ខេត្តសៀមរាប ៖ នៅល្ងាចថ្ងៃទី២៣ ខែសីហា ឆ្នាំ២០១៦ មានផ្ទុះការតវ៉ាជាថ្មីរវាងអាជ្ញាធរជាតិអប្សរា និងប្រជាពលរដ្ឋដែលរស់នៅលើដីរបស់ខ្លួន ដែលមានចំនួន២ប្លង់ គឺប្លង់ទី១ ធ្វើឡើងនៅថ្ងៃទី៣ ខែឧសភា ឆ្នាំ១៩៩៤ និងប្លង់ទី២ នៅថ្ងៃទី១៩ ខែឧសភា ឆ្នាំ១៩៩៤ ស្ថិតនៅភូមិចុងកៅស៊ូ សង្កាត់ស្លក្រាម ក្រុងសៀមរាប ចេញដោយលោក ហ៊ូ ស៊ាប ប្រធានការិយាល័យភូមិបាលទីរួមខេត្តសៀមរាប ក្នុងតំបន់អាជ្ញាធរជាតិអប្សរា ជាអ្នកគ្រប់គ្រងជាយូរឆ្នាំណាស់មកហើយ ដែលត្រូវបានរាជរដ្ឋាភិបាលកម្ពុជាដឹកនាំប្រកបដោយគិតិបណ្ឌិតដ៏ខ្ពង់ខ្ពស់ពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចេញអនុក្រឹត្យលេខ១៥៨ ចុះថ្ងៃទី២៥ ខែកក្កដា ឆ្នាំ២០១៦កន្លងទៅថ្មីៗនេះ ស្តីពីការកាត់ផ្ទៃដីទំហំសរុប១១៥,៤១ហិកតា ចេញពីផ្ទៃដីបុរីសណ្ឋាគារអង្គរសៀមរាប ដើម្បីប្រទានកម្មជាកម្មសិទ្ធិជូនប្រជាពលរដ្ឋដែលបានកាន់កាប់ប្រើប្រាស់ និងដាំដុះជាក់ស្តែងនៅក្រុងសៀមប ។
ប្រជាពលរដ្ឋដែលរស់នៅលើដីនៅក្នុងតំបន់ខាងលើបានសំដែងការត្រេកអរ និងសប្បាយចិត្តយ៉ាងខ្លាំង ក៏ដូចទឹកចិត្តដ៏ថ្លៃថ្លាស្រឡាញ់ស្រណោះអាណិត និងការរួមសុខ រួមទុកជាមួយប្រជាពលរដ្ឋដោយកី្តអាណិតអាសូរផងដែរចំពោះរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខ ។ ដែលបានកាត់ផ្ទៃដីដែលមានទំហំសរុប១១៥,៤១ហិកតា ចេញពីផ្ទៃដីបុរីសណ្ឋាគារអង្គរសៀមរាប ដើម្បីប្រទានកម្មជាកម្មសិទ្ធិជូនប្រជាពលរដ្ឋ ។
ជាក់ស្តែងនៅល្ងាចថ្ងៃទី២៣ ខែសីហា ឆ្នាំ២០១៦នេះ ប្រជាពលរដ្ឋនៅក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប ដែលមានដីនៅម្តុំឃ្យុងយូ(ផ្លូវ៦០ម៉ែត )បានយកដីទៅចាក់ក្នុងដីដែលជាកម្មសិទ្ធិផ្ទាល់ខ្លួនទិញពីប្រជាពលរដ្ឋកាលពីអំឡុងឆ្នាំ១៩៩៤មកម្ល៉េះ ដែលរាជរដ្ឋាភិបាលកម្ពុជាបានសម្រេចកាត់ផ្ទៃដីឱ្យពួកគាត់នោះ ប៉ុន្តែត្រូវបានខាងអាជ្ញាធរជាតិអប្សរាចុះទៅធ្វើការហាមឃាត់មិនឱ្យយកចាក់ដីនិងមិនឱ្យធ្វើអ្វីបានទាំងអស់ ។ បើទោះបីជាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចេញអនុក្រឹត្យស្តីពីការកាត់ផ្ទៃដីទំហំសរុប១១៥,៤១ហិកតា ចេញពីផ្ទៃដីបុរីសណ្ឋាគារអង្គរសៀមរាប ដើម្បីប្រទានកម្មជាកម្មសិទ្ធិជូនប្រជាពលរដ្ឋដែលបានកាន់កាប់ប្រើប្រាស់ និងដាំដុះជាក់ស្តែងនៅក្រុងសៀមរាប កាលពីថ្ងៃទី២៥ ខែកក្កដា ឆ្នាំ២០១៦ កន្លងទៅថ្មីៗនោះក៏ដោយ ក៏ពួកគេមិនយកចិត្តទុកដាក់ដល់ប្រជាពលរដ្ឋ ឬយកអនុក្រឹតនោះទៅទុកចោលទៅវិញ ។
ក្រុមប្រជាពលរដ្ឋនៅតែមានការងឿងឆ្ងល់ថា តើមូលហេតុអ្វីបានជាអាជ្ញាធរជាតិអប្សរាមិនព្រមអនុវត្តតាមអនុក្រឹត្យរបស់រាជរដ្ឋាភិបាលកម្ពុជាដែលបានសម្រេចជួនប្រជាពលរដ្ឋទៅវិញ?
ទាក់ទិនពាក់ព័ន្ធករណីផ្ទុះការតវ៉ា និងការហាមឃាត់មិនឱ្យប្រជាពលរដ្ឋចាក់ដី និងធ្វើអ្វីមិនបានក្នុងដីដែលជាកម្មសិទ្ធិរបស់ប្រជាពលរដ្ឋខាងលើភ្លាមៗនោះ ក្រុមអាជ្ញាធរជាតិអប្សរានៅនិងកន្លែងកើតហេតុបានប្រាប់ក្រុមអ្នកយកព័ត៌មានយើងថា ពួកគាត់ហាមឃាត់នេះ គឺដើម្បីឱ្យប្រជាពលរដ្ឋមេត្តារង់ចាំក្រុមការងារចម្រុះនៅថ្ងៃខាងមុខ និងចុះរួមគ្នាមកធ្វើការវាស់វែងជាក់ស្តែងកំណត់ព្រំដីឱ្យបានច្បាស់លាស់ និងរៀបចំប្រគល់ប្លង់កម្មសិទ្ធិជួនពួកគាត់ឱ្យបានត្រឹមត្រូវសិន ទើបអនុញ្ញាតឱ្យប្រជាពលរដ្ឋមានសិទ្ធិក្នុងការសាងសង់បានទៅតាមដីរៀងៗខ្លួន ជៀសវាងកុំឲ្យមានទំនាស់ដីធ្លីក្នុងការសាងសង់ ឬក៏ដីមួយកន្លែងមានម្ចាស់កាន់ជាន់គ្នា ។
បើទោះបីខាងអាជ្ញាធរជាតិអប្សរាបានពន្យល់ប្រាប់ពួកគាត់យ៉ាងណានោះ ប្រជាពលរដ្ឋនៅតែកើតទុកមិនសុខ នៅតែមានការព្រួយបារម្ភថា តើហេតុអ្វីរាជរដ្ឋាភិបាលកម្ពុជាបានចេញអនុក្រឹត្យស្តីពីការកាត់ផ្ទៃដីទំហំសរុប១១៥,៤១ហិកតា ចេញពីផ្ទៃដីបុរីសណ្ឋាគារអង្គរសៀមរាប ដើម្បីប្រទានកម្មជាកម្មសិទ្ធិជូនប្រជាពលរដ្ឋដែលបានកាន់កាប់ប្រើប្រាស់ និងដាំដុះជាក់ស្តែង នៅក្រុងសៀមរាប កាលពីថ្ងៃទី២៥ ខែកក្កដា ឆ្នាំ២០១៦ កន្លងទៅថ្មីៗនោះ បែរជាមិនឱ្យពួកគាត់ធ្វើអ្វីបានទៀត ។
