រាជធានីភ្នំពេញ ៖ នៅថ្ងៃទី២២ សីហា វេលាម៉ោង១០ព្រឹក លោក ប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានអនុញ្ញាតឱ្យលោក Ilhan Kemal Tug ឯកអគ្គរដ្ឋទូតតួកគីប្រចាំកម្ពុជា
រាជធានីភ្នំពេញ ៖ នៅថ្ងៃទី២២ សីហា វេលាម៉ោង១០ព្រឹក លោក ប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានអនុញ្ញាតឱ្យលោក Ilhan Kemal Tug ឯកអគ្គរដ្ឋទូតតួកគីប្រចាំកម្ពុជា ចូលជួបសម្តែងការគួរសម និងពិភាក្សាការងារ នៅទីស្តីការក្រសួង ។
នៅក្នុងជំនួបនេះ លោកទេសរដ្ឋមន្ត្រី ប្រាក់ សុខុន បានសម្តែងនូវការចូលរួមមរណទុក្ខរបស់រាជរដ្ឋាភិបាលកម្ពុជាជាមួយប្រជាជន និងរដ្ឋាភិបាលតួកគីចំពោះការបាត់បង់ជីវិត និងរងរបួសពីការបំផ្ទុះគ្រាប់បែកនៅទីក្រុង Gaziantep កាលពីថ្ងៃសៅរ៍ ទី២០ សីហាកន្លងទៅ ។ រាជរដ្ឋាភិបាលកម្ពុជា ថ្កោលទោសចំពោះអំពើភេរវកម្មគ្រប់រូបភាពទោះទីកន្លែងណា ពេលណា និងក្រោមមូលហេតុណាក៏ដោយ ។ លោកទេសរដ្ឋមន្ត្រី ក៏បានសម្តែងនូវការពេញចិត្តចំពោះការរីកចម្រើនក្នុងផ្នែកទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរ ហើយលោកក៏បានវាយតម្លៃខ្ពស់ចំពោះការខិតខំរបស់លោកឯកអគ្គរដ្ឋទូតផ្ទាល់ក្នុងការរៀបចំបើកស្ថានទូតតួកគី ប្រចាំនៅព្រះរាជាណាចក្រកម្ពុជា ហើយនិងការចូលរួមវិភាគទានដ៏សំខាន់របស់លោកឯកអគ្គរដ្ឋទូត ក្នុងការពង្រឹង និងពង្រីកបន្ថែមទៀតនូវទំនាក់ទំនងសហប្រតិបត្តិការរវាងប្រទេសទាំងពីរ ។
ក្នុងឱកាសនោះ លោកទេសរដ្ឋមន្ត្រី ក៏បានគូសបញ្ជាក់ថា កម្ពុជានឹងធ្វើការងារជាមួយតួកគី ដើម្បីលើកឡើងនូវផែនការទៅអនាគតទៀតក្នុងការពង្រឹង និងពង្រីកនូវទំនាក់ទំនងសហប្រតិបត្តិការរវាងប្រទេសទាំងពីរ ។
ជាការឆ្លើយតប លោកឯកអគ្គរដ្ឋទូតតួកគីក៏បានជម្រាបជូនលោកទេសរដ្ឋមន្ត្រី អំពីការវិវត្តនៃសភាពការណ៍នៅតួកគីក្នុងរយៈពលចុងក្រោយនេះ ហើយក៏បានលើកសំណើសុំការជួយអន្តរាគមន៍របស់លោកទេសរដ្ឋមន្ត្រី ចំពោះសំណើរបស់រដ្ឋាភិបាលតួកគី ចង់ឱ្យមានការបិទសាលា Zaman នៅកម្ពុជា ។
លោកទេសរដ្ឋមន្ត្រីបានគូសបញ្ជាក់ថា កម្ពុជាបានតាមដានដោយយកចិត្តទុកដាក់ចំពោះ សភាពការណ៍នៅតួកគី ហើយបានកត់សម្គាល់នូវការឯកភាពក្នុងចំណោមប្រជាជន និងគណបក្សនយោបាយទាំងអស់ក្នុងការប្រឆាំងនឹងការប៉ុនប៉ងដណ្តើមរដ្ឋអំណាចតាមវិធីមិនមែនប្រជាធិបតេយ្យ ។ លោកបានជូនពរឱ្យប្រទេសតួកគី ជម្នះពុះពារឆ្លងកាត់វិបត្តិ ហើយវិលត្រឡប់មករកប្រក្រតីភាពវិញក្នុងពេលវេលាដ៏ឆាប់រហ័ស ។
លោកទេសរដ្ឋមន្ត្រី ក៏បានជម្រាបវិញថា លោកនឹងយកសំណើបិទសាលា Zaman ទៅពិគ្រោះជាមួយស្ថាប័នពាក់ព័ន្ធរបស់កម្ពុជា ដោយគូសបញ្ជាក់ថា សេចក្តីសម្រេចណាមួយនឹងត្រូវ ធ្វើឡើងផ្អែកលើនីតិវិធីច្បាប់ និងរដ្ឋបាល ដែលជាសមត្ថកិច្ចរបស់ក្រសួងអប់រំ យុវជន និងកីឡា ។
