ខេត្តក្រចេះ ៖ ប្រជាពលរដ្ឋអ្នកដឹកដំឡូងមី នាំគ្នារអ៊ូរទាំរឿងការដឹកជញ្ជូនដំឡូងមីតាមរថយន្តទៅលក់នៅទីផ្សារ មួយរយៈការចុងក្រោយនេះ គឺមានផលលំបាកច្រើន ហើយការចំណេញក៏តិច តែចំណាយច្រើន ។
អាជីវករជាឈ្មួញកណ្ដាលពីរនាក់ប្ដីប្រពន្ធដែលសុំមិនបញ្ចេញឈ្មោះបានបង្ហើបនិងរអ៊ូរទាំពីផលលំបាកនៅក្នុងការប្រកបរបររកស៊ីទៅដល់មជ្ឈដ្ឋានទូទៅប្រាប់ទៅអ្នកយកព័ត៌មានយើង ។
អាជីវករខាងលើបានឲ្យដឹងថា សព្វថ្ងៃនេះ គាត់បានប្រមូលទិញដំឡូងមីពីប្រជាពលរដ្ឋនៅតាមស្រុក ហើយខ្លះទៀត កសិករដឹកយកមកលក់ដល់ផ្ទះ បានច្រើនពេលគាត់ដាក់តាមរថយន្តយីឌុបយកទៅលក់នៅទីផ្សារប្រទេសវៀតណាម ឬក៏កាត់លក់ឱ្យរោងចក្រកែច្នៃដំឡូងមីរបស់កូរ៉េនៅក្នុងក្រុងក្រចេះ ខេត្តក្រចេះ ។
តែអ្វីដែលជាផលលំបាកសម្រាប់ពួកគាត់នៅក្នុងការប្រកបរបររកស៊ីនោះ គឺសាំងក៏ឡើងថ្លៃ ចំណាយបង់សេវាផ្សេងៗក៏ច្រើន ណាមួយដឹកទៅលក់នៅវៀតណាម គេកាត់ភាគរយច្រើន ចំណែករោងចក្រកែច្នៃដំឡូងមីនៅខេត្តក្រចេះ ក៏កាត់ភាគរយច្រើនដូចគ្នា។
ពួកគាត់លើកឡើងថា ហាង ឆេង ដំឡូងមីនៅឆ្នាំនេះ ទិញពីប្រជាពលរដ្ឋមួយគីឡូតែ350រៀល ទាំងក្បាលគោយន្ត ដល់ពេលយកទៅដល់លក់នៅវៀតណាមបាន390 គេកាត់ដល់20 ទៅ25 ភាគរយ ហើយការកាត់ភាគរយ ដោយសារនៅពេលដែលពួកគាត់ប្រមូលផលយកមកលក់ គឺមានលាយដីឬក៏កំទេចឈើថ្មជាដើម ។ចំណែករោងចក្រនៅខេត្ត ក្រចេះក៏កាត់ជាង25 ភាគរយដែរ ទូទាត់ការចំណាយច្រើន អត់បានចំណេញទេ។
រីឯការដឹកជញ្ជូនត្រូវបង់លុយច្រើនតាមផ្លូវ ទាំងប៉ូលិសចរាចរណ៍ តាមគោលដៅក្រុង.ស្រុក តែអ្វីដែលពិសេសនោះ គឺក្រុមបច្ចេកទេសត្រួតពិនិត្យកាត់ទ្រុងរថយន្តរបស់មន្ទីរសាធារណះការ បង់បួនប្រាំម៉ឺនផ្សេង ហើយតាមស្ថានីយជញ្ជីងថ្លឹងរថយន្ត មួយកន្លែង15ម៉ឺនរៀលផ្សេងទៀត ។
ប្រជាពលរដ្ឋបានស្នើសុំឲ្យមានការសម្របសម្រួល និងបន្ធូរបន្ថយចំពោះកសិករខ្លះផង ខណៈដែលសាំងកំពុងតែសម្រុកឡើងថ្លៃ ហើយបើរាល់ការចំណាយបងទៅលើសមត្ថកិច្ចជំនាញពាក់ព័ន្ធច្រើនពេក រត់មិនរួចទេ ។
ចែករំលែកព័តមាននេះ