ខេត្តសៀមរាប ៖ ការប្រឡងសញ្ញាបត្រមធ្យមសិក្សាទុតិយភូមិទូទាំងខេត្តសៀមរាប ឆ្នាំ២០១៥-២០១៦នេះមាន៩មណ្ឌល ដែលមានបន្ទប់២៧៣បន្ទប់ បេក្ខជនចូលប្រឡងសរុប៦៥៦២នាក់ ស្រី៣៥២៧នាក់ បើប្រៀបធៀបទៅនឹងឆ្នាំ២០១៥ មានការកើនឡើង ដែលមានបេក្ខជនមកប្រឡងចំនួន៥៤៩៤នាក់ ស្រី២៩០៦នាក់ ប្រឡងជាប់មានប្រុស១៨៥ នាក់ ស្មើ៥៧,៩៧% ស្រី១៧២២នាក់ ស្មើ ៥៩,០៩% មាន៨មណ្ឌល និងបន្ទប់២២៤ ។
ដោយឡែកឆ្នាំ២០១៦ បេក្ខជនដែលបានចូលរួមមកប្រឡងមានបញ្ហាសុខភាពចំនួន១៥នាក់ ស្រី១១នាក់(ធ្ងន់២នាក់) ដោយសារមានអាការក្អូតចង្អោរ ឈឺពោះ និងវិលមុខ ត្រូវបានក្រុមគ្រូពេទ្យ ដែលប្រចាំការនៅតាមមណ្ឌលវិទ្យាល័យនីមួយៗ បានជួយសង្គ្រោះ រួចឱ្យត្រឡប់មកចូលរួមប្រឡងដូចធម្មតាវិញ និងបោះបង់ការប្រឡងបាក់ឌុប(យុវជនម្នាក់)មកពីមណ្ឌលវិទ្យាល័យ ហ៊ុន សែន សៀមរាប ដោយសារករណីគ្រោះថ្នាក់ចរាចរណ៍បាក់ជើង មិនអាចចូលរួមប្រឡងបាន ក្នុងនោះក៏មានបេក្ខជនមិនបានមកប្រឡងចំនួនសរុប៨៧នាក់ ស្រី៤៤នាក់ ដោយសារមូលហេតុមកពីសិស្សទាំងនោះគិតថា ឆ្នាំនេះត្រូវបានរឹតបណ្តឹងជាងឆ្នាំមុន ទើបពួកគេគិតខ្លីដូច្នេះ។ នេះបើយោងតាមរបាយការណ៍របស់លោក សយ ទិត្យាវង្ស ប្រធានមន្ទីរអប់រំយុវជន និងកីឡាខេត្ត បានប្រាប់កោះសន្តិភាពឱ្យដឹងនៅវេលាម៉ោង៧និង៣០នាទីព្រឹកថ្ងៃទី២៤ ខែសីហា ឆ្នាំ២០១៦ ។
ចំពោះការចូលរួមក្នុងការប្រឡងសិស្សានុសិស្សថ្នាក់ទី១២ ដើម្បីប្រឡងបញ្ចប់នូវថ្នាក់មធ្យមសិក្សាទុតិយភូមិ នាព្រឹកថ្ងៃទី២២-២៣ ខែសីហា ឆ្នាំ២០១៦ នៅខេត្តសៀមរាប ក៏មានការចុះត្រួតពិនិត្យបើកកេសដាក់វិញ្ញាសាប្រឡង នៅគ្រប់មណ្ឌលប្រឡងទាំង៩ក្នុងខេត្តសៀមរាប ក្រោមវត្តមានចូលរួមរបស់លោក លី សំរឹទ្ធ អភិបាលខេត្តស្តីទី និងលោក ពិត ចំណាន រដ្ឋលេខាធិការក្រសួងអប់រំយុវជន និងកីឡា និងជាប្រធានគណៈមេប្រយោគទូទាំងប្រទេសប្រចាំខេត្តសៀមរាប ចុះនៅមណ្ឌលវិទ្យាល័យអង្គរ លោក អឹុង ហឿន ប្រធានស្តីទីក្រុមប្រឹក្សាខេត្ត