ពលរដ្ឋបាននិយាយរៀបរាប់បន្ថែមថា ខាងអាជ្ញាធរជាតិអប្សរានៅតែមិនព្រមអនុវត្តតាមទៀត ហើយប្រជាពលរដ្ឋធ្វើនេះគឺនៅលើដីកម្មសិទ្ធិរបស់ពួកគាត់ពិតប្រាដកមែន ហើយពួកគាត់មិនចង់ទុកដីរបស់ពួកគាត់នៅទំនេរឱ្យដុះស្មៅចោលដូចមុននោះទេ គឺពួកគាត់ចង់សាងសង់លំនៅដ្ឋាននៅ ដើម្បីប្រកបរបរចិញ្ចឹមជីវិតប្រចាំថ្ងៃ និងគ្រាន់បានឱ្យកូនមានផ្ទះនៅរៀនសូត្រចេះដឹងនឹងគេ ដើម្បីការកាត់បន្ថយមិនឱ្យពួកគាត់នាំគ្នាចំណាកស្រុកទៅធ្វើការនៅក្រៅប្រទេស ។
ពលរដ្ឋសង្ឃឹមថា ទេវតានឹងជួយពួកគាត់ឱ្យរស់រានមានជីវិតស្រស់ថ្លាក្នុងទឹកដីរបស់ខ្លួន ដោយសុំអំពាវនាវយ៉ាងទទូចទៅដល់ប្រមុខរាជរដ្ឋាភិបាល និងថ្នាក់ដឹកនាំទាំងអស់ មេត្តាជួយរកយុទ្ធត្តិធម៌ឱ្យពួកគាត់រួចផុតពីទុកលំបាកដោយមានដី និងកន្លែងដែលជាកម្មសិទ្ធិខ្លួនឯង ហើយធ្វើអ្វីមិនបានទៀតនោះ ក៏ត្រូវបានខាងអាជ្ញាធរជាតិអប្សរាចុះមករារាំង និងធ្វើការរឹបអូសយកសម្ភារ:របស់ពួកគាត់ ដែលកំពុងតែធ្វើរបង និងចាក់ដីនៅលើដីដែលជាកម្មសិទ្ធិរបស់ពួកគាត់ យកទៅទុកនៅកន្លែងអប្សរាទាំងអស់ ។
ចំណែក លោក កុសល អ្នកនាំពាក្យ បានមានប្រសាសន៍ប្រាប់«កោះសន្តិភាព»នៅថ្ងៃទី២៤ ខែសីហា ឆ្នាំ២០១៦ថា អាជ្ញាធរជាតិអប្សរាជាមួយខាងខេត្តកំពុងបានបង្កើតគណៈកម្មាធិការចម្រុះមួយដើម្បីដោះស្រាយរួមគ្នាម្សិលម៉ិញ ក៏មានខាងអភិបាលរងក្រុងម្នាក់បានចូលរួមជាមួយនឹងគ្នា បានឱ្យអ្នកដែលចាក់ដីនោះមានឈ្មោះ អ្នកស្រី លី អ៊ុំអេង ឱ្យគាត់ផ្អាកសកម្មភាពនឹងសិនទៅ ពេលគេកំពុងដោះស្រាយ គាត់មកធ្វើអីនៅទីនេះ ហើយនៅទីនោះពុំមានប្រជាពលរដ្ឋណាទេ មានតែអ្នកស្រី លី អ៊ុំអេង ម្នាក់តែប៉ុណ្ណោះ ប៉ុន្តែខាងអាជ្ញាធរអប្សរា ពុំមានការហាមឃាត់នោះទេ ។ លោកបានបន្តថា ដីដែលអ្នកស្រីនោះបានដឹកមកចាក់នៅលើដីរបស់គាត់នោះ គេកំពុងដោះស្រាយ និងកំពុងត្រួតពិនិត្យដោះស្រាយ គេក៏បានប្រាប់អ្នកស្រីនោះវិញថា កុំអាលចាក់ដីធ្វើអ្វី រង់ចាំបន្តិចសិនទៅ ព្រោះដីទាំងនេះគេកំពុងដោះស្រាយ មិនមែនគេហាមឃាត់ទេ បើដីដែលគេមិនមានបញ្ហា មានអ្នកណា ទៅហាមឃាត់នោះ គេធ្វើបានស្រេចតែចិត្ត មិនមែនដូចដីរបស់អ្នកស្រី លី អ៊ុំអេងនោះទេ ។
ជុំវិញករណីខាងលើ លោក សូ ប្លាតុង អភិបាលក្រុងសៀមរាប បានប្រាប់«កោះសន្តិភាព»នៅរសៀលថ្ងៃទី២៤ ខែសីហា ឆ្នាំ២០១៦ថា ដីដែលអាជ្ញាធរចុះហាមឃាត់ពលរដ្ឋម្នាក់នៅអង្គរឃ្យុងយូ បម្រុងធ្វើផ្ទះនោះ ជារួមគឺដីនោះនៅក្នុងតំបន់អនុក្រឹតលេខ១៥៨ នោះ គឺគោលការណ៍របស់អាជ្ញាធរក្រុង/ខេត្ត និងអាជ្ញាធរអប្សរា បានឯកភាពគ្នា មិនទាន់ឱ្យបងប្អូនប្រជាពលរដ្ឋធ្វើអ្វីនៅលើដីនោះបានទេ ព្រោះយើងកំពុងធ្វើនិតិវិធីចុះវាស់វែងជូនគាត់ ដីណាដោះហើយ ដីណាមិនទាន់បានដោះហើយ បើបងប្អូនមានឯកសារ សូមយកឯកសារមកដាក់ឱ្យក្រុមការងារពិនិត្យមើលសិន រយៈពេលនឹងមិនទាន់ឱ្យពួកគាត់បោះរបង និងចាក់ដីទេ ព្រោះអីមានជួបករណីដូច ដី១ឡូ មានប្លង់១ មានប្លង់២ ជាន់គ្នា អ៊ីចឹងយើងកុំអាលសិន គឺឱ្យបងប្អូនបើមានដីនៅទីនេះ ឬនៅទីណា សូមយកឯកសារមក ដើម្បីទុកឱ្យក្រុមការងារចម្រុះមាន មេធាវី ភូមិបាល អាជ្ញាធរខេត្ត និងខាងអប្សរា កុំអាលឱ្យបងប្អូនធ្វើអីសិន ដីរបស់គាត់នៅតែរបស់គាត់ មិនមានបញ្ហានោះទេ នេះគឺជាគោលការណ៍ បើមិនដូច្នេះទេ ក្រុមការងារនោះពិតជាពិបាកដោះស្រាយហើយ ។ ដូច្នេះលោកសំណូមពរឱ្យបងប្អូនកុំអាលធ្វើអីសិន ព្រោះអនុក្រឹតលេខ១៥៨ ចុះថ្ងៃទី២៥ ខែកក្កដា ឆ្នាំ២០១៦ កន្លងទៅថ្មីៗរបស់ សម្តេចតេជោ ហ៊ុន សែន នោះ នឹងឆ្វៀលជួនបងប្អូនហើយ ដែលបានកាត់ចេញពីតំបន់បុរីសណ្ឋាគារនេះជាចុងក្រោយហើយ ។
លោកបានបញ្ជាក់បន្ថែមទៀតថា ការធ្វើគឺនេះសូមឱ្យបងប្អូននៅស្ងៀមសិន ព្រោះក្រុមការងារកំពុងរៀបចំទុកជូនបងប្អូនហើយ ពុំមាននរណាមកយកដីបងប្អូននោះទេ បើដីនោះជារបស់បងប្អូនហើយ សូមបងប្អូនកុំភ័យឱ្យសោះ ៕
ចែករំលែកព័តមាននេះ