រាជធានីភ្នំពេញ ៖ អ្នកជំងឺនៅប្រទេសថៃមានកើតជំងឺមហារីកក្រពេញអូវ៉ែកើនឡើងប្រមាណជា៥០០០ទៅ៦០០០នាក់ជារាងរាល់ឆ្នាំ។ ជំងឺនេះត្រូវបានគេចាប់ទុកថាជាជំងឺដែលបង្កគ្រោះថ្នាក់ខ្លាំងបំផុតក្នុង
រាជធានីភ្នំពេញ ៖ អ្នកជំងឺនៅប្រទេសថៃមានកើតជំងឺមហារីកក្រពេញអូវ៉ែកើនឡើងប្រមាណជា៥០០០ទៅ៦០០០នាក់ជារាងរាល់ឆ្នាំ។ ជំងឺនេះត្រូវបានគេចាប់ទុកថាជាជំងឺដែលបង្កគ្រោះថ្នាក់ខ្លាំងបំផុតក្នុងចំណោមជំងឺមហារីកផ្សេងទៀតនៃប្រដាប់ភេទរបស់ស្ត្រី។ នេះបើតាមការឲ្យដឹងរបស់លោកវេជ្ជបណ្ឌិត Kamol Pataradool អ្នកឯកទេសផ្នែកជំងឺមហារីក និងរោគស្ត្រីនៃមន្ទីរពេទ្យវេជ្ជថានីប្រចាំប្រទេសថៃ ប្រាប់អ្នកយកព័ត៌មានកាសែតកោះសន្តិភាពកាលពីព្រឹកថ្ងៃទី២១ ខែសីហា ឆ្នាំ២០១៦កន្លងទៅ ។
លោកវេជ្ជបណ្ឌិតឯកទេសរូបនេះបានថ្លែងថា ជំងឺនេះរកឃើញកើតមាននៅលើស្ត្រីគ្រប់វ័យតែភាគច្រើនកើតលើស្ត្រីដែលមានអាយុចាប់ពី៥០ឆ្នាំ ឬអំឡុងពេលស្ត្រីអស់រដូវ។ ទោះជាយ៉ាងណា បច្ចុប្បន្នស្ត្រីដែលមានអាយុតិចអាចចាប់ផ្តើមមានហានិភ័យច្រើនក្នុងការកើតមានជំងឺមហារីក្រពេញអូវ៉ែខ្ពស់ជាងមុន។ ទាំងនេះប្រហែលជាអាចបណ្តាលមកពីភាពមិនប្រក្រតីនៃហ្សែន ឬដោយសារតែបរិស្ថានជុំវិញផ្លាស់ប្តូរ រួមទាំងរបបអាហារ និងជាតិពុលក្នុងបរិយាកាសផង។ លោកវេជ្ជបណ្ឌិតរូបនេះបានបន្តទៀតថា ជាការពិតមកទល់ពេលនេះនៅមិនទាន់អាចបញ្ជាក់ពីមូលេហតុច្បាស់លាស់អំពីជំងឺនេះនៅឡើយទេ។ តែបើតាមការអះអាងរបស់លោកវេជ្ជបណ្ឌិតបានបញ្ជាក់ថា ដំបៅស្បែកដោយសារតែការបញ្ជេញពងអូវុលម្តងហើយម្តងទៀតនៃក្រពេញអូវ៉ែក្នុងរយៈពេលយូរ ជាមូលហេតុមួយដែលជំរុញឲ្យកើតមានជំងឺមហារីកក្រពេញអូវ៉ែ។ ទោះបីជាយ៉ាងណា ក្រុមស្ត្រីដែលមានហានិភ័យខ្ពស់នៅក្នុងការកើតមានជំងឺនេះមានដូចជា ស្ត្រីដែលមានការមករដូវលឿន និងយឺតជាងការកំណត់, ស្ត្រីដែលមិនមានកូន, ស្ត្រិដែលពិបាកនៅក្នុងការមានកូន, ស្ត្រីដែលមានសាច់ញាតិកើតមានជំងឺមហារីកក្រពេញអូវ៉ែជាដើម។
លោកវេជ្ជបណ្ឌិតឯកទេសរូបនោះបានពន្យល់បន្តថា ជាទូទៅជំងឺមហារីក្រពេញអូវ៉ែ ជាញឹកញាប់មិនមានរោគសញ្ញានៅក្នុងដំណាក់កាលដំបូងនោះទេ សញ្ញាដែលស្តែងឲ្យដឹងនៅពេលដែលជំងឺនេះបានវិវឌ្ឍទៅរកស្ថានភាពធ្ងន់ធ្ងរ ហើយសញ្ញាទាំងនេះមានដូចជា អ្នកជំងឺមានអារម្មណ៍ថា មានដុំអ្វីមួយនៅក្នុងពោះកាន់តែរីកធំឡើង, មានទឹកនៅក្នុងក្រពះ, មានការឈឺចាប់ក្នុងពោះ, ទទួលទានអាហារមិនបានច្រើន (មិនឃ្លាន)ជាដើម ។
ជំងឺមហារីក្រពេញអូវ៉ែត្រូវបានគេចែកចេញជា៤ដំណាក់កាលដូចជា៖
១-ជាដំណាក់កាលអាចព្យាបាលបានដោយការវះកាត់ ប៉ុន្តែភាគច្រើនក្នុងដំណាក់កាលដំបូងជំងឺនេះមិនមានរោគសញ្ញាដែលអាចធ្វើឲ្យអ្នកជំងឺបានដឹងខ្លួនជាមុននោះទេ
២-ដំណាក់កាលនេះកោសិកាមហារីកអូវ៉ែមានការរាលដាលទៅសរីរាង្គអាងត្រគាក ដូចជាស្បូន ដៃស្បូន ឬអ្នកជំងឺមានការឈឺចាប់ក្នុងពោះឬមានអារម្មណ៍ថាមានដុំនៅក្នុងពោះ
៣-ដំណាក់កាលនេះកោសិកាមហារីបានចូលទៅក្នុងសាច់ដុំពោះ ដែលអាចធ្វើឲ្យអ្នកជំងឺមានអារម្មណ៍ថាតឹងពោះឡើងឆាប់រហ័ស ដោយសារតែកើតទាចទឹក រួមបញ្ចូលទៅនឹងការហើមពោះ និងការបរិភោគបានតិចជាងមុនផង
៤-ដំណាក់កាលនេះ កោសិកាមហារីកអូវ៉ែបានបន្តការរីករាលដាលកាន់តែខ្លាំងក្លា ទៅសរីរាង្គផ្សេងទៀតដូចជាថ្លើម សួត… ។
ដោយសារតែជំងឺមហារីកក្រពេញអូវ៉ែក្នុងដំណាក់កាលដំបូង មិនមានរោគសញ្ញាច្បាស់លាស់ ដែលអាចឲ្យអ្នកជំងឺទទួលបានការព្យាបាលបានទាន់ពេលវេលានោះ ជាហេតុធ្វើឱ្យអ្នកជំងឺភាគច្រើនធ្លាក់ទៅក្នុងដំណាក់កាលធ្ងន់ធ្ងរ។ ដូច្នេះការធ្វើតេស្តរកមហារីកអូវ៉ែក្នុងដំណាក់កាលដំបូងជាការសំខាន់ណាស់ និងអាចព្យាបាលឱ្យជាសះស្បើយបានក្នុងកម្រិតខ្ពស់ ៕
ចែករំលែកព័តមាននេះ