ខេត្តបាត់ដំបង ៖ ប្រភពព័ត៌មានបានឲ្យដឹងថា នៅវេលាម៉ោង១១និង៣០នាទីថ្ងៃត្រង់ ទី២៥ ខែសីហានេះ ពលរដ្ឋជាង៥០នាក់ តំណាងឲ្យជាង១០០គ្រួសារ នៅភូមិក្បាលថ្នល់ ឃុំកំពង់ព្រៀង
ខេត្តបាត់ដំបង ៖ ប្រភពព័ត៌មានបានឲ្យដឹងថា នៅវេលាម៉ោង១១និង៣០នាទីថ្ងៃត្រង់ ទី២៥ ខែសីហានេះ ពលរដ្ឋជាង៥០នាក់ តំណាងឲ្យជាង១០០គ្រួសារ នៅភូមិក្បាលថ្នល់ ឃុំកំពង់ព្រៀង ស្រុកសង្កែ បាននាំគ្នាតវ៉ា និងចងបដាព្រោងព្រាតនៅលើដីទំនាស់ ដើម្បីទាមទារឲ្យអាជ្ញាធរដែលតែងសន្យាមិនឈប់ ជួយពន្លឿនការដោះស្រាយជម្លោះ«ដីបឹងបុរាណ»ដែលបុគ្គលមានទ្រព្យសម្បត្តិម្នាក់ចង់បានជាកម្មសិទ្ធិ។
សេចក្ដីរាយការណ៍បានឲ្យដឹងថា ការតវ៉ារបស់ប្រជាពលរដ្ឋជាង១០០គ្រួសានោះ បានផ្អាកមួយរយៈកន្លងមកហើយ ដោយសារតែអាជ្ញាធរស្រុក និងខេត្ត សន្យាដដែលថា នឹងធ្វើការដោះស្រាយជូនប្រជាពលរដ្ឋ តែការសន្យានេះបានត្រឹមសន្យាខ្យល់តែប៉ុណ្ណោះ។ ដូច្នេះហើយទើបប្រជាពលរដ្ឋនាំគ្នាចងបដាលើដីទំនាស់ ដើម្បីតវ៉ាជាថ្មី ដើម្បីសុំឲ្យក្រសួងពាក់ព័ន្ធ និងសម្ដេចតេជោ ហ៊ុន សែន ជួយអន្តរាគមន៍ម្ដង។ពលរដ្ឋបានអះអាងថា ដីបឹងបុរាណដែលមានទំនាស់នោះឈ្មោះ«បឹងតាអឿ» មានផ្ទៃដីទំហំ៩៣៤៧ម៉ែត្រការេ ជាបឹងសាធារណៈ មានទីតាំងជាប់ផ្លូវជាតិលេខ៥ ស្ថិតក្នុងភូមិ ឃុំខាងលើ។
ដីបឹងនេះមានជម្លោះរ៉ាំរ៉ៃច្រើនឆ្នាំហើយ រវាងប្រជាពលរដ្ឋដែលទាមទារធ្វើជាសម្បត្តិរដ្ឋ ជាមួយបុគ្គលមានទ្រព្យសម្បត្តិម្នាក់ ដែលទាមទារធ្វើជាកម្មសិទ្ធិឯកជន។ បើផ្អែកលើឯកសារនានា និងការបំភ្លឺពីមន្ត្រីសុរិយោដី បានប្រាប់ថា «បឹងតាអឿ» ពិតជាដីបឹងសាធារណៈប្រាកដមែន។ នៅលើក្បាលដឹបឹងនេះ មិនមានឈ្មោះបុគ្គលណាម្នាក់មានសិទ្ធិកាន់កាប់ទេ ហើយការដោះស្រាយមិនចេញកន្លងមក គឺដោយសារតែមន្ត្រីខិលខូចមួយចំនួនផ្សំគំនិតជាមួយបុគ្គលអាងលុយ អាងខ្នងនោះ រីឯអាជ្ញាធរគ្រប់ជាន់ថ្នាក់វិញ បានត្រឹមតែសន្យាខ្យល់តែប៉ុណ្ណោះ ដូច្នេះហើយទើបដោះស្រាយមិនចេញ៕
ចែករំលែកព័តមាននេះ