ខេត្តបន្ទាយមានជ័យ ៖ ២ករណីថ្មីទៀត បានកើតឡើងជាថ្មីនៅយប់ថ្ងៃទី២២ ឈានចូលព្រឹកថ្ងៃទី២៣ សីហា ២០១៦ ស្ថិតលើទឹកដីកាស៊ីណូផ្កាយ៥ ក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខណៈក្រុមស្ទាវដេញកាប់គ្នាដូចរឿងកុន ហើយត្រូវសមត្ថកិច្ចប្រមូលបានតែម៉ូតូ និងដាវសាមូរ៉ៃនៅកន្លែងកើតហេតុប៉ុណ្ណោះ ។
ករណីទី១បានកើតឡើងនៅម៉ោងជាង០៨យប់ថ្ងៃទី២២ សីហា ដោយមិនដឹងមូលហេតុទេរវាងគូជម្លោះនោះ ព្រោះបានរត់គេចខ្លួនអស់ បន្សល់ទុកម៉ូតូម៉ាកសង់មួយគ្រឿង ពណ៌ក្រហម គ្មានស្លាកលេខ និងដាវសាមូរ៉ៃ១ដើម ។
ដោយឡែក ករណីទី២ កើតឡើងវេលាទៀបភ្លឺម៉ោងជិត៤ព្រឹកថ្ងៃទី២៣ សីហា មនុស្សមួយក្រុមផ្សេងទៀត បានដេញវាយគ្នានៅប្លុកកាស៊ីណូដដែលនេះ ប្រជាការពារភូមិបានឃាត់ខ្លួនជនសង្ស័យ៣នាក់ រួមទាំងម៉ូតូម៉ាកសង់ស៊េរីឆ្នាំ2010មួយគ្រឿង ។ ពេលកំពុងជិះចេញពីទឹកដីកាស៊ីណូ ប្រគល់ទៅឱ្យសមត្ថកិច្ច ប៉ុន្តែដោយសារការសួរនាំរកជនរងគ្រោះមិនឃើញ ។
ម្យ៉ាងពួកគេបដិសេធន៍ថា មិនជាប់ពាក់ព័ន្ធ សមត្ថកិច្ចក៏បានអប់រំនៅកន្លែងថា មិនត្រូវដើរលេងហួសពេល បន្ទាប់មកឲ្យពួកគេត្រឡប់ទៅលំនៅឋានវិញ។
យ៉ាងណាក៏ដោយ នៅយប់កើតហេតុនោះ គេឃើញលោកឧត្តមសេនីយ៍ទោ អាត់ ខែម ស្នងការនគរបាលខេត្ត បានដឹកនាំកម្លាំងក្រោមឱវាទ សហការជាមួយសមត្ថកិច្ចជំនាញពាក់ព័ន្ធ រួមទាំងនគរបាលការពារព្រំដែនគោកលេខ៩១១, សន្តិសុខកាស៊ីណូចុះដល់កន្លែងកើតហេតុ ដើម្បីល្បាតការពារ និងទប់ស្កាត់រាល់បទល្មើស ក៏ដូចជាកាការពារសន្តិសុខជូនប្រជាពលរដ្ឋស្ទើរមួយយប់ទល់ភ្លឺផងដែរ ។
ចែករំលែកព័តមាននេះ