រាជធានីភ្នំពេញ ៖ ធនាគារអេស៊ីលីដា ភីអិលស៊ី ដែលធនាគារពាណិជ្ជឈានមុខគេនៅកម្ពុជា បានប្រកាសជាផ្លូវការកាលពីថ្ងៃទី២៤ សីហា កន្លងមកថា សាជីវកម្មវិនិយោគឯកជនក្រៅប្រទេស ហៅកាត់ថា
រាជធានីភ្នំពេញ ៖ ធនាគារអេស៊ីលីដា ភីអិលស៊ី ដែលធនាគារពាណិជ្ជឈានមុខគេនៅកម្ពុជា បានប្រកាសជាផ្លូវការកាលពីថ្ងៃទី២៤ សីហា កន្លងមកថា សាជីវកម្មវិនិយោគឯកជនក្រៅប្រទេស ហៅកាត់ថា OPIC ដែលជាស្ថាប័នអភិវឌ្ឍន៍ហិរញ្ញវត្ថុរបស់រដ្ឋាភិបាលសហរដ្ឋអាមេរិក បានចុះកិច្ចព្រមព្រៀងផ្ដល់ហិរញ្ញប្បទានដល់ធនាគារអេស៊ីលីដា ភីអិលស៊ី ចំនួន១២៥លានដុល្លារអាមេរិកដើម្បីគាំទ្រសហគ្រាសខ្នាតតូចបំផុត ខ្នាតតូច និងខ្នាតមធ្យម (MSMEs)។ ហិរញ្ញប្បទាននេះ ជំរុញឲ្យមានកំណើនសេដ្ឋកិច្ច ឱកាសការងារ ផលិតផល និងសេវាកម្មក្នុងវិស័យឯកជននៅប្រទេសកម្ពុជា។ នេះបើយោងតាមសេចក្ដីប្រកាសព័ត៌មានរបស់ធនាគារអេស៊ីលីដា ។
លោកបណ្ឌិត អិុន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានមានប្រសាសន៍ថា ៖ « ការទទួលបានហិរញ្ញប្បទានរយៈពេលវែងពី OPIC ពិតជាមានសារសំខាន់ខ្លាំងណាស់សម្រាប់ធនាគារអេស៊ីលីដា ភីអិលស៊ី ដើម្បីពង្រីកលទ្ធភាពការផ្តល់កម្ចីទៅសហគ្រាសខ្នាតតូចបំផុត ខ្នាតតូច និងខ្នាតមធ្យម នៅទូទាំងប្រទេសកម្ពុជា ដែលមានតម្រូវការហិរញ្ញប្បទានសម្រាប់ចាប់ផ្តើម និងពង្រីកធុរកិច្ច ព្រមទាំងបង្កើនចំណូល ។ លើសពីនេះទៀត ហិរញ្ញប្បទានរបស់ OPIC អាចរួមចំណែកបង្កើនប្រភពទុនយុទ្ធសាស្ត្ររបស់ធនាគារអេស៊ីលីដា ភីអិលស៊ី ជាធនាគារឈានមុខគេនៅក្នុងទីផ្សារហិរញ្ញវត្ថុកម្ពុជា » ។
អ្នកនាង អីលីហ្សាបេត អែល. លីថលហ្វីល ប្រធាននាយកប្រតិបត្តិរបស់ OPIC បានមានប្រសាសន៍ថា ៖ « ស្ថាប័នយើងខ្ញុំមានក្តីសោមនស្សរីករាយដែលបានសហការជាមួយធនាគារអេស៊ីលីដា ភីអិលស៊ី ។ ហិរញ្ញប្បទានរបស់ OPIC នឹងផ្តល់លទ្ធភាពដល់ធនាគារអេស៊ីលីដា ភីអិលស៊ី ក្នុងការផ្តល់ហិរញ្ញប្បទានដល់សហគ្រាសខ្នាតតូចបំផុត ខ្នាតតូច និងខ្នាតមធ្យមបន្ថែមទៀត ដើម្បីអភិវឌ្ឍន៍ធុរកិច្ចចីរភាពនៅក្នុងប្រទេសកម្ពុជា ព្រមទាំងធ្វើឲ្យជីវភាពរស់នៅ និងការធ្វើធុរកិច្ចរបស់ពលរដ្ឋកម្ពុជាកាន់តែមានភាពល្អប្រសើរឡើង » ។