នៅមណ្ឌលវិទ្យាល័យ១០មករា ១៩៧៩ និងវត្តមានថ្ងៃនោះដែរក៏មានការអញ្ជើញចូលរួមពីសំណាក់លោក លោកជំទាវ ជាសមាជិក្រុមប្រឹក្សាខេត្ត គណៈអភិបាលរង ខេត្តសៀមរាប អស់លោក លោកស្រីជាមន្ត្រីអង្គភាពប្រឆាំងអំពើពុករលួយ និងអ្នកស្ម័គ្រចិត្តសង្កេតការណ៍ នៅតាមមណ្ឌលប្រឡងទាំង៩ផងដែរ ។
គួរបញ្ជាក់ផងដែរថា ចំពោះសិស្សដែលមានបញ្ហាសុខភាព ដោយសារមានអាការក្អូតចង្អោរ ឈឺពោះ វិលមុខ មានចំនួន១៥នាក់ ស្រី១១នាក់ ក្នុងនោះធ្ងន់២នាក់មកពីមណ្ឌលទាំង៩ទូទាំងខេត្តសៀមរាបរួមមាន មណ្ឌលវិទ្យាល័យអង្គរ ចំនួន២នាក់(ស្រីមានអាការស្រាល), មណ្ឌលវិទ្យាល័យ១០មករា១៩៧៩ចំនួន៤នាក់(ស្រី)ក្នុងនោះធ្ងន់ម្នាក់ ដោយសារមានអាការវិលមុខខ្សោយខ្លាំង ទើបគ្រូពេទ្យឱ្យសម្រាកដាក់ស៊ីរ៉ូមក្នុងរថយន្ត ប៉ុន្តែអាចប្រឡងបាន) និងមណ្ឌលវិទ្យាល័យវត្តស្វាយចំនួន៣នាក់ ប្រុសម្នាក់(ស្រាល) និងមណ្ឌលវិទ្យាល័យហ៊ុនសែនសៀមរាប៣នាក់ក្នុងនោះប្រុសម្នាក់ បោះបង់ការប្រឡង ដោយសារគ្រោះថ្នាក់ចរាចរណ៍បាក់ជើងមិនអាចចូលរួមប្រឡងបាន, មណ្ឌលគរុកោសល្យនិងវិក្រិតការខេត្តស្រីមា្នក់(ស្រាល), មណ្ឌលអនុវិទ្យាល័យក្រួស មានរន្ទះបាញ់បាក់បង់អង្គុយ២ និងបេក្ខជនស្រីមា្នក់(ស្រាល) មណ្ឌលបឋមសិក្សាមុខនាគ ស្រីម្នាក់(ស្រាល) និងមណ្ឌលបឋមសិក្សាវត្តបូព៌មិនមានបញ្ហា ។
សូមបញ្ជាក់ថា បេក្ខជនដែលមានបញ្ហាសុខភាពប្រុស-ស្រីទាំង១៥នាក់នោះ ១៤នាក់អាចមកចូលប្រឡងវិញបាន មានតែប្រុសម្នាក់ប៉ុណ្ណោះមិនប្រឡងដោយសារបញ្ហាគ្រោះថ្នាក់ចរាចរណ៍បាក់ជើង ក្រៅពីនោះត្រូវបានក្រុមគ្រូពេទ្យ ដែលប្រចាំការនៅតាមមណ្ឌលប្រឡងនីមួយៗជួយសង្គ្រោះទាន់ពេលវេលា គ្រាន់តែឈឺពោះ វិលមុខបន្តិចបន្តួចតែប៉ុណ្ណោះ ព្រមទាំងបានយកចិត្តទុក ដាក់ខ្ពស់ដល់បេក្ខទាំងអស់ ដែលបានចូលរួមប្រឡង និងអនុវត្តតាមប្រកាសរបស់ក្រសួងអប់រំយុវជន និងកីឡាបានល្អ ទាំងសណ្តាប់ធ្នាប់ វិន័យ ពេលវេលា ព្រមទាំងសន្តិសុខបានល្អប្រសើរថែមទៀតផង ៕
ចែករំលែកព័តមាននេះ