អ្នកភូមិត្រពាំងក្រពើ៥នាក់ ពុលនំបញ្ចុកដឹកមកសង្គ្រោះទាន់ពេល
ខេត្តកំពង់ឆ្នាំង ៖ មនុស្សប្រុសស្រី៥នាក់រួមទាំងក្មេងស្រីជំទង់ម្នាក់ផង បានរងការពុលនំបញ្ចុក បណ្តាលឲ្យចុករាគ ហើយត្រូវបានដឹកមកសង្គ្រោះនៅមណ្ឌលសុខភាពស្រុកទាំងយប់។
ខេត្តកំពង់ឆ្នាំង ៖ មនុស្សប្រុសស្រី៥នាក់រួមទាំងក្មេងស្រីជំទង់ម្នាក់ផង បានរងការពុលនំបញ្ចុក បណ្តាលឲ្យចុករាគ ហើយត្រូវបានដឹកមកសង្គ្រោះនៅមណ្ឌលសុខភាពស្រុកទាំងយប់។ ហេតុការនេះបាន
កើតឡើងនៅវេលាម៉ោង៨ និង៣០នាទី យប់ថ្ងៃទី២២ ខែសីហា ឆ្នាំ២០១៦ នៅភូមិត្រពាំងក្រពើ ឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង។ លោក គុយ ឡេង មេឃុំអភិវឌ្ឍន៍ ស្រុកទឹកផុស បាននិយាយអោយដឹងថា គ្រួសាររងគ្រោះដោយពុលនំបញ្ចុកមានឈ្មោះ អ៊ុក រ៉េត អាយុ៤៨ឆ្នាំ។
លោកបានបញ្ជាក់ថា មុនពេលមានរឿងពុលនំបញ្ចុកនេះ នៅវេលារសៀលថ្ងៃទី២២ ខែសីហា ប្រពន្ធរបស់ឈ្មោះ អ៊ុក រ៉េត ឈ្មោះ វ័រ សឺន អាយុ៤៥ឆ្នាំ បានទៅទិញនំបញ្ចុកពីផ្សារ ហើយបានស្លទឹកនំដោយខ្លួនឯង និងបាននាំកូនៗ និងអ្នកជិតខាងហូប។ ក្រោយហូបនំបញ្ចុកហើយបានមួយស្របក់ក៏នាំគ្នាពុលចុករាគ និងក្អួតទើបដឹងថាពុលភ្លាមៗ ហើយបាននាំគ្នាដឹកជនរងគ្រោះមានគ្នា៥នាក់មកមណ្ឌលសុខភាពស្រុក ទឹកផុស ទាំងយប់ ។
លោកបានបន្តអ្នកពុលនំបញ្ចុកទាំង៥នាក់មាន១.ឈ្មោះ អ៊ុក រ៉េត ជាឪពុក ២.ឈ្មោះ វ័រ សឺន ជាម្តាយ ៣.ឈ្មោះ ម៉ុល សុម៉ាលី ភេទស្រី អាយុ១៦ឆ្នាំ ជាកូន ៤.ឈ្មោះ អ៊ុន ស៊ឹង ភេទប្រុស ជាអ្នកជិតខាង និង៥ឈ្មោះ អុំ សុគន្ធ ភេទស្រី ជាអ្នកជិតខាង។ លោកមេឃុំបានបន្តថា ក្រោយពីដឹកមកដល់មណ្ឌលសុខភាពស្រុក និងព្យាបាល គឺបានធូរស្រាលទាំងអស់គ្នា ព្រោះការពុលគ្រាន់តែស្រាលៗល្មម ហើយនៅព្រឹក ថ្ងៃទី២៣ ខែសីហា ឆ្នាំ២០១៦ ពួកគាត់បានត្រឡប់ទៅលំនៅដ្ឋានវិញអស់ហើយ។
មូលហេតុ ដែលជនរងគ្រោះឈ្មោះ វ័រ សឺន អះអាងថា ពុលនំបញ្ចុក គឺព្រោះទឹកសម្លគាត់ស្លដោយខ្លួនឯង រួមទាំងរបោយក៏រកដោយខ្លួនឯង មានបន្លែបង្កាដាំក្នុងភូមិគាត់តែប៉ុណ្ណោះ។ ព័ត៌មានដាច់ដោយឡែកមួយទៀត បានឲ្យដឹងថា អ្នកពុលនំបញ្ចុក ដូចគ្នានេះដែរមានច្រើនជាងនេះ គ្រាន់តែខ្លះគេទៅគ្លីនីកឯកជនផ្សេងៗគ្នា៕
ចែករំលែកព័តមាននេះ