ខេត្តក្រចេះ ៖ មន្ត្រីជំនាញរដ្ឋបាលជលផលចុះល្បាតក្នុងតំបន់ជីវៈចម្រុះដកហូតមងក្រឡាធំជាង១ពាន់ម៉ែត្រ ដុតបំផ្លាញចោល និងបានហៅក្រុមអ្នកនេសាទ៦នាក់ ទៅធ្វើការអប់រំណែនាំឱ្យបញ្ឈប់សកម្មភាពនេសាទខុស
ច្បាប់ ។
នាយខណ្ឌរដ្ឋបាលជលផល និងជាប្រធានឆ្មាំអភិរក្សលោក ម៉ុក ពន្លក បានថ្លែងឲ្យដឹងថា ប្រតិបត្តិការនៃការចុះបង្ក្រាបនេះធ្វើឡើងកាលពីយប់ថ្ងៃសៅរ៍កន្លងទៅ ដោយមន្ត្រីផ្នែករដ្ឋបាលជលផលកាំពី សហការជាមួយឆ្មាំទន្លេប៉ុស្តិ៍កែងប្រាសាទ ប៉ុស្តិ៍ពាក់វែង និងប៉ុស្តិ៍កោះផ្តៅ បានចុះល្បាតត្រួតពិនិត្យបទល្មើសជលផលក្នុងតំបន់អភិរក្សជីវចម្រុះជលផលនៅចំណុចអន្លង់កន្ទុយកោះរងាវ ឃុំសំបូរ ស្រុកសំបូរ ខេត្តក្រចេះ ។
នៅក្នុងដំណើរការចុះត្រួតពិនិត្យល្បាតនៅតាមចំណុចខាងលើ មន្ត្រីជំនាញក៏បានដកហូតមងក្រឡាធំចំនួន២២ ត្បូងប្រវែង១៥៤០ម៉ែត្រ និងបានដុតបំផ្លាញចោលវត្ថុតាងទាំងនោះ។
ជាមួយគ្នានោះ មន្ត្រីជំនាញរដ្ឋបាលជលផល ក៏បានធ្វើកិច្ចសន្យាណែនាំអ្នកនេសាទល្មើសច្បាប់ចំនួន០៥ទូក មានគ្នា៦នាក់ឲ្យបញ្ឈប់សកម្មភាពប្រើប្រាស់ឧបករណ៍នេសាទខុសច្បាប់ ក្នុងតំបន់អភិរក្សជីវចម្រុះជលផលដែលច្បាប់បានហាមឃាត់ ។
មងក្រឡាធំគឺជាឧបករណ៍នេសាទខុសច្បាប់ ត្រូវបានហាមឃាត់មិនឱ្យធ្វើការនេសាទនៅក្នុងតំបន់ជីវៈចម្រុះជលផល និងតំបន់អភិរក្សអន្លង់ផ្សោតរស់នៅ ។
ចែករំលែកព័តមាននេះ