ផឹកស្រវឹងទាស់គ្នា ទាញកាំបិត និងក្តារបន្ទះចាក់ទៅលើដៃគូទំនាស់
រាជធានីភ្នំពេញ ៖ បុរសម្នាក់ ត្រូវបានកម្លាំងនគរបាលរដ្ឋបាលទួលសង្កែ ឃាត់ខ្លួនកាលពីវេលាម៉ោង៤និង០៥នាទីល្ងាច ថ្ងៃទី២៤ ខែសីហា ឆ្នាំ២០១៦ នៅត្រង់ចំណុចបន្ទប់ជួលលេខ៩
រាជធានីភ្នំពេញ ៖ បុរសម្នាក់ ត្រូវបានកម្លាំងនគរបាលរដ្ឋបាលទួលសង្កែ ឃាត់ខ្លួនកាលពីវេលាម៉ោង៤និង០៥នាទីល្ងាច ថ្ងៃទី២៤ ខែសីហា ឆ្នាំ២០១៦ នៅត្រង់ចំណុចបន្ទប់ជួលលេខ៩ ស្ថិតនៅក្នុងផ្សារសុភមង្គល ក្នុងភូមិទួលសង្កែ សង្កាត់ទួលសង្កែ ខណ្ឌឫស្សីកែវ បន្ទាប់ពីផឹកស្រវឹងមានទំនាស់គ្នា ហើយទាញកាំបិត និងក្តាបន្ទះចាក់និងវាយទៅលើគូទំនាស់របួសធ្ងន់ និងស្រាល២នាក់។ ជនបង្កហិង្សាឈ្មោះ នៅ កុសល ភេទប្រុស អាយុ ២៧ឆ្នាំ មុខរបរជាងដែក ស្នាក់នៅផ្ទះកើតហេតុខាងលើ និងមានស្រុកកំណើតនៅភូមិអំពិល ឃុំព្រះស្តេច ស្រុកព្រះស្តេច ខេត្តព្រៃវែង។
ចំណែកជនរងគ្រោះទី១. ឈ្មោះ អៀច សុផាត ហៅក្តាស អាយុ២០ឆ្នាំ មុខរបររត់ម៉ូតូកង់បី ស្នាក់នៅផ្ទះជួលកន្លែងកើតហេតុខាងលើ មានស្រុកកំណើតនៅភូមិថ្មល ឃុំចេក ស្រុកស្វាយជ្រុំ ខេត្តស្វាយរៀង បានរងរបួសបែកក្បាល និងទី.២ ឈ្មោះ ភក្ត្រ័ អាយុ២៣ឆ្នាំ មុខរបរ រត់ម៉ូតូឌុប ស្នាក់នៅផ្ទះកើតហេតុខាងលើ។ តាមព័ត៌មានបានឲ្យដឹងថា មុនពេលកើតហេតុ ជនដៃដល់ និងមិត្តភក្ដិ ចំនួន០៥នាក់ មានស្រី០២នាក់ បានមកផឹកស៊ីនៅក្នុងបន្ទប់ជួលខាងលើ។
ចំណែកជនរងគ្រោះបានអង្គុយផឹកស៊ីជាមួយមិត្តភក្តិ ចំនួន០៥នាក់ នៅបន្ទប់ជាប់គ្នា។ តាមព័ត៌មានឲ្យដឹងទៀតថា បន្ទាប់ពីផឹកស្រវឹង ក៏បានបែកគ្នាទៅផ្ទះរៀងៗខ្លួន នៅសល់តែជនរងគ្រោះ ០២នាក់នៅកន្លែងផឹកស៊ី ។ ខណៈនោះជនសង្ស័យបានស្រែកសួររកម្ចាស់ម៉ូតូកង់បីដែលបានចតទុកនៅមុខបន្ទប់ពួកគេអង្គុយផឹកនោះ ហើយជនរងគ្រោះដែលជាម្ចាស់ម៉ូតូកង់បីចេញទៅប្រាប់ថា ជាម៉ូតូកង់បីរបស់ខ្ញុំ និងបានសុំទោស។ ភ្លាមនោះជនរងគ្រោះក៏បានទៅយក ម៉ូតូចេញដើរដល់មុខបន្ទប់ ស្រាប់តែជនសង្ស័យបានយកចានគប់ និងជេរប្រមាថហើយកើតទៅជាទំនាស់ពាក្យសម្ដីគ្នា ។
ជនដៃដល់រួមទាំងបក្ខពួកក៏បានយកកាំបិតចិតបន្លែមកចាក់ទៅលើជនរងគ្រោះម្នាក់បណ្តាលឲ្យត្រូវចង្កេះខាងឆ្វេងរងរបួសធ្ងន់ និងយកក្តាបន្ទះវាយបណ្តាលឲ្យរងរបួសបែកក្បាល។ បន្ទាប់ពីមានទំនាស់បង្ករបួសស្នាមជនសង្ស័យ ម្នាក់ត្រូវបាននគរបាលចុះទៅអន្តរាគមន៍ចាប់ខ្លួនបាន។ ចំណែកជនរងគ្រោះត្រូវក្រុមគ្រួសារបញ្ជូនទៅកាន់មន្ទីរពេទ្យកាល់ម៉ែត៕
ចែករំលែកព័តមាននេះ