រាជធានីភ្នំពេញ ៖ ទីតាំងបើកអ៊ីនធើរណេត២៤ម៉ោងយីហោ «ភក្តីណេត ២៨៨» ដែលមានបង្កប់ល្បែងស៊ីសង ស្ថិតនៅផ្លូវលេខ១១ ក្នុងភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ ត្រូវបានអាជ្ញាធរចុះបង្ក្រាបហើយ ដោយដកហូតបានកុំព្យូទ័រចំនួន១១គ្រឿង និងប្រាក់២០ម៉ឺនរៀល។
ប្រតិបត្តិការនេះ ធ្វើឡើងកាលពីវេលាម៉ោង០៩ និង៣០នាទីព្រឹកថ្ងៃទី២៤ សីហា ២០១៦ ដែលមានការដឹកនាំដោយលោកសាំង សុភៈវិចិត្រ អភិបាលរងខណ្ឌសែនសុខ ។ តាមប្រភពថា ទីតាំងបើកល្បែងស៊ីសងនេះ មានម្ចាស់ឈ្មោះសាន ភក្តី ភេទប្រុស អាយុ៣០ ឆ្នាំ ដោយបើកលេងជាយូរមកហើយ អត់មានអ្នកបង្ក្រាបនោះទេ ដោយមានការត្រូវគ្នាជាមួយសមត្ថកិច្ច និងអាជ្ញាធរមួយចំនួននោះដែរ តែដោយសារពេលនេះ មានការផ្លាស់ប្តួរអភិបាលរង ទើបចុះបង្ក្រាប ។
នៅរាជធានីភ្នំពេញ ត្រូវបានគេដឹងទៀតថា ជាសំបុកល្បែងស៊ីជ្រកក្រោមណេត២៤ម៉ោង ហើយកំពុងតែពង្វក់ក្មេង និងស្រទាប់យុវជន ដែលនាំគ្នាទៅលេងអ៊ីនធើរណេត២៤ម៉ោង តាមពិត ពួកគេបាននាំគ្នាទៅលេងល្បែងស៊ីសងតាមប្រព័ន្ធអនឡាញ ដែលជាហេតុបង្កឱ្យមានការក្តៅក្រហាយពីអាណាព្យាបាល ។ ជាពិសេសនៅក្នុងខណ្ឌសែនសុខ មានទីតាំងល្បែងស៊ីសង ដែលបង្កប់ក្នុងណេត២៤ម៉ោង មានច្រើនកន្លែងទៀត សូមមេត្តាអាជ្ញាធរចាត់វិធានការណ៍ ដើម្បីភូមិ-សង្កាត់មានសុវត្តិភាព ។
ចែករំលែកព័តមាននេះ