ការរញ្ជួយដីមួយមានកម្លាំងដល់ទៅ៦,៨រីស្ទ័រ កើតកាលពីថ្ងៃទី២៤ សីហា វេលាម៉ោង២១ម៉ោងក្នុងស្រុកនៅភាគខាងកើតភូមា បណ្តាលឱ្យមនុស្សស្លាប់យ៉ាងតិច៦០នាក់ ។
ការរញ្ជួយដីនេះធ្វើឱ្យកក្រើកដល់ប្រទេសចិន វៀតណាម ឥណ្ឌា និងបង់ក្លាដែស និងរហូតដល់ក្រុងបាងកក ស្ថិតនៅចម្ងាយដល់ទៅជាង៨០០គីឡូម៉ែត្រពីចំណុចកណ្តាលរបស់វា ។ អគារជាច្រើនត្រូវរលំបាក់ជិតចំណុចកណ្តាល ហើយអាជ្ញាធរភូមាគិតថា តុល្យការជនរងគ្រោះពិតជាមានការកើនឡើងខ្ពស់ ។ វត្តបុរាណយ៉ាងតិច១៩០រងការខូចខាត ។
ការរញ្ជួយដីនេះ កើតមានជិតព្រំដែនថៃ និងក្នុងជម្រៅប្រមាណ១០គីឡូម៉ែត្រ ហើយចំណុចកណ្តាលរបស់វាស្ថិតនៅជិតព្រំដែនថៃ និងឡាវ ចម្ងាយ៩០គីឡូម៉ែត្រភាគខាងជើងឈៀងរ៉ៃ និង២៣៥គីឡូម៉ែត្រពីឈៀងម៉ៃ ។ មន្ត្រីភូមាម្នាក់និយាយថា តុល្យការអ្នកស្លាប់ឡើងដល់៦០នាក់ ក្នុងតំបន់ស្ថិតនៅក្បែរចំណុចកណ្តាល ក្នុងនោះមានទីក្រុង TARLAY MINE LIN និង TACHILEK និងថាអគារដល់២៤០ត្រូវរលំបាក់ ។ ព្រះវិហារបុរាណដល់ទៅ៥ និងអគារ៣៥ត្រូវបាក់នៅទីក្រុង TARLAY តែមួយគត់ ហើយមនុស្សយ៉ាងតិច៩០នាក់ របួសក្នុងទីក្រុងនេះ ។ អាជ្ញាធរសាកល្បងចូលឱ្យទៅដល់បណ្តាតំបន់ដាច់ស្រយាល ហើយអះអាងថា ផ្លូវថ្នល់សំខាន់ៗត្រូវបិទក្រោយរងការខូចខាតធ្ងន់ធ្ងរដោយសារការរញ្ជួយដីនេះ ។ មជ្ឈមណ្ឌលឧតុនិយមថៃរាយការណ៍នាព្រឹកថ្ងៃទី២៥ សីហា ពីការញ័ររញ្ជួយខ្លាំង៦លើកទៀត ។ អាជ្ញាធរមូលដ្ឋានតាមរយៈប្រដាប់បំពងសំឡេងណែនាំដល់ប្រជាជនកុំនៅក្នុងផ្ទះ គឺនៅខាងក្រៅសិន ព្រោះតែមានការញ័ររញ្ជួយបន្តបន្ទាប់ ។
នៅខាងផ្នែកព្រំដែនថៃក្នុងខេត្តឈៀងរ៉ៃទល់មុខក្រុង TACHILEK នារីម្នាក់អាយុ៥២ឆ្នាំ ត្រូវស្លាប់ ដោយសារការបាក់ជញ្ជាំងផ្ទះសង្កាត់នៅស្រុក MAE SAI ។ អភិបាលខេត្តឈៀងរ៉ៃ លោក SOMCHAI HATAYATANTI ថ្លែងថា ការញ័ររញ្ជួយខ្លាំងបន្តកម្លាំង៥,៤រីស្ទ័រពិតជាខ្លាំង និងថាលោកបានឱ្យជម្លៀសមនុស្សម្នាចេញពីបណ្តាអគារខ្ពស់ៗ ហើយបញ្ជាឱ្យបញ្ជូនបណ្តាអ្នកជំងឺនៃមន្ទីរពេទ្យ MAE SAI ទៅកាន់ឈៀងរ៉ៃ ។
នៅចិនពិសេសនៅខេត្តយុនណាន់ ពួកអ្នកភូមិរស់នៅក្នុងរង្វង់៤០គីឡូម៉ែត្រ ពីព្រំដែនភូមារាយការណ៍ថា បណ្តាអគារញ័ររង្គើរយៈពេល១នាទី ។ ទីភ្នាក់ងារព័ត៌មានចិនស៊ីនហួរាយការណ៍ថា និស្សិត និងគ្រូបង្រៀនជាង៣៥០នាក់ត្រូវជម្លៀសចេញពីសាលាមួយនៃក្រុង MENGHAI ខេត្តយុនណាន់ ក្រោយអគារសាលាមានការប្រេះ ។
នៅវៀតណាម អនុប្រធាននាយកដ្ឋានត្រួតពិនិត្យការរញ្ជួយដី លោក DINH QUOC VAN គូសបញ្ជាក់ថា ការរញ្ជួយមានកម្លាំង៥រីស្ទ័រ កើតមាននៅក្រុងហាណូយ និង៦រីស្ទ័រក្នុងទីក្រុងឌៀនបៀនភូ ភាគពាយ័ព្យប្រទេស ។ ប្រជាជនមួយចំនួនហាក់ដូចជាជ្រួលច្របល់នៅសង្កាត់មួយនៃក្រុងហាណូយ ដោយមនុស្សម្នានាំគ្នារត់ចុះពីអគារ ។
នៅតំបន់ឧស្សាហកម្មមួយនាជាយក្រុងដាក់កា រដ្ឋធានីបង់ក្លាដែស កម្មករប្រមាណ២០នាក់ រងរបួសពេលពួកគេភ័យផ្អើលរត់ចេញពីអគារកំពុងសាងសង់ ។
ពុំមានការប្រកាសអាសន្នស៊ូណាមីឡើយ ព្រោះ ការរញ្ជួយដីនេះស្ថិតនៅដែនដីឆ្ងាយពីសមុទ្រ ៕
ចែករំលែកព័តមាននេះ