នៅថ្ងៃដដែលនោះ សាលាអន្តរជាតិហ្សាម៉ាន់ក៏បានចេញសេចក្តីថ្លែងការណ៍មួយរបស់ខ្លួនផងដែរ ដែលបានឆ្លើយតបទៅនឹងសន្និសីទកាសែតរបស់ស្ថានទូត ។ សេចក្តីថ្លែងការណ៍បានប្រកាសថា ជាបឋមក្នុងនាមក្រុមហ៊ុនហ្សាម៉ាន់ យើងខ្ញុំសូមធ្វើការថ្កោលទោសយ៉ាងខ្លាំងចំពោះក្រុមរដ្ឋប្រហារនៅប្រទេសតួកគី នៅថ្ងៃទី១៥ ខែកក្កដា ឆ្នាំ២០១៦។ យើងខ្ញុំតែងតែជឿជាក់យ៉ាងខ្លាំងលើលទ្ធិប្រជាធិបតេយ្យ ហើយគិតថា ការបង្កើតរដ្ឋាភិបាលនឹងត្រូវបង្កើតឡើងឆ្លងកាត់តាមរយៈការបោះឆ្នោតប្រកបដោយសេរី និងយុត្តិធម៌។ យើងខ្ញុំប្រឆាំងរាល់កិច្ចអន្តរាគមន៍ពីក្រុមយោធាណាមួយ។ អ្នកទាំងអស់គ្នានៅក្នុងប្រទេសតួកគី នឹងទទួលរងជាខ្លាំងចំពោះការប៉ុនប៉ងដ៏សាហាវយង់ឃ្នងនេះ ។
សាលាអន្តរជាតិហ្សាម៉ាន់ គឺជាសាលាអន្តរជាតិឯករាជ្យមួយនៅក្នុងប្រទេសកម្ពុជា ដែលមានសិស្សចុះឈ្មោះចំនួនប្រហែល ២០០០ នាក់ ដើម្បីសិក្សាថ្នាក់មតេ្តយ្យ ថ្នាក់បឋមសិក្សា ថ្នាក់វិទ្យាល័យ និងថ្នាក់សាកលវិទ្យាល័យ ។ សាលាអន្តរជាតិហ្សាម៉ាន់ ត្រូវបានគ្រប់គ្រងដោយក្រុមប្រឹក្សាក្នុងនោះ មានបុគ្គលិករដ្ឋបាល និងលោកគ្រូអ្នកគ្រូតំណាងឱ្យប្រទេសចំនួន ១៥ផ្សេងៗគ្នា ។ ចំពោះចក្ខុវិស័យរបស់យើង គឺខំប្រឹងលើកតម្កើងបុគ្គលម្នាក់ៗឲ្យការលូតលាស់ ការរួមចំណែកក្នុងពិភពលោក ក្លាយជាបុគ្គលរឹងប៉ឹង មានការគោរព មានភាពជាសមាជិកក្រុម ភាពជាពលរដ្ឋនៃជាតិរបស់ខ្លួន និងភាពជាសមាជិកនៃសមាគមពិភពលោក ។
ចំពោះអាជ្ញាប័ណ្ណរបស់សាលាគឺត្រូវបានផ្តល់ដោយក្រសួងអប់រំយុវជន និងកីឡា ដែលមានក្រុមហ៊ុនហ្សាម៉ាន់ជាអ្នកគ្រប់គ្រង និងជាក្រុមហ៊ុនដែលបានចុះឈ្មោះនៅក្នុងបញ្ជីរបស់ក្រសួងពាណិជ្ជកម្មផងដែរ ។ ដូច្នេះសាលានេះ គឺជាសាលារបស់ប្រជាជនកម្ពុជា ដែលមានការចុះអធិការកិច្ច ការបង់ពន្ធជាប្រចាំ និងរៀបចំដោយក្រុមប្រឹក្សាភិបាលរបស់សាលា។ សាលាហ្សាម៉ាន់មានភាពល្បីល្បាញដោយសារគុណភាពអប់រំ សមិទ្ធផលជាច្រើនទាំងថ្នាក់ជាតិ និងអន្តរជាតិ ។
សេចក្តីថ្លែងការណ៍ដដែលបន្តថា សាលារៀន ហ្សាម៉ាន់ ត្រូវបានផ្តល់អាជ្ញាប័ណ្ណ និងត្រួតពិនិត្យជាប្រចាំដោយក្រសួងអប់រំ យុវជន និងកីឡា។ ចំណែកក្រុមហ៊ុន ហ្សាម៉ាន់ Co.,Ltd វិញ ក៏បានចុះបញ្ជីក្នុងក្រសួងពាណិជ្ជកម្មកម្ពុជាដែរ ដូចនេះហើយហ្សាម៉ាន់ជាក្រុមហ៊ុនរបស់ប្រទេសកម្ពុជា។ ដោយការអះអាំងនេះអាចធ្វើឱ្យ សិស្សានុសិស្ស ២០០០នាក់ និងអាណាព្យាបាលមួយចំនួនទទួលរងគ្រោះបាន ។
ពាក់ព័ន្ធនឹងភាពស្អាតស្អំរបស់យើងខ្ញុំផ្ទាល់ យើងសូមអញ្ជើញលោកឯកអគ្គរដ្ឋទូតម្តងទៀត បង្ហាញភស្តុតាង ឬសេចក្តីសម្រេចណាមួយដោយតុលាការ ដែលគាត់បានបង្ហាញទៅកាន់សាធារណជន និងអាជ្ញាធរ។ យើងមានជំនឿចិត្តលើភាពស្អាតស្អំរបស់អង្គភាព ដូចនេះវាជាកាតព្វកិច្ចរបស់គាត់ផ្ទាល់ថាមានភស្តុតាងអ្វី ដើម្បីបញ្ជាក់ការចោទប្រកាន់របស់ខ្លួន ។ នេះគឺជាចក្ខុវិស័យរបស់ពួកយើងក្នុងការប្រឆាំងលើប្រការនេះ ៕
ចែករំលែកព័តមាននេះ