រាជធានីភ្នំពេញ ៖ សន្តិសុខសាលាខណ្ឌទួលគោកបានចុះរៀបចំសណ្តាប់ធ្នាប់នៅផ្សារដើមគ តាមបណ្តោយផ្លូវ៣៣៦ បានទទួលនូវការចោទថា បានរឹបអូសកញ្ច្រែងឆៃថាវរបស់អាជីវករដែលដាក់លយទៅលើផ្លូវគ្មានសណ្តាប់ធ្នាប់ដាក់ក្នុងរថយន្ត ។ ស្ត្រីជាម្ចាស់បានទាមទារយកកញ្ច្រែងនោះមកវិញ តែក្រុមសន្តិសុខមិនព្រមឱ្យ ទើបបង្កទៅ ជាជម្លោះឈានដល់ការប្រវាយប្រតប់គ្នាកាលពីវេលាម៉ោង១០ព្រឹក ថ្ងៃទី២២ មីនា កន្លងមក ។
តាមការរៀបរាប់ពីស្ត្រីអាជីវករលក់បន្លែនៅចំពោះមុខសមត្ថកិច្ចបានឱ្យដឹងថា គាត់ឈ្មោះសួង លន់ អាយុ៤៣ឆ្នាំ មានស្រុកកំណើតនៅភូមិរកាពក ឃុំទួលអំពិល ស្រុកគងពិសី ខេត្តកំពង់ស្ពឺ បច្ចុប្បន្នស្នាក់នៅផ្ទះលេខ៤០ ផ្លូវលេខ៣២៨ ភូមិ៨ សង្កាត់បឹងសាឡាង ខណ្ឌទួលគោក ។ នៅព្រឹកថ្ងៃកើតហេតុ គាត់កំពុងលក់បន្លែស្រាប់តែក្រុមសន្តិសុខសាលាខណ្ឌទួលគោក មួយក្រុមចុះរៀបចំសណ្តាប់ធ្នាប់ហើយបានចាប់យកកញ្ច្រែងឆៃថាវរបស់គាត់ទៅដាក់លើរថយន្ត គាត់ទៅយកមកវិញ តែសន្តិសុខមិនព្រមឱ្យ ពេលនោះក៏មានការប្រទាញប្រទង់គ្នា ។ គាត់បានចោទថា សន្តិសុខវាយគាត់មួយដំបងចំក្បាលរួចគេចមុខទៅបាត់ ។ បន្ទាប់មកកូនប្រុសគាត់រត់មកជួយតែត្រូវសន្តិសុខវាយខ្ទប់នឹងរថយន្ត ហើយប្តីគាត់ក៏រត់មកជួយ ក៏ត្រូវប៉ូលិសរដ្ឋបាលប៉ុស្តិ៍ផ្សារដើមគបានចុះមកអន្តរាគមន៍ឱ្យទៅធ្វើពាក្យបណ្តឹង ។
តាមការបំភ្លឺពីប្តីស្ត្រីអ្នកលក់បន្លែឈ្មោះតាំង សី អាយុ៥០ឆ្នាំ បានឱ្យដឹងថា ពេលកើតហេតុនោះគាត់ទៅហូបបបរ លុះដើរត្រឡប់មកវិញឃើញសន្តិសុខកំពុងវាយប្រពន្ធ គាត់ក៏ស្ទុះចូលទៅជួយប្រវាយប្រតប់ជាមួយក្រុមសន្តិសុខ រួចទើបប៉ូលិសប៉ុស្តិ៍ផ្សារដើមគចុះទៅឃាត់នាំមកប៉ុស្តិ៍ធ្វើកំណត់ហេតុ ។ នៅកន្លែងកើតហេតុអាជីវករខ្លះបានឱ្យដឹងថា នៅព្រឹកនោះសន្តិសុខបានប្រកាសតាមមីក្រូឱ្យរៀបចំសណ្តាប់ធ្នាប់លក់ តែគ្រួសារអ្នកលក់នេះមិនធ្វើតាម ទើបពេលសន្តិសុខចុះមកក៏ទាញកញ្ច្រែងបន្លែយកទៅដាក់លើរថយន្ត