ខេត្តតាកែវ ៖ កម្មករ-កម្មការិនីរោងចក្រកាត់សម្លៀកបំពាក់យីហោ «បបូថេកត្រេឌីង ខបភីនីលីមីធីត» ដែលមានទីតាំងស្ថិតនៅភូមិតាឌូ សង្កាត់រកាក្រៅ ក្រុងដូនកែវ ខេត្តតាកែវ កាលពីវេលាវេលាម៉ោង០៨ និង៣០នាទីព្រឹកថ្ងៃទី២៥ សីហា ២០១៦ បានលើកគ្នាធ្វើកូដកម្ម ដោយបិទផ្លូវវាងខេត្តលេខ២១ ដែលជាផ្លូវឯកជនដាក់បារ៉ាស់យកលុយរាប់សិបឆ្នាំមកហើយនោះ មិនព្រមចូលធ្វើការទេដោយពួកគេទាមទារ សុំឱ្យលោកឡាយ វណ្ណៈអភិបាលខេត្តតាកែវ ជួយអន្តរាគមន៍សុំដកបុគ្គលិកស្រីម្នាក់ មានតួនាទី «Super-visor» ចេញពីរោងចក្រ ព្រោះបុគ្គលនេះ កំពុងតែគាបសង្កត់លើកម្មករយ៉ាងខ្លាំង ។
តំណាងកម្មករខាងលើឱ្យដឹងថា កម្មករ-កម្មការិនីនៅក្នុងរោងចក្រមានសរុបជាង១២០០នាក់ ដោយថៅកែចិនបានប្រគល់ភារកិច្ចទៅឱ្យនាងឈ្មោះផាន សុភ័ក្ត្រ តួនាទីជា «Supervisor» គ្រប់គ្រងកម្មករទាំងអស់ ។ ដោយបុគ្គលនោះ មានជំនាញខាងរចនាម៉ូតសម្លៀកបំពាក់ តែបន្ទាប់ពីមានសិទ្ធិពេញលេញ ក៏មកគ្រប់គ្រងលើកម្មករនៅក្នុងរោងចក្រ រួចបុគ្គលរូបនេះ ចាប់ផ្ដើមគាបសង្កត់ និងរំលោភច្បាប់ការងារពួកគាត់ ។ រាល់ថ្ងៃនេះ គេចង់ដកអ្នកណាចេញពីការងារក៏បានដែរ ព្រោះថៅកែរោងចក្រនេះ ប្រគល់សិទ្ធិដ៏ធំឱ្យនាង ។
តំណាងកម្មករបានបន្តទៀតថា ព្រោះតែទង្វើមិនអាចទទួលយកបាននេះ ទើបធ្វើឱ្យកម្មករទាំងអស់នាំគ្នាធ្វើកូដកម្មរយៈពេលជាង១អាទិត្យទៅហើយ សុំដកបុគ្គលនាងនោះចេញពីរោងចក្រ ។ បន្ទាប់ពីគ្មានស្ថាប័នណាជួយដោះស្រាយអោយនោះ ទើបនៅព្រឹកថ្ងៃទី២៤ សីហា កម្មករ-កម្មការិនី បានលើកគ្នាមកសុំឱ្យអភិបាលខេត្ត ជួយអន្តរាគមន៍ តែត្រូវសមត្ថកិច្ចប្រាប់ថា លោកអភិបាលមិននៅទេ ចេញទៅក្រៅប្រទេសបាត់ទៅហើយ រួចក៏នាំគ្នាបំបែកជួរអស់ ។ លុះនៅព្រឹកថ្ងៃទី២៥ សីហា បានលើកគ្នាតវ៉ាដោយបិទផ្លូវវាងខេត្តរយៈពេលជាង២ម៉ោង ដែលមានរថយន្តតូច-ធំ បានកកស្ទះ ។
ចែករំលែកព័តមាននេះ