សាលាឧទ្ធរណ៍បំបែកសំណុំរឿងហិ.ង្សាលើទីលានប្រជាធិបតេយ្យជា2
រាជធានីភ្នំពេញ ៖ សាលាឧទ្ធរណ៍ នៅព្រឹកថ្ងៃទី២៣ ខែសីហា បានបើកសវនាការលើសំណុំរឿងហិ.ង្សានៅទីលានប្រជាធិបតេយ្យ របស់សកម្មជនគណបក្សសង្គ្រោះជាតិ ដោយសម្រេចបំបែកសំណុំរឿងជាពីរករណី
រាជធានីភ្នំពេញ ៖ សាលាឧទ្ធរណ៍ នៅព្រឹកថ្ងៃទី២៣ ខែសីហា បានបើកសវនាការលើសំណុំរឿងហិង្សានៅទីលានប្រជាធិបតេយ្យ របស់សកម្មជនគណបក្សសង្គ្រោះជាតិ ដោយសម្រេចបំបែកសំណុំរឿងជាពីរករណី ។
លោក ចាន់ ចេន មេធាវីការពារក្តីឲ្យលោក មាជ សុវណ្ណារ៉ា ក្នុងចំណោមមេធាវីផ្សេងទៀតបានឲ្យដឹងក្រោយសវនាការថា ចៅក្រមសាលាឧទ្ធរណ៍បានបើកសវនាការកូនក្តីលោកលើអង្គសេចក្តី ហើយបំបែកសំណុំរឿងជាពីរ និងឯកភាពនីតិវិធីរបស់ក្រុមមេធាវីការពារក្តីនៅពេលក្រោយ ។
លោក ចាន់ ចេន បញ្ជាក់ថា «ចំពោះបញ្ហាទាក់ទងនឹងសាលាដំបូងវិញ ចៅក្រមសាលាឧទ្ធរណ៍មិនទាន់ជំនុំជម្រះទេ គឺគ្រាន់តែសម្រេចបំបែកសំណុំរឿងជាពីរ ហើយនិងធ្វើការជំនុះជម្រះរឿងមោឃភាពនីតិវិធីតុលាការ ដែលក្រុមមេធាវីយើងបានប្តឹងសាលាដំបូង» ។
លោកមេធាវីរូបនេះបន្តថា លោកចៅក្រមសាលាឧទ្ធរណ៍បានបំបែកសំណុំរឿងអង្គសេចក្តីជាពីរចំណែក ដោយសំណុំរឿងសុំមោឃភាព បានឯកភាពទៅធ្វើសវនាការនៅពេលខាងមុខ តែមិនទាន់ដឹងថាពេលណាច្បាស់លាស់នោះទេ ។
លោកមេធាវីបានគូសបញ្ជាក់ថា ពាក់ព័ន្ធនឹងសំណុំរឿងអង្គសេចក្តីនោះ តុលាការបានផ្តន្ទាទោសរួមគ្នាចំនួន១១នាក់ពី៧ឆ្នាំ ទៅ២០ឆ្នាំ ។ ប៉ុន្តែមកដល់សាលាឧទ្ធរណ៍ បែងចែកជាពីរតែម្តង ។ លោកថា ការតតាំងក្នុងសវនាការមួយព្រឹកពេញនោះ ក្រុមមេធាវីចង់ឲ្យតុលាការសម្រេចសំណុំរឿងមោឃភាពមុនសុំណំរឿងអង្គសេចក្តី ព្រោះថា នៅពេលដែលសំណុំរឿងមោឃភាពសម្រេចមុននោះ គឺមានភាពចំណេញចំពោះកូនក្តីលោក ។
លោកសង្កត់ធ្ងន់ថា ថ្ងៃនេះសាលាឧទ្ធរណ៍បានសម្រេចសាលដីកាបំបែកអង្គសេចក្តីជាពីរ ប៉ុន្តែមិនទាន់ដឹងថាតុលាការនឹងបើកអង្គជំនុំជម្រះសំណុំរឿងទាំងពីរនោះមួយណាមុនទេ ។
ទាក់ទិននឹងសាលាឧទ្ធរណ៍សម្រេចបំបែកសំណុំរឿងជាពីរនោះ ត្រូវបានលោកមេធាវី ចាន់ ចេន ឲ្យដឹងថា ក្រុមមេធាវីនឹងពិភាក្សាគ្នាលើបណ្តឹងទាស់ការសម្រេចនេះនៅពេលខាងមុខ ។
លោក អំ សំអាត អ្នកគ្រប់គ្រងបច្ចេកទេសការិយាល័យស៊ើបអង្កេតនៃអង្គការសិទ្ធិមនុស្សលីកាដូ ដែលចូលរួមស្តាប់សវនាការ ថ្លែងថា នេះជាលើកដំបូងហើយ ដែលសាលាឧទ្ធរណ៍បានសម្រេចបំបែកសំណុំរឿងជាពីរ ជាពិសេសនោះ ទាក់ទងនឹងសវនាការមោឃភាពនីតិវិធីរបស់សាលាដំបូងរាជធានីភ្នំពេញ ។
លោកថ្លែងថា «កន្លងមកយើងមិនដែលឃើញសាលាឧទ្ធរណ៍ និងតុលាការកំពូលមាន សវនាការទៅលើការមោឃភាពនីតិវិធីនោះទេ។ នេះយើងគិតថា វាគឺជាប្រវត្តិសាស្ត្រឬយុទ្ធសាស្ត្រ លើសាលដីការបស់សាលាឧទ្ធរណ៍សម្រាប់បន្តទៅតុលាការកំពូលទៀតឬយ៉ាងណា ។ វាជាភាពយុត្តិធម៌មួយសម្រាប់ជនជាប់ចោទទាំងអស់ មុននឹងសម្រេចចូលដល់ អង្គសេចក្តី ។
