ខេត្តបាត់ដំបង ៖ មន្ត្រីការិយាល័យប្រឆាំងគ្រឿងញៀនបានឲ្យដឹងថា យ៉ាងហោចណាស់មនុស្សចំនួន៥នាក់ ត្រូវបានឃាត់ខ្លួន រួមទាំងដកហូតវត្ថុតាងមួយចំនួនផង ក្នុងយុទ្ធនាការបង្ក្រាបក្រុមជួញដូរថ្នាំញៀន ដែលធ្វើឡើងដោយកម្លាំងនគរបាលនៅក្នុងស្រុកចំនួន៣ដាច់ដោយឡែកពីគ្នា។ ប្រធានការិយាល័យប្រឆាំងគ្រឿងញៀន នៃស្នងការដ្ឋានខេត្ត លោក ស៊ាន សុណាល់ បានឲ្យដឹងថា ជនសង្ស័យទាំង៥នាក់នោះ ត្រូវសមត្ថកិច្ចឃាត់ខ្លួនជាបន្តបន្ទាប់ពីបទជូញដូរថ្នាំញៀន ដែលធ្វើឡើង៤ករណីដាច់ដោយឡែកពីគ្នា ក្នុងស្រុកចំនួន៣ នៅរសៀលថ្ងៃទី២២ ខែសីហា ឆ្នាំ២០១៦។
លោកថា ការឃាត់ខ្លួននេះ សមត្ថកិច្ចបានដកហូតនូវវត្ថុតាងដែលជាថ្នាំញៀន និងសម្ភារប្រើប្រាស់មួយចំនួនផង។ យោងតាមរបាយការណ៍បានឲ្យដឹងថា ជនសង្ស័យទាំង៥នាក់ដែលពាក់ព័ន្ធនឹងការជួញដូរថ្នាំញៀន ត្រូវសមត្ថកិច្ចឃាត់ខ្លួនក្នុងករណីផ្សេងគ្នា ដែលធ្វើឡើងក្នុងថ្ងៃតែមួយ នៅរសៀលថ្ងៃទី២២ ខែសីហា ឆ្នាំ២០១៦។ ជនសង្ស័យឈ្មោះ ណាន ជី អាយុ២៨ឆ្នាំ ត្រូវឃាត់ខ្លួន នៅស្រុកបវេល ដកហូតថ្នាំញៀនប្រភេទម្ស៉ៅក្រាមពណ៌សICE (ម៉ាទឹកកក)ចំនួន១ថង់ ទម្ងន់៣,៥៦ក្រាម មេតំហ្វេតាមីនWy(យ៉ាម៉ា)ចំនួន១៩គ្រាប់ ម៉ូតូមួយគ្រឿង និងសម្ភារប្រើប្រាស់មួយចំនួនទៀត។
ជនសង្ស័យឈ្មោះ រស់ ដាវីត អាយុ២៨ឆ្នាំ និងឈ្មោះ ប៉ាត់ ចំណាន អាយុ២០ឆ្នាំ ត្រូវឃាត់ខ្លួននៅស្រុកឯកភ្នំ ដកហូតថ្នាំញៀនប្រភេទម្សៅក្រាមពណ៌ស ICE(ម៉ាទឹកកក)ចំនួន៧ថង់ទម្ងន់៤,៣៦ក្រាម និងសម្ភារប្រើប្រាស់មួយចំនួនផង។ ដោយឡែកនៅថ្ងៃដដែលនេះដែរ កម្លាំងនគរបាលស្រុកភ្នំព្រឹក បានឃាត់ខ្លួនជនសង្ស័យចំនួន២នាក់ ដែលធ្វើសកម្មភាពផ្សេងគ្នា ១.ឈ្មោះ សេង ចាន់ អាយុ៣៥ឆ្នាំ ឃាត់នៅភូមិអូរ ឃុំពេជ្រចិន្តា ដកហូតថ្នាំញៀន Wy(យ៉ាម៉ា)ចំនួន១០គ្រាប់ និង២.ឈ្មោះឈុន មេត្តា ហៅតឿ អាយុ២៣ឆ្នាំ ឃាត់នៅភូមិភ្នំតូច ឃុំពេជ្រចិន្តា ដកហូតថ្នាំញៀនម្សៅពណ៌ស ICE(ម៉ាទឹកកក)ចំនួន៧កូនថង់ ទម្ងន់០,៧៨ក្រាម និងវត្ថុតាងមួយចំនួនទៀត។
ប្រធានការិយាល័យប្រឆាំងគ្រឿងញៀន លោក ស៊ាន សុណាល់ បានបញ្ជាក់ថា ជនសង្ស័យទាំង៥នាក់នេះ សុទ្ធតែជាមុខសញ្ញាប្រព្រឹត្តបទល្មើសគ្រឿងញៀន ដែលមន្ត្រីជំនាញតាមបណ្ដាស្រុកនីមួយៗ តែងតាមដានសកម្មភាពពួកគេជាប្រចាំ រហូតឈានដល់ការឃាត់ខ្លួន ក្នុងករណីប្រព្រឹត្តជាក់ស្ដែងតែម្ដង។ លោកប្រធានការិយាល័យរូបនេះបានបន្ថែមថា ថ្នាំញៀនដែលដកហូតបានសរុបទាំង៤ករណីមាន មេតំហ្វេតាមីនICE ៨,០៧ក្រាម មេតំហ្វេតាមីនWyចំនួន២៩គ្រាប់ និងវត្ថុតាងមួយចំនួនទៀត។ ក្រោយពីកសាងសំណុំរឿងបញ្ជូនមកដល់ស្នងការដ្ឋាន លោកស្នងការខេត្ត បានបញ្ជាឲ្យការិយាល័យជំនាញ រៀបចំបញ្ជូនជនសង្ស័យទាំង៥នាក់នេះ រួមទាំងវត្ថុតាងផង ទៅកាន់សាលាដំបូងខេត្ត ដើម្បីចាត់ការតាមនីតិវិធីច្បាប់ហើយ៕
ចែករំលែកព័តមាននេះ