់ និងត្រូវការថវិកាច្រើន រួមទាំងចំណេះដឹងផ្នែកបច្ចេកទេសផងដែរ ។ សារព័ត៌មានរបស់លោកខាងលិចពិតជារីករាយ និងរំលឹកទៅដល់ការផ្តន្ទាទោសទៅលើប្រទេសរុស្ស៊ី ដែលជាហេតុធ្វើឲ្យប្រទេសនេះមិនអាចទទួលបានជំនួយពីលោកខាងលិច លើផ្នែកបច្ចេកទេស និងជំនាញឡើយ ដែលក្លាយជាឧបសគ្គយ៉ាងធំមួយដល់គម្រោងស្វែងរកប្រេងក្នុងតំបន់អាកទិក ។
គួរបញ្ជាក់ថា ប្រទេសរុស្ស៊ីមិនធ្លាប់ខ្វះខាតវិស្វករម្តងណាទេ ហើយក្រុមហ៊ុនថាមពលបច្ចុប្បន្ននេះ ថែមទាំងទទួលបានជំនួយពីរដ្ឋាភិបាលយ៉ាងខ្លាំងក្លា ព្រោះរដ្ឋាភិបាលរុស្ស៊ីពិតជាបានដឹងពីសារសំខាន់នៃការជីកយកប្រេង និងឧស្ម័នពីតំបន់អាកទិក ដើម្បីទ្រទ្រង់វិស័យដែលប្រទេសខ្លួនកំពុងពឹងផ្អែក គឺវិស័យថាមពល ។ ដូច្នេះហើយរដ្ឋាភិបាលរីករាយនឹងផ្តល់ជំនួយគ្រប់បែបយ៉ាង ប្រសិនបើមានគម្រោង ឬផែនការណាមួយដែលអាចធ្វើឲ្យរុស្ស៊ីបូមយកប្រេងពីតំបន់អាកទិកបាន ។
អ្នកស្រាវជ្រាវក្នុងសាកលវិទ្យាល័យ និងមន្ទីរពិសោធន៍កំពុងតែសិក្សាទៅលើវិធីផ្សេងៗ ក្នុងការទាញយកប្រេងពីតំបន់អាកទិក រួមទាំងឧបករណ៍សម្រាប់គ្រប់គ្រងការធ្លាយចេញនៃប្រេងក្នុងតំបន់ដាច់ស្រយាល និងបច្ចេកទេសសម្អាតប្រេងដែលបានធ្លាយចេញនៅក្រោមផ្ទៃទឹកកក ។ បើនិយាយឲ្យខ្លីទៅ ជំនួយពីរដ្ឋាភិបាលក៏ត្រូវបានចូលរួមដោយគំនិតវិទ្យាសាស្ត្រ និងទំនើបកម្មផងដែរ ។
តំបន់ប្រេង Prirazlomnaya បាននាំចេញប្រេងកាលពីខែមេសា ឆ្នាំ២០១៤ តាមរយៈលោក Gazprom Neft ។ បច្ចុប្បន្ននេះ មានអណ្តូងប្រេងទាំងអស់៤ ដែលអាចបូមប្រេងសរុបបាន៥០.៧០០ធុងក្នុង១ថ្ងៃ ។ លោក Gazprom Neft មានគម្រោងបង្កើតឲ្យមានអណ្តូង៣២ នៅក្នុងតំបន់នោះ ។
យោងតាមការប៉ាន់ប្រមាណពី Geological Survey របស់សហរដ្ឋអាមេរិកបង្ហាញឲ្យដឹងថា ឃ្លាំងផ្ទុកប្រេង និងឧស្ម័នក្នុងតំបន់អាកទិក គឺអាចមានដល់៨៩.៩៨៣ប៊ីលានធុងនៃប្រេងឆៅ និង១,៦៦៩ទ្រីលានហ្វីតគូបនៃឧស្ម័នធម្មជាតិ។ ប្រទេសរុស្ស៊ី ក៏បានទទួលមួយចំណែកនៃធនធានធម្មជាតិទាំងនេះដែរ ។ ប៉ុន្តែប្រទេសនេះបានព្យាយាមពង្រីកទឹកដីរបស់ខ្លួន និងធ្វើឲ្យប្រទេសដទៃដែលមានសិទ្ធិក្នុងតំបន់ រួមមាន ន័រវែស, ដាណឺម៉ាក, កាណាដា និងសហរដ្ឋអាមេរិកមានការក្តៅក្រហាយ ។ ដោយមូលហេតុនេះ រុស្ស៊ីមិនអាចទទួលបានអ្វីដែលខ្លួនចង់បានដោយងាយទេ (ទាំងការពង្រីកទឹកដី និងការជីករកប្រេង) ។ ប៉ុន្តែទោះយ៉ាងណាក្តី រុស្ស៊ីនឹងបន្តធ្វើអ្វីដែលល្អសម្រាប់ខ្លួន ដើម្បីទទួលបានការគ្រប់គ្រងតំបន់អាកទិក ៕
ចែករំលែកព័តមាននេះ