ប៉ុន្តែយើងនៅតែសោកស្តាយចំពោះពួកគាត់ដែលជាប់ឃុំយូរ ហើយនៅតែបន្តជាប់ទៀត ដែលអាចប៉ះពាល់ដល់សិទ្ធិសេរីភាពរបស់គាត់យ៉ាងធ្ងន់ធ្ងរ» ។
ទោះជាយ៉ាងណាក្តី លោក អំ សំអាត បានគាំទ្រចំពោះនីតិវិធីសាលាឧទ្ធរណ៍ ដែលបានបំបែកសំណុំរឿងជាពីរករណី ហើយមានការសម្រេចទៅលើមោឃភាពនីតិវិធីនេះ ។ ក្នុងនាមអង្គការសិទ្ធិមនុស្ស លោកចង់ឃើញតុលាការពន្លឿននីតិវិធីលើជនជាប់ទោសទាំងនោះ ។
លោកសង្កត់ធ្ងន់ថា « ខ្ញុំយល់ថា ការបំបែកសំណុំរឿងនេះជាដំណើររឿងមួយល្អ ព្រោះថាកាលណាបើដំណើរនីតិវិធីរបស់សាលាដំបូងធ្វើខុសនីវិធី នោះសាលាឧទ្ធរណ៍ច្រានចោល ហើយសាលាឧទ្ធរណ៍នឹងបើកសវនាជាថ្មី ដើម្បីសម្រេច។ នេះជាលទ្ធផលល្អសម្រាប់ជនជាប់ចោទ» ។
លោក មាជ សុវណ្ណារ៉ា នៅពេលមន្ត្រីអនុរក្សពន្ធនាគារនាំមកសាលាឧទ្ធរណ៍ បានស្រែកថា លោកមិនមានសង្ឃឹមថាបានរួចចេញពីពន្ធនាគារទេ ព្រោះថាសម្តេចតេជោនាយករដ្ឋមន្ត្រី ហ៊ុន សែន ប្រកាសមិនឲ្យអ្នកណាដែលប្រមាថរួចខ្លួននោះទេ ។
សូមជម្រាបថា លោក មាជ សុណ្ណារ៉ា និង សកម្មជនគណបក្សសង្គ្រោះជាតិ១០រូបទៀតដែលកំពុងជាប់ឃុំនៅពន្ធនាគារព្រៃស ត្រូវបានមន្ត្រីពន្ធនាគារបញ្ជូនមកសាលាឧទ្ធរណ៍ដើម្បីប្តឹងជំទាស់ប្រឆាំងសាលក្រមសាលាដំបូងរាជធានីភ្នំពេញ ដែលបានកាត់ក្តីឲ្យសកម្មជនគណក្សសង្គ្រោះជាតិទាំងអស់នេះ ជាប់ឃុំក្នុងចន្លោះពី៧ឆ្នាំទៅដល់២០ឆ្នាំ ។ មន្ត្រីនិងសកម្មជនគណបក្សប្រឆាំងនេះ ត្រូវបានតុលាការចោទពីការដឹកនាំ និងចូលរួមចលនាកុបកម្ម ដែលប្រព្រឹត្តទៅនៅស្ពាននាគក្បែរទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤ ដោយអំពើហិង្សាមួយរវាងសន្តិសុខខណ្ឌដូនពេញ ជាមួយនឹងក្រុមបាតុករដឹកនាំដោយមន្ត្រីគណបក្សសង្គ្រោះជាតិ ។ ក្នុងអំពើហិង្សានេះបានបណ្ដាលឲ្យបាតុករ និងសន្តិសុខខណ្ឌរងរបួសទាំងសងខាង ។
ភ្លាមៗ បន្ទាប់ពីអំពើហិង្សានោះ តំណាងរាស្ត្រមួយចំនួនត្រូវបានឃាត់ខ្លួនមួយរយៈ ហើយក្រោយមកក៏ដោះលែងវិញ ដោយសារវប្បធម៌សន្ទនាបានកើតមានឡើងរវាងគណបក្សកាន់អំណាច និងគណបក្សប្រឆាំង ។ ប៉ុន្តែវប្បធម៌សន្ទនាមិនបានប៉ុន្មានផង ក៏បានប្រេះឆាវិញ ហើយការចាប់ខ្លួនមន្ត្រី និងសកម្មជនបក្សប្រឆាំង កើតមានជាបន្តបន្ទាប់ ។
គួរបញ្ជាក់ថា នៅថ្ងៃសវនាការថ្ងៃទី២៣ ខែសីហានោះ គេសង្កេតឃើញភរិយាលោក អ៊ុក ពេជ្រសំណាង បានទ្រហោយំ ដោយសារតែអនុរក្សពន្ធនាគារមិនអនុញ្ញាតឲ្យប្តីគាត់ និងជនជាប់ចោទផ្សេងទៀតចូលបន្ទប់ទឹកបត់ជើង ដោយឲ្យបត់ជើងតូចដាក់ដបទឹកបរិសុទ្ធ ៕
ចែករំលែកព័តមាននេះ