ខេត្តកំពង់ឆ្នាំង ៖ បុរសម្នាក់ស្រែកចុកខ្លាំងណាស់ៗ គឺស្រែករហូតសន្លប់តែម្តងបណ្ដាលឲ្យក្រុមគ្រួសារភ័យគ្រប់គ្នា និងបញ្ជូនទៅសង្គ្រោះទាំងយប់ ។ ហេតុការណ៍នេះកើតឡើងកាលពីយប់រំលងអាធ្រាត្រឈានចូលថ្ងៃទី២៥ ខែសីហា ឆ្នាំ២០១៦ នៅផ្ទះជនរងគ្រោះក្នុងភូមិចាន់ត្រក ឃុំក្រាំងស្គារ ស្រុកទឹកផុស ខេត្តកំពង់ឆ្នាំង ។
ប្រភពព័ត៌មានបានឲ្យដឹងថា ជនរងគ្រោះឈ្មោះ ឆាយ អាយុ៥៨ឆ្នាំ រស់នៅក្នុងភូមិឃុំខាងលើ ។
ប្រភពពីក្រុមគ្រួសារជនរងគ្រោះបានឲ្យដឹងទៀតថា កាលពីពាក់កណ្ដាលអាធ្រាត្រខណៈកំពុងដេកលក់គ្រប់ៗគ្នា ស្រាប់តែជនរងគ្រោះស្រែកខ្លាំងៗថា ចុកខ្លាំងណាស់ ហើយរមួលខ្លួនពេញមុង ពេលនេះក៏នាំគ្នាចូលទៅមើលស្រាប់តែឃើញសត្វថ្លែនមួយនៅក្នុងមុងដែរ ប្រហែលជាត្រូវសត្វថ្លែននោះខាំហើយមើលទៅ ។
ប្រភពបន្តទៀតថា មួយសន្ទុះក្រោយមួយជនរងគ្រោះចុកកាន់តែខ្លាំងទៅៗរហូតដល់សន្លប់បាត់មាត់ឈឹងតែម្តង ។ ឃើញសភាពមិនស្រួលខ្លាំង ក្រុមគ្រួសារក៏នាំគ្នាជនជនរងគ្រោះទៅកាន់មន្ទីរពេទ្យបង្អែកខេត្តកំពង់ឆ្នាំងទាំងយប់ដើម្បីសង្គ្រោះជីវិត ។
ប្រភពពីគ្រូពេទ្យបានឲ្យដឹងថា ពេលនេះជនរងគ្រោះកំពុងស្ថិតក្នុងការតាមដាននៅឡើយ ។ គ្រូពេទ្យបញ្ជាក់ទៀតថា សត្វថ្លែនគឺជាសត្វដែលមានពិសខ្លាំង ប្រសិនបើត្រូវវាខាំសូមប្រញាប់បញ្ជូនមកកាន់មន្ទីរពេទ្យជាបន្ទាន់ ដើម្បីសង្គ្រោះជីវិត ៕
ចែករំលែកព័តមាននេះ