ជំងឺបេះដូងមិនគ្រាន់តែជាបញ្ហាសម្រាប់មនុស្សវ័យចាស់នោះទេ ។ ប៉ុន្តែជាញឹកញាប់កើតមានលើយុវវ័យផងដែរបើទោះបីជាវាត្រូវចំណាយពេលដើម្បីអភិវឌ្ឍពេញមួយជីវិតមនុស្សក៏ដោយ ។ រឿងមួយដែលចាត់ទុកថាជាសំណាងល្អគឺអ្នកអាចចាប់ផ្តើមថែរក្សាសុខភាពបេះដូងនៅក្នុងអាយុណាមួយក៏បាន ។
របបអាហារប្រកបដោយសុខភាពគឺជាផ្នែកមួយដែលចូលរួមលើកស្ទួយដល់សុខភាពបេះដូង។ ទន្ទឹមនឹងនេះ គេក៏មិនអាចផាត់ចោលតួនាទីសកម្មភាពរាងកាយបានដែរ ។ ការហាត់ប្រាណជាប្រចាំនិងទៀងទាត់រយៈពេល៣០នាទីឡើងទៅត្រូវក្រុមអ្នកវិទ្យាសាស្ត្រអះអាងថា ធ្វើឱ្យបេះដូងមានសុខភាពល្អ ។ ប៉ុន្តែយោងតាមរបាយការណ៍មួយរបស់គណៈកម្មាធិការប្រឹក្សាណែនាំពីការធ្វើសកម្មភាពរាងកាយនៃក្រសួងសុខាភិបាលអាមេរិកឱ្យដឹងថា ការហាត់ប្រាណត្រឹមតែ១០នាទីក្នុងមួយថ្ងៃ ក៏អាចធ្វើឱ្យបេះដូងមានសុខភាពល្អបានដែរ ។
វេជ្ជបណ្ឌិត Timothy Church នាយកមន្ទីរពិសោធន៍ Preventive Medicine Research នៅសាកលវិទ្យាល័យ Louisuiana State University បានថ្លែងថា៖ «សម្រាប់បុគ្គលធ្លាប់តែទំនេរច្រើន អត្ថប្រយោជន៍នឹងទទួលបានភ្លាមៗនៅពេលពួកគេចាប់ផ្តើមហាត់ប្រាណ ។ សម្រាប់យើង វាជារឿងគួរឱ្យភ្ញាក់ផ្អើលខណៈការសិក្សារបស់យើងបង្ហាញថា ការហាត់ប្រាណតិចតួចពី១០ទៅ១៥នាទីក្នុងមួយថ្ងៃអាចផ្តល់នូវអត្ថប្រយោជន៍សុខភាព» ។
យោងតាមសមាគមជំងឺបេះដូងអាមេរិកបានឱ្យដឹងថា ជំងឺបេះដូងគឺជាឃាតករលេខ១នៅសហរដ្ឋអាមេរិក ហើយថាស្ត្រីគឺជាអ្នករងគ្រោះខ្លាំងជាងបុរស ។ វេជ្ជបណ្ឌិត Miriam Nelson នាយកមជ្ឈមណ្ឌល John Hancock នៃសាកលវិទ្យាល័យ Tufts University បានថ្លែងថា សកម្មភាពណាក៏ដោយដែលធ្វើឱ្យចង្វាក់បេះដូងដើរញាប់គឺសុទ្ធតែអាចផ្តល់សុខភាពដល់បេះដូង ។ ដូច្នេះការហាត់ប្រាណ ដូចជា រត់ ដើរ ជិះកង់ ហែលទឹក លើកទម្ងន់…គឺសុទ្ធតែផ្តល់ផលល្អដល់សុខភាពបេះដូង ៕
ចែករំលែកព័តមាននេះ