គួរបញ្ជាក់ថា OPIC ជាស្ថាប័នអភិវឌ្ឍន៍ ហិរញ្ញវត្ថុរបស់រដ្ឋាភិបាលសហរដ្ឋអាមេរិក ។ ស្ថាប័ននេះ ធ្វើសញ្ជ័យមូលធនឯកជនដើម្បីគាំទ្រគម្រោងអភិវឌ្ឍន៍សំខាន់ៗឆ្លើយតបទៅនឹងអាទិភាពសន្តិសុខជាតិ និងគោលនយោបាយការបរទេសរបស់រដ្ឋាភិបាលអាមេរិក ។ ដោយ OPIC វិនិយោគជាមួយវិស័យឯកជនសហរដ្ឋអាមេរិក OPIC បានជំរុញឲ្យធុរកិច្ចរបស់សហរដ្ឋអាមេរិកបោះជំហានទៅក្នុងទីផ្សារដែលកំពុងអភិវឌ្ឍន៍ មានចំណូលខ្ពស់ ផ្តល់ឱកាសការងារទាំងក្នុង និងក្រៅប្រទេស។ OPIC សម្រេចបេសកកម្មតាមរយៈការផ្តល់ហិរញ្ញប្បទានដល់វិនិយោគិន ផ្តល់ការធានាហានិភ័យនយោបាយ និងគាំទ្រមូលនិធិវិនិយោគឯកជន នៅពេលដែលមូលនិធិពាណិជ្ជកម្មមិនអាចរកបានពីប្រភពផ្សេង ។
OPIC ត្រូវបានបង្កើតឡើងជាទីភ្នាក់ងាររបស់រដ្ឋាភិបាលសហរដ្ឋអាមេរិកក្នុងឆ្នាំ១៩៧១ ហើយធ្វើប្រតិបត្តិការស្វ័យនិរន្តរភាព ដោយមិនពឹងផ្អែកលើចំណាយពន្ធរបស់ប្រជាពលរដ្ឋសហរដ្ឋអាមេរិក ។ រាល់គម្រោងហិរញ្ញប្បទានរបស់ OPIC បានគោរពយ៉ាងខ្ជាប់ខ្ជួនតាមបទដ្ឋានបរិស្ថាននិងសង្គម សិទ្ធិមនុស្ស និងសិទ្ធិពលករ។ កំណត់ដោយអាណត្តិដែលមានបទដ្ឋានខ្ពស់ OPIC មានគោលបំណងលើកតម្កើងបទដ្ឋានឧស្សាហកម្មនៅតាមតំបន់នៃប្រទេសនានាដែល OPIC ផ្តល់ហិរញ្ញប្បទាន ។ សេវាកម្មផ្តល់ហិរញ្ញប្បទានរបស់ OPIC សម្រាប់សហគ្រាសថ្មី ឬការពង្រីកធុរកិច្ចក្នុងប្រទេសជាង១៦០ប្រទេសនៅទូទាំងពិភពលោក ។
បច្ចុប្បន្ន ធនាគារអេស៊ីលីដា ភីអិលស៊ី បានបង្កើតក្រុមហ៊ុនបុត្រសម្ព័ន្ធចំនួន៥គឺ ធនាគារអេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, វិទ្យាស្ថានពាណិជ្ជសាស្ត្រ អេស៊ីលីដា, ស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា និងអេស៊ីលីដា ប្រូភើធី អិលធីឌី ព្រមទាំងមានការិយាល័យតំណាងមួយនៅប្រទេសមីយ៉ាន់ម៉ា។
ធនាគារអេស៊ីលីដា ភីអិលស៊ី ផ្តល់ផលិតផល និងសេវាកម្មហិរញ្ញវត្ថុជូនដល់សាធារណជនគ្រប់មជ្ឈដ្ឋានក្នុងសហគមន៍អស់រយៈពេលជាង២៤ឆ្នាំ។ ការបម្រើសេវាកម្មហិរញ្ញវត្ថុជូនដល់អតិថិជនទាំងវិស័យឯកជន និងសាធារណៈ តាមរយៈបណ្តាញប្រតិបត្តិការរហូត២៥៨សាខាទូទាំងព្រះរាជាណាចក្រកម្ពុជា, ៤១ការិយាល័យនៅប្រទេសឡាវ និង៦ការិយាល័យនៅប្រទេសមីយ៉ាន់ម៉ា ដែលមានទ្រព្យសកម្មសរុបចំនួនជាង៤,៣៤ពាន់លានដុល្លារអាមេរិក សមតុល្យឥណទានសរុបចំនួន២.៧២២លានដុល្លារអាមេរិក និងប្រាក់បញ្ញើសន្សំសរុបចំនួន៣.០៨៥លានដុល្លារអាមេរិក គិតត្រឹមខែកក្កដា ឆ្នាំ២០១៦នេះ ៕
ចែករំលែកព័តមាននេះ