រាជធានីភ្នំពេញ ៖ ឡុង ជិន មកពីក្លិបខ្លារខិនមានរិទ្ធ និង នួន ភិរក្ស មកពីក្លិបតាព្រហ្មមានជ័យ ត្រូវបានគេផ្គូរផ្គងឱ្យជួបប្រកួតជាមួយកីឡាករថៃនៅលើសង្វៀនទូរទស្សន៍CTN ថ្ងៃសៅរ៍ទី២៥ សីហា សប្ដាហ៍នេះ មិនដឹងថា
រាជធានីភ្នំពេញ ៖ ឡុង ជិន មកពីក្លិបខ្លារខិនមានរិទ្ធ និង នួន ភិរក្ស មកពីក្លិបតាព្រហ្មមានជ័យ ត្រូវបានគេផ្គូរផ្គងឱ្យជួបប្រកួតជាមួយកីឡាករថៃនៅលើសង្វៀនទូរទស្សន៍CTN ថ្ងៃសៅរ៍ទី២៥ សីហា សប្ដាហ៍នេះ មិនដឹងថា ទៅរួចឬអត់នោះទេ។ មិនដឹងទៅរួចឬអត់ដោយសារកីឡាករថៃធ្លាប់មកប្រកួតនៅស្រុកខ្មែរជាច្រើនលើករួចមកហើយ មិនតែប៉ុណ្ណោះពួកគេថែមទាំងធ្លាប់ធ្វើឱ្យអ្នកប្រដាល់ជើងខ្លាំងកម្ពុជាជាច្រើនរូបចាញ់ក្រោមកណ្ដាប់ដៃពួកគេទៀតផង ។
ឡុង ជិន ធ្លាប់ប្រកួត៣០ដង ឈ្នះ២២ដង ចាញ់៥ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន៧ដង ត្រូវជួបប្រកួតជាមួយកីឡាករថៃឈ្មោះ Yokhao Sor Pleunchit ក្នុងប្រភេទទម្ងន់៥៧គីឡូក្រាម ខណៈកីឡាករថៃរូបនេះធ្លាប់ប្រកួតបាន៦៦ដង ឈ្នះ៤៦ដង ចាញ់១៨ដង ស្មើ២ដង និងផ្ដួលគូប្រកួតឱ្យសន្លប់បាន១ដង ។ គេធ្លាប់ដឹងរួចមកហើយថា ឡុង ជិន ជាអ្នកប្រដាល់ជើងចាស់មួយរូបដែលមានល្បិចប្រយុទ្ធនៅលើសង្វៀនយ៉ាងក្រាស់ក្រែល ផ្លែកែងនិងជង្គង់របស់គេពេលវាយចេញម្ដងៗរហ័សខ្លាំងណាស់ ឯចិត្តក៏សឿងទៀត ។ ថ្វីដ្បិតតែលើកនេះគេត្រូវប៉ះជាមួយអ្នកប្រដាល់ឆ្លងដែនមកពីថៃដែលមានបទពិសោធន៍ប្រកួតច្រើនជាងជិតពាក់កណ្ដាល ក៏ឡុង ជិន មិនខ្លាចដែរថែមទាំងហ៊ានអះអាងដោយគ្មានក្រែងចិត្តគូប្រកួតទៀតថា ចង់ដឹងថា អ្នកណាខ្លាំងទាល់តែសាកគ្នាមើលសិន។
នួន ភិរក្ស ធ្លាប់ប្រកួត៦៧ដង ឈ្នះ៥០ដង ចាញ់១៥ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន១៥ដងត្រូវជួបកីឡាករថៃឈ្មោះ Phitdam Loukmakham Van ក្នុងប្រភេទទម្ងន់៧៣គីឡូក្រាម ខណៈកីឡាករថៃរូបនេះធ្លាប់ប្រកួតបាន៧០ដង ឈ្នះ៥០ដង ចាញ់១៧ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន៧ដង ។ គូនេះមានប្រវត្តិប្រកួតប្រហាក់ប្រហែលគ្នាហើយថ្វីដៃប្រកួតនៅលើសង្វៀនក៏មិនអន់ជាងគ្នាប៉ុន្មានដែរ ។ ប៉ុន្តែ នួន ភិរក្ស បើនិយាយពីល្បិចប្រយុទ្ធនៅលើសង្វៀនអាចជឿទុកចិត្តបាន ជាពិសេសផ្លែកែងនិងជង្គង់របស់គេតែម្ដងអាចវាយចេញបានល្អខ្លាំងណាស់គ្រាន់តែគេចាញ់ប្រៀបកម្ពស់កីឡាករថៃបន្តិចប៉ុណ្ណោះ ។ ចាំមើល កីឡាករថៃរូបនេះមានសំណាងដូចមុនទៀតឬអត់ពេលជួបជើងខ្លាំងកម្ពុជាលើកនេះ?
ចំណែកគូប្រកួតមិត្តភាពរវាងកីឡាករកម្ពុជានិងកម្ពុជាវិញមានកីឡាករ ចៅ ស្ដាយ មកពីក្លិបសុភានូមានជ័យ ប្រកួតជាមួយកីឡាករ ធន់ មករា មកពីសមាគមកីឡាប្រដាល់ក្រសួងការពារជាតិ ។ កីឡាករ លួន សុខេង មកពីក្លិបអាស៊ីកីឡា ប្រកួតជាមួយកីឡាករ ចៅ ផលឌឿ មកពីក្លិបសំរោងកោងកីឡាខេត្តបាត់ដំបង និងគូចុងក្រោយកីឡាករ សុខ វាសនា មកពីក្លិបឃ្លាំងមឿងកីឡា ប្រកួតជាមួយកីឡាករ ទេស ឧត្តម មកក្លិបកងពលតូចលេខ៧០ ៕
ចែករំលែកព័តមាននេះ