រាជធានីភ្នំពេញ ៖ កិច្ចប្រជុំត្រៀមវាយតម្លៃអញ្ញមញ្ញ (រៀបចំជាមុន) របស់ព្រះរាជាណាចក្រកម្ពុជាលើកទីពីរ ត្រូវបានប្រារព្ធធ្វើឡើងនាព្រឹកថ្ងៃទី២៣ សីហា កន្លងមក នៅសណ្ឋាគារសាន់វ៉េ
រាជធានីភ្នំពេញ ៖ កិច្ចប្រជុំត្រៀមវាយតម្លៃអញ្ញមញ្ញ (រៀបចំជាមុន) របស់ព្រះរាជាណាចក្រកម្ពុជាលើកទីពីរ ត្រូវបានប្រារព្ធធ្វើឡើងនាព្រឹកថ្ងៃទី២៣ សីហា កន្លងមក នៅសណ្ឋាគារសាន់វ៉េ ដែលរៀបចំដោយអង្គភាពស៊ើបការណ៍ហិរញ្ញវត្ថុកម្ពុជា សហការជាមួយក្រុមប្រទេសអាស៊ីប៉ាស៊ីហ្វិក ស្តីពីការសម្អាតប្រាក់ (APG) ដែលមានរយៈពេល៣ថ្ងៃ ចាប់ពីថ្ងៃទី២៣ ដល់ថ្ងៃទី២៥ សីហា ឆ្នាំ២០១៦ ក្នុងគោលបំណងពិភាក្សាអំពីដំណើរការនៃការប្រឆាំងការសម្អាតប្រាក់ និងហិរញ្ញប្បទានភេរវកម្មនៅប្រទេសកម្ពុជា ។ នេះបើយោងតាមសេចក្ដីប្រកាសព័ត៌មានរបស់ធនាគារជាតិនៃកម្ពុជា ។
ថ្លែងនៅក្នុងពិធីបើកកិច្ចប្រជុំនេះ លោក ជា ចាន់តូ ទេសាភិបាលធនាគារជាតិនៃកម្ពុជា និងជាប្រធានគណៈកម្មាធិការសម្របសម្រួលថ្នាក់ជាតិ ប្រឆាំងការសម្អាតប្រាក់និងហិរញ្ញប្បទានភេរវកម្ម បានលើកឡើងអំពីកិច្ចខិតខំប្រឹងប្រែង និងសមិទ្ធផលការងារក្នុងការរៀបចំឲ្យមានយុទ្ធសាស្ត្រជាតិ ការពង្រឹងក្របខ័ណ្ឌគតិយុត្ត និងយន្តការអនុវត្តច្បាប់ ព្រមទាំងការពង្រឹងនិងពង្រីកកិច្ចសហប្រតិបត្តិការទាំងក្នុងស្រុក និងអន្តរជាតិលើការងារប្រឆាំងការសម្អាតប្រាក់និងហិរញ្ញប្បទានភេរវកម្ម រហូតមានការទទួលស្គាល់ពីក្រុមការងារហិរញ្ញវត្ថុ (FATF) និងបានធ្វើឲ្យប្រទេសកម្ពុជាក្លាយជាសមាជិករបស់ក្រុម Egmont ថែមទៀត ។ ជាមួយគ្នានេះ លោកបានបញ្ជាក់ ៖ « រាជរដ្ឋាភិបាលបានប្តេជ្ញាបន្តយកចិត្តទុកដាក់ និងកិច្ចខិតខំប្រឹងប្រែងលើការងារកិច្ចសហការជាមួយសហគមន៍អន្តរជាតិក្នុងការប្រឆាំងការសម្អាតប្រាក់ និងហិរញ្ញប្បទានភេរវកម្ម ជាពិសេសជាមួយ APG » ។
ទន្ទឹមនឹងនោះ លោកទេសាភិបាលធនាគារជាតិនៃកម្ពុជា ក៏បានស្នើឲ្យសមាជិកអង្គប្រជុំបន្តកិច្ចខិតខំប្រឹងប្រែងបន្ថែមទៀត ដើម្បីសម្រេចតាមយុទ្ធសាស្ត្រ និងការប្តេជ្ញាចិត្តរបស់រាជរដ្ឋាភិបាល ក្នុងការទប់ស្កាត់សកម្មភាពសម្អាតប្រាក់ និងហិរញ្ញប្បទានភេរវកម្ម ព្រមទាំងផ្តល់កិច្ចសហការល្អដល់ក្រុមការងាររបស់ APG ដើម្បីឲ្យកិច្ចប្រជុំប្រព្រឹត្តទៅដោយជោគជ័យ ៕
ចែករំលែកព័តមាននេះ