ចូលសួរពីនេះពីនោះ មួយប៉ប្រិចភ្នែកប្រមូលអស់រលីង
ខេត្តប៉ៃលិន ៖ ស្ត្រីវ័យកណ្ដាលម្នាក់បានចូលទៅផ្ទះរកស៊ីទិញលក់ត្បូងដោយសួរពីនេះពីនោះ ពេលឃើញស្ងាត់ល្អ តែមួយប៉ប្រិចភ្នែកសោះក៏ឆ្លៀតឱកាស…
ខេត្តប៉ៃលិន ៖ ស្ត្រីវ័យកណ្ដាលម្នាក់បានចូលទៅផ្ទះរកស៊ីទិញលក់ត្បូងដោយសួរពីនេះពីនោះ ពេលឃើញស្ងាត់ល្អ តែមួយប៉ប្រិចភ្នែកសោះក៏ឆ្លៀតឱកាសដាក់ថ្នាំសណ្ដំប្រមូលយកទ្រព្យសម្បត្តិមានតម្លៃអស់ជាច្រើន ។ ហេតុការណ៍នេះកើតឡើងកាលពីវេលាម៉ោង៣រសៀល ថ្ងៃទី២៤ ខែសីហា ឆ្នាំ២០១៦ នៅចំណុចផ្ទះជនរងគ្រោះក្នុងភូមិសួនអំពៅលិច សង្កាត់ប៉ៃលិន ក្រុងប៉ៃលិន ។
ប្រភពព័ត៌មានបានឱ្យដឹងថា ជនរងគ្រោះឈ្មោះ មីត សុផារី ភេទស្រី អាយុ៣១ឆ្នាំ ជាមេផ្ទះ មានប្តីឈ្មោះ ហាប់ ការីម អាយុ៥០ឆ្នាំ ជាអ្នករកស៊ីទិញលក់ត្បូង រស់នៅភូមិសង្កាត់កើតហេតុខាងលើ ។
ប្រភពបន្តទៀតថា ទ្រព្យសម្បត្តិដែលត្រូវចោរយកមានប្រាក់ខ្មែរ៥លានរៀល ប្រាក់ដុល្លារ៣៨០ដុល្លារ ត្បូងឆ្នៃតូចៗ១០គ្រាប់ លោហៈធាតុពណ៌លឿង (ខ្សែក៣ជី១ខ្សែ) កូនកាបូបដាក់លុយ និងអត្តសញ្ញាណប័ណ្ណសញ្ជាតិខ្មែរ១សន្លឹក ។
លោក អ៊ុក គា នាយប៉ុស្តិ៍នគរបាលសង្កាត់ប៉ៃលិន បានឱ្យដឹងថា មុនពេលកើតហេតុប្តីស្ត្រីរងគ្រោះជាប់រវល់ចេញទៅក្រៅ ប្រពន្ធនៅផ្ទះតែម្នាក់ឯង ស្របពេលនោះមានស្ត្រីវ័យកណ្តាលម្នាក់បានចូលទៅក្នុងផ្ទះ ហើយក៏និយាយសួរនាំបន្តិចបន្តួច រួចដាក់ថ្នាំសណ្តំរួចប្រមូលយកទ្រព្យសម្បត្តិខាងលើអស់រលីង រួចគេចខ្លួនបាត់តែម្តង ។ លោកបន្តទៀតថា រហូតមកដល់ពេលនេះ ស្ត្រីរងគ្រោះខាងលើមិនទាន់ស្រួលខ្លួនមែនទែននៅឡើយទេ ដោយកំពុងរៀបដាក់ពាក្យបណ្តឹងទៅខាងប៉ុស្តិ៍នគរបាលដើម្បីចាប់ជនសង្ស័យខាងលើមកផ្តន្ទាទោសតាមច្បាប់ ។
រហូតមកដល់ពេលនេះគេមិនទាន់រកឃើញតម្រុយណាមួយដើម្បីឈានទៅចាប់ស្ត្រីជនសង្ស័យនោះនៅឡើយទេ មើលទៅប្រហែលជារួចខ្លួនទៀតហើយ ខណៈប្រជាពលរដ្ឋកំពុងព្រួយបារម្ភយ៉ាងខ្លាំងអំពីបញ្ហាភូមិឃុំមានសុវត្ថិភាព ដោយសំណូមពរឱ្យបងៗសមត្ថកិច្ចមេត្តាធ្វើការដុតដៃដុតជើងបន្តិចទៅ នោះពួកគាត់មានភាពកក់ក្តៅក្នុងការរស់នៅប្រចាំថ្ងៃផងដែរ ។
ទោះបីជាយ៉ាងណាក៏ដោយ បច្ចុប្បន្នសមត្ថកិច្ចជំនាញកំពុងធ្វើការស្រាវជ្រាវ និងកំណត់មុខសញ្ញាជនសង្ស័យ ដើម្បីឈានទៅចាប់យកមកដាក់ទោសតាមផ្លូវច្បាប់ ៕
ចែករំលែកព័តមាននេះ