រាជធានីភ្នំពេញ ៖ បុរសជាអ្នករត់ម៉ូតូឌុបម្នាក់បានដឹកចោរ២នាក់ដល់កន្លែងស្ងាត់ ក៏ត្រូវចោរយកដុំថ្មវាយបែកថ្គាម ប្លន់យកម៉ូតូទៅបាត់ដោយសុវត្ថិភាព ដែលហេតុការណ៍នេះកើតឡើង កាលពីវេលាម៉ោង១១យប់ថ្ងៃទី២៣ សីហា តាមបណ្ដោយផ្លូវបេតុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
ជនរងគ្រោះឈ្មោះយ៉េន សារ៉ាន ភេទប្រុស អាយុ២៣ឆ្នាំ ជាអ្នករត់ម៉ូតូឌុប ស្នាក់នៅភូមិប្ញស្សី ក្នុងសង្កាត់ស្ទឹងមានជ័យ ខណ្ឌមានជ័យ មានស្រុកកំណើតនៅភូមិត្រពាំងត្រាច ស្រុកកំពង់ត្របែក ខេត្តព្រៃវែង ហើយម៉ូតូដែលជនសង្ស័យប្លន់យកទៅម៉ាកហុងដា
ឌ្រីម ស៊េរី២០១១ ពណ៌ខ្មៅ ពាក់ស្លាកលេខព្រៃវែង1C-9264 ។
ប្រភពពីជនរងគ្រោះថា មុនពេលកើតហេតុ ជនសង្ស័យទាំង២នាក់ បានហៅគាត់ឌុបពីម្តុំផ្សារស្ទឹងមានជ័យថ្មី ទៅកន្លែងកើតហេតុខាងលើ ក្នុងតំលៃ៧០០០រៀល ។ បន្ទាប់ពីនិយាយចរចាតម្លៃត្រូវរ៉ូវគ្នាហើយ គាត់បានឌុបមកដល់ចំណុចកើតហេតុ ស្រាប់តែជន សង្ស័យដែលអង្គុយនៅខាងក្រោយគេនោះ បានយកដុំថ្មវាយត្រូវថ្គាមផ្នែកខាងស្តាំ បណ្តាលឲ្យដួលម៉ូតូ ហើយជនសង្ស័យយកម៉ូតូទៅបាត់សុវត្ថិភាព ។
ក្រោយពេលកើតហេតុ ជនរងគ្រោះបានទៅដាក់ពាក់បណ្តឹងនៅប៉ុស្តិ៍នគបាលរដ្ឋបាលចោមចៅ កាលពីម៉ោង៤ទៀបភ្លឺ ដើម្បីជួយអន្តរាគមន៍ ។
ចែករំលែកព័តមាននេះ