ហើយស្ត្រីអ្នកលក់បានទៅយកមកវិញហើយកូនប្រុសរបស់គាត់យកផ្លែល្ហុងគប់ទៅលើសន្តិសុខ ។ សន្តិសុខក៏ចុះមកសួរនាំ ហើយបានព្រមានថា បើត្រូវរបួសដល់សន្តិសុខនឹងចាប់ដាក់ខ្នោះហើយ ខណៈនោះបុរសជាប្តីខឹងច្រលោតស្ទុះយកកូនកាំបិតបំរុងចាក់ទៅលើសន្តិសុខ តែត្រូវសន្តិសុខរងជាប់ ដោយសារកំហឹងគាត់ក៏ទៅយកឈើជ្រុងមករកវាយទៀត ។ ទោះបីជាបែបណាតាមព័ត៌មានថា សន្តិសុខ២នាក់បានរងរបួស។
ការចុះរៀបចំសណ្តាប់ធ្នាប់របស់សន្តិសុខខណ្ឌទួលគោកនាពេលនេះ រួមមានកម្លាំងសន្តិសុខ៧នាក់ រថយន្តពីរគ្រឿងដឹកនាំដោយលោកហ៊ឹម គន្ធគិរី ប្រធានសន្តិសុខសណ្តាប់ធ្នាប់សាលាខណ្ឌទួលគោក ។ ពេលនេះសន្តិសុខសាលាខណ្ឌទួលគោក ដែលរងគ្រោះក្នុងពេលមានទំនាស់នោះក៏បានដាក់ពាក្យប្តឹងនៅប៉ូលិសប៉ុស្តិ៍ផ្សារដើមគចោទស្ត្រីអ្នកលក់បន្លែវិញដោយឈ្មោះពេញ សារិន អាយុ១៩ឆ្នាំ សន្តិសុខសណ្តាប់ធ្នាប់សាលាខណ្ឌទួលគោក មានទីលំនៅភូមិត្រាំដោក ឃុំពងទឹក ខណ្ឌដង្កោ ។
មានការចោទប្រកាន់ថា កន្លងមកកម្លាំងសន្តិសុខតែងតែចុះរៀបចំសណ្តាប់ធ្នាប់តាមផ្លូវ៣៣៦ ជាហូរហែ តែចំពោះស្ត្រីអ្នកលក់ និងក្រុមគ្រួសាររបស់គាត់ដាក់លក់បន្លែដោយយកកញ្ច្រែងលក់លយចេញមកផ្លូវ ហើយក៏មានការណែនាំគាត់ច្រើនលើកច្រើនសាមកហើយដែរ តែគាត់នៅតែមិនព្រមស្តាប់ ទើបនៅព្រឹកថ្ងៃកើតហេតុក្រុមសន្តិសុខបានទៅចាប់កញ្ច្រែងឆៃថាវគាត់ដាក់លើរថយន្ត ពេលនោះស្ត្រីអ្នកលក់ស្ទុះមកយកកញ្ច្រែងវិញ ហើយបានវាយមកលើសន្តិសុខពីរដៃពេលរថយន្តបើកសន្សឹមៗទៅមុខ ។ ពេលរថយន្តបត់ត្រឡប់មកក្រោយវិញ ស្រាប់តែប្តីរបស់ស្ត្រីនោះរត់យកកូនកាំបិតមកចាក់លើពួកសន្តិសុខតែម្តង ទើបពួកគេតបតដើម្បីការពារខ្លួនវិញ ។ សន្តិសុខឈ្មោះញ៉ក់ ម៉ាច អាយុ២០ឆ្នាំ បានប្តឹងគ្រួសារស្ត្រីលក់បន្លែខាងលើថា បានយកកាំបិតចាក់មកលើខ្លួនតែបានរត់គេចផុត ។ តាមព័ត៌មានចុងក្រោយថា បុរសជាប្តីស្ត្រីលក់បន្លែត្រូវបានសមត្ថកិច្ចឃាត់ខ្លួនពីបទប្រើអំពើហិង្សាធ្វើឱ្យសន្តិសុខ២នាក់រងរបួស៕
ចែករំលែកព័តមាននេះ