ខេត្តកំពង់ធំ ៖ ប្រជាពលរដ្ឋចំនួនជាង៤០គ្រួសារបាននាំគ្នាមកកាន់សាលាខេត្តកំពង់ធំ សំណូមពរសុំឲ្យអភិបាលខេត្តជួយអន្តរាគមន៍ក្នុងការផ្តល់បណ្ណ័កម្មសិទ្ធដល់ពួកគាត់។ ប្រភពព័ត៌មានពីប្រជាពលរដ្ឋបានឲ្យដឹងកាលពីថ្ងៃទី២៥ ខែសីហា ឆ្នាំ២០១៦ថា ពួកគាត់ចំនួនជាង៤០គ្រួសារស្ថិតនៅក្នុងភូមិបល្ល័ង្កខាងលិច សង្កាត់ដំរីជាន់ខ្លា ក្រុងស្ទឹងសែន បានរៀបរាប់ឲ្យដឹងថា ពួកគាត់បាននាំគ្នាមករស់នៅលើដី ខាងលើនេះតាំងពីឆ្នាំ១៩៨០មកម្លេះ។
លុះក្រោយមកខាងមន្ទីរកសិកម្មខេត្តកំពង់ធំ កាលពីពេលនោះ បានចាត់ទុកថាគឺជាដីរបស់រដ្ឋស្ថិតក្រោមការគ្រប់គ្រងរបស់មន្ទីរកសិកម្មខេត្ត ដោយសារតែដីនេះមានបញ្ហាចាប់តាំងពីពេលនោះមក ខាងមន្ទីររៀបចំដែនដីនគររូបនីយកម្ម មិនចេញបណ្ណ័កម្មសិទ្ធដល់ពួកគាត់នោះទេ។ ហើយនៅពេលដែលពួកគាត់ត្រូវការសាងសង់អ្វីៗ គឺត្រូវបានគេហាមឃាត់មិនអនុញ្ញាតឲ្យធ្វើ ហើយពួកគាត់បានដាក់សំណើមកខេត្តឲ្យជួយដោះស្រាយពីរ បីលើកមកហើយ តែមិនឃើញមានដំណោះស្រាយសោះ ទើបថ្ងៃនេះពួកគាត់នាំគ្នាមកសុំឲ្យអភិបាលខេត្តជួយដល់ពួកគាត់ ពាក់ព័ន្ធករណីខាងលើនេះ។
លោក ធីវ វណ្ណធី ប្រធានមន្ទីរកសិកម្មខេត្តប្រាប់ថា ប្រជាពលរដ្ឋដែលសំណូមពរមានចំនួន៤១គ្រួសារ ដែលមានផ្ទៃដីសរុបជិត៩ហិកតា ជាដីរប់រដ្ឋ រូបលោកពុំមានសិទ្ធិសម្រេចនោះទេ ហើយលោកបានធ្វើរបាយការណ៍ដាក់ជូនទៅក្រសួងទើបមានសិទ្ធិសម្រេច។ បន្ទាប់ពីមានប្រជាពលរដ្ឋនាំគ្នាទៅកាន់សាលាខេត្ត ឯកឧត្តម គង់ វិមាន អភិបាលរងខេត្ត តំណាងឲ្យ ឯកឧត្តម អ៊ុត សំអន អភិបាលខេត្តបានអញ្ជើញប្រជាពលរដ្ឋឲ្យចូលទៅក្នុងសាលប្រជុំខេត្តដើម្បីរកដំណោះស្រាយ ដោយឯកឧត្តមមានប្រសាសន៍ថា ចំពោះបញ្ហានេះ អាជ្ញាធរខេត្តនៅឈរជំហរជាមួយបងប្អូនប្រជាពលរដ្ឋជានិច្ច។
ក៏ប៉ុន្តែសូមពន្យាពេលបន្តិចទៀត រង់ចាំខេត្តចុះស្រាវជ្រាវរកឯកសារខ្លះ ហើយប្រជុំជាមួយនឹងក្រុមការងារថ្នាក់ជាតិចុះមូលដ្ឋានខេត្តកំពង់ធំ រួចដាក់សំណើទៅក្រសួងកសិកម្មសម្រេច ពីព្រោះដីនេះស្ថិត នៅក្រោមការគ្រប់គ្រង់របស់ក្រសួងកសិកម្ម ហេតុដូច្នេះហើយក្រសួងទើបមានសិទ្ធ តែទោះជាយ៉ាងណាក៏ដោយអាជ្ញាធរនឹងខិតខំដើម្បីប្រជាពលរដ្ឋ។ ធ្វើឲ្យប្រជាពលរដ្ឋមានជំនឿទុកចិត្តចំពោះអាជ្ញាធរ៕ 29042
ចែករំលែកព័តមាននេះ