ខេត្តស្ទឹងត្រែង ៖ ប្រជាពលរដ្ឋរាប់រយនាក់បានលើកគ្នា តតាំងមុខកងកម្លាំងសមត្ថកិច្ច ខណៈដែលអាជ្ញាធរបានចុះអនុវត្តវិធានការដើម្បីដកហូតដីបំរ៉ុងរបស់រដ្ឋប្រគល់ទៅអោយក្រសួងកសិកម្ម រុក្ខាប្រមាញ់ និងនេសាទធ្វើជាមជ្ឃមណ្ឌលពិសោធន៍ស្រាវជ្រាវ និងអភិវឌ្ឍបច្ចេកទេសដំណាំសាកវប្បកម្ម និងដំណាំឧស្សាហកម្មនាពេលខាងមុខនេះ ។
ផ្ទៃដីបំរ៉ុងរដ្ឋខាងលើ មានទំហំជិត២ពាន់ហិចតា ស្ថិតក្នុងភូមិបានប៊ុង ឃុំភ្លុក ស្រុកសេសាន រាជរដ្ឋាភិបាលបានកំណត់ និងផ្តល់ជូនក្រសួងកសិកម្ម រុក្ខាប្រមាញ់ និងនេសាទ ។ តែប្រជាពលរដ្ឋបានចូលកាប់រានទន្ទ្រានវាទយកធ្វើកម្មសិទ្ធ អ្នកខ្លះចាប់ឆ្កា រួចបង្កកដីចោលអ្នកខ្លះក៏បានដាំដំណាំ ។ ដោយពួកគាត់មិនយល់ព្រមប្រគល់ផ្ទៃដីនោះអោយអាជ្ញាធរតាមការសម្របសម្រួល បែរជាលើកគ្នាមកតតាំងយកឈ្នះចាញ់ជាមួយអាជ្ញាធរទើបស្នើសុំអន្តរាគមន៍ពីកងកម្លាំងសមត្ថកិច្ច ។
ដោយយោងតាមស្ថានការកាន់តែក្តៅក្នុងប្រតិបត្តការនោះ ក្រុមការរងារថ្នាក់ជាតិ និងខេត្តបានសម្រេចបង្កើតក្រុមការងារដែលសហការជាមួយក្រសួងកសិកម្មរុក្ខាប្រមាញ់ និងនេសាទ រួមទាំងកម្លាំងប្រដាប់អាវុធ អាជ្ញាធរពាក់ព័ន្ធចុះទៅអនុវត្តច្បាប់បន្ថែម បើគិតមកត្រឹមព្រឹកថ្ងៃទី១២ ខែមីនា ២០២២ មានរយៈពេល៣ថ្ងៃ ។
លោក ទុំ នីរ៉ូ ប្រធានមន្ទីរកសិកម្មរុក្ខាប្រមាញ់ និងនេសាទ អោយដឹងថា កម្លាំងសមត្ថកិច្ចបានដកថយមួយជំហានសិន ដើម្បីបញ្ជៀសការប្រឈមដាក់គ្នា ដើម្បីរកដំណោះស្រាយល្អប្រសើរ ។ លោកបន្តថា ដីជិត២០០០ហិកតានោះ ជាដីដែលបានចុះបញ្ជីមានប្លង់រឹងស្របច្បាប់ ដែលជាផ្ទៃដី ក្រសួងកសិកម្មសាងសង់ជាមជ្ឃមណ្ឌលពិសោធន៍ ស្រាវជ្រាវ និងអភិវឌ្ឍបច្ចេកទេសដំណាំសាកវប្បកម្ម និងដំណាំឧស្សាហកម្ម ។ ផ្ទៃដីនោះត្រូវប្រជាពលរដ្ឋលួចកាប់ទន្ទ្រាន នៅគ្រាដែលជំងឺកូវីដផ្ទុះឡើងខ្លាំង តែពួកគាត់ទទួលស្គាល់ថា ពេលដែលពួកគាត់កាប់ឆ្កា គឺជាដីព្រៃរបស់រដ្ឋ ។
លោកបន្ថែមថា នៅពេលដែលក្រសួងចាប់ផ្តើមឈូសឆាយអភិវឌ្ឍន៍ ប្រជាពលរដ្ឋគាត់មកតវ៉ាថា ដីអ្នកនេះអ្នកនោះ ។ ហើយពេលនេះយើងបានដកគ្រឿងចក្រចេញពីទីនោះ ដើម្បីរក្សាសុវត្ថិភាព ។ លោកក៏បានបញ្ជាក់ថា ទោះបីយ៉ាងផ្ទៃដីនោះនៅតែជាដីរបស់ក្រសួងកសិកម្មដែលត្រូវតែរៀបចំ តែគ្រាន់ដកថយរកដំណោះស្រាយបន្តិចសិន ។
