រាជធានីភ្នំពេញ៖ សំណុំរឿងប្រធាននាយកដ្ឋានព័ត៌មានរបស់គណបក្សសង្គ្រោះជាតិ លោក មាជ សុវណ្ណារ៉ា និងសកម្មជន គណបក្សសង្គ្រោះជាតិចំនួន៧នាក់ផ្សេងទៀត នឹងត្រូវសាលាឧទ្ឋរណ៍លើកយកមកបើកសវនាការនៅវេលាម៉ោង៨ព្រឹកថ្ងៃទី២៣ សីហា ២០១៦។
តំណាងរាស្ត្រគណបក្សសង្គ្រោះជាតិ លោកស្រីមួរ សុខហួរ បានឲ្យដឹងក្នុងវេទិកានយោបាយស្តីពីប្រព័ន្ធយុត្តិធម៌និងសិទ្ធិសេរីភាព នៅស្នាក់ការគណបក្សសង្គ្រោះជាតិថា នៅថ្ងៃស្អែកនេះ លោកមាជ សុវណ្ណារ៉ា និងសកម្មជនគណបក្សសង្គ្រោះជាតិដែលជាប់ពន្ធនាគារដើម្បីទាមទារសិទ្ឋិនៅទីលានប្រជាធិបតេយ្យនឹងមកសាលាឧទ្ធរណ៍ ។
លោកស្រីបញ្ជាក់ថា« តុលាការឧទ្ធរណ៍នឹងបើសវនាការលើសំណុំរឿងលោក មាជ សុវណ្ណារ៉ា និងសកម្មជនគណបក្សសង្គ្រោះជាតិ៧នាក់ទៀត ដែលសាលដំបូងរាជធានីភ្នំពេញដាក់ទោសដាក់ពន្ធនាគារពី៧ឆ្នាំទៅ២០ឆ្នាំ គ្រាន់តែពួកគាត់ទាមទារនិង ធានាឲ្យមានសេរីភាព និងការបញ្ចេញមតិ នៅទីលានប្រជាធិបតេយ្យកាលពីថ្ងៃទី១៥ កក្ដដា ២០១៤ កន្លងមក »។
លោកស្រី មួរ សុខហួរ បន្តថា តុលាការកាត់ទោសឲ្យលោក មាជ សុវណ្ណារ៉ា និងសកម្មជនមួយចំនួនជាប់ទោសនោះគឺជាអំពើអយុត្តិធម៌ ព្រោះថាក្នុងច្បាប់រដ្ឋធម្មនុញ្ញ សិទ្ធិបញ្ចេកញមតិត្រូវអនុញ្ញាតដោយច្បាប់ ។ លោកស្រី ក៏បានអំពាវនាវដល់សកម្មជនអ្នកគាំទ្រគណបក្សសង្គ្រោះជាតិចូលរួមតាមដានការសម្រេចរបស់សាលាឧទ្ធរណ៍នៅព្រឹកស្អែកផងដែរ ។
នៅរសៀលថ្ងៃចន្ទដដែលនេះ មិនទាន់មានប្រតិកម្មតបភ្លាមៗនៅឡើយទេពីមន្ត្រីក្រសួងយុត្តិធ៌ម និង មន្ត្រីតុលាការជុំវិញការលើកឡើងរបស់លោកស្រីតំណាងរាស្ត្រគណបក្សប្រឆាំងខាងលើ ។
គួរបញ្ជាក់ថាលោក មាជ សុវណ្ណារ៉ា ត្រូវបានសាលាដំបូងរាជធានីភ្នំពេញកាត់ក្តីឲ្យជាប់ពន្ធនាគារចំនួន២០ឆ្នាំទាក់ទងការប្រើអំពើហិង្សានៅទីលានប្រជាធិបតេយ្យកាលពីថ្ងៃទី១៥ កក្កដា ដែលបណ្ដាលឲ្យកងសន្តិសុខនិងអ្នកតវ៉ាជិត៤០នាក់រងរបួសក្នុងការប៉ះទង្គិចគ្នាជាមួយក្រុមបាតុករជាអ្នកគាំទ្របក្សសង្គ្រោះជាតិ។ ដោយឡែកសកម្មជនគណបក្សសង្គ្រោះជាតិចំនួន៧នាក់ទៀតតុលាការកាត់ឲ្យជាប់ពន្ធនាគារក្នុងម្នាក់ៗចាប់ពី៥ ឆ្នាំដល់ ៧ឆ្នាំ ពាក់ព័ន្ឋនឹងអំពើហិង្សានៅទីលានប្រជាធិបតេយ្យដូចគ្នានេះ៕
ចែករំលែកព័តមាននេះ