លោក ជា ថាវរិទ្ធ អភិបាលរងខេត្តទទួលបន្ទុកដីធ្លីឲ្យដឹងថា ដីបំរ៉ុងរបស់ក្រសួងកសិកម្ម រុក្ខាប្រមាញ់ និងនេសាទ ស្ថិតក្នុងភូមិបានប៊ុង ឃុំភ្លុក ស្រុកសេសាន ត្រូវបានក្រុមប្រជាពលរដ្ឋលួចទន្ទ្រានកាន់កាប់នាបច្ចុប្បន្ន ជាដីដែលក្រសួងកសិកម្ម រុក្ខាប្រមាញ់ និងនេសាទ មានប្លង់កាន់កាប់ស្របច្បាប់ត្រឹមត្រូវ ហើយដីបំរ៉ុងនេះ ក្រសួងកសិកម្មមានគម្រោងរៀបចំជាមជ្ឈមណ្ឌលស្រាវជ្រាវពិសោធន៍ពូជដំណាំកសិកម្ម ។
លោកបន្តថា ដីបំរ៉ុងរបស់ក្រសួងកសិកម្ម រុក្ខប្រមាញ់ និងនេសាទមានទំហំ១៩១៤,២៣៦៧ហិកតា កន្លងមកអាជ្ញាធរខេត្ត និងក្រសួងក៏ធ្លាប់បានសហការគ្នាចុះទៅជួបស្វែងរកដំណោះស្រាយ និងហាមឃាត់កុំឲ្យក្រុមអនាធិបតេយ្យចូលទន្ទ្រានកាន់កាប់ដោយខុសច្បាប់នៅក្នុងតំបន់នោះម្តងហើយ បន្តែជនខិលខូចទាំងនេះនៅតែបន្តទន្ទ្រានកាន់កាប់មិនព្រមស្តាប់ ។
លោក សុវណ្ណពិសេដ្ឋ អភិបាលស្រុកសេសាន បានបញ្ជាក់ថារយៈពេលកន្លងមក មន្ត្រីជំនាញថ្នាក់ខេត្ត និងអាជ្ញាធរមូលដ្ឋានភូមិឃុំស្រុក ធ្លាប់បានចុះអប់រំណែនាំអោយបងប្អូនយើងបញ្ឈប់ការកាប់ទន្ទ្រាន និងធ្វើកិច្ចសន្យាប្រគល់ដីនោះមករដ្ឋវិញជាមួយមន្ត្រីជំនាញទៀតផង តែបងប្អូនខ្លះក៏បានចាក់ចេញ ហើយបងប្អូនខ្លះទៀតក៏នៅតែបន្តគ្រប់គ្រងបំពានកិច្ចសន្យា ។
អគ្គនាយករងនៃអគ្គនាយកដ្ឋានកសិកម្ម នៃក្រសួងកសិកម្មរុក្ខា ប្រមាញ់និងនេសាទ លោក សាម៉េង កែវមុនីន បានបញ្ជាក់ថា នៅពេលរៀបចំរួចរាល់ហើយ មជ្ឃមណ្ឌលពិសោធន៍ស្រាវជ្រាវ និងអភិវឌ្ឍបច្ចេកទេសដំណាំសាកវប្បកម្ម និងដំណាំឧស្សាហកម្មនេះមន្ត្រីជំនាញនិងធ្វើការស្រាវជ្រាវបណ្តុះពូជដំណាំផ្នែកឧស្សាហកម្ម ដើម្បីផ្តល់ផលប្រយោជន៍ជូនប្រជាជនដែលរស់នៅក្នុងតំបន់ភូមិភាគឦសានក៏ដូចជា នៅតាមតំបន់ខ្ពង់រាបផងដែរ ។
លោក សាម៉េង កែវមុនីន បានបញ្ជាក់ទៀតថា ដំណាំឧស្សាហកម្មទាំងនេះ មានដូចជា ស្វាយចន្ទី កៅស៊ូ ម្នាស់ ពោត សណ្ដែក ល្ង ដំឡូងមី ម្រេច ស្វាយ (ស្វាយកែវរមៀត) និងធុរេនជាដើម ដែលជាដំណាំសមស្របសម្រាប់ដាំដុះនៅក្នុងតំបន់នេះ ។
រហូតមកទល់ថ្ងៃទី១២ មីនា ២០២២នេះ ប្រជាពលរដ្ឋនៅតែមិនសុខចិត្តចុះចាញ់ ជាមួយអាជ្ញាធរ និងសមត្ថកិច្ច ហើយអាជ្ញាធរ និងសមត្ថកិច្ចក៏បានដកថយ ដើម្បីបញ្ជៀសអំពើហិង្សាកើតឡើងផងដែរ ៕
ចែករំលែកព័តមាននេះ