ខេត្ដកំពង់ឆ្នាំង ៖ ទឹកប្រាក់ចំនួន១៥៦ម៉ឺនរៀល និងគ្រឿងឧបភោគបរិភោគមួយចំនួន ដែលជាអំណោយដ៏ថ្លៃថ្លារបស់សប្បុរសជនរស់នៅរាជធានីភ្នំពេញ ត្រូវបាននាំយកទៅប្រគល់ដោយផ្ទាល់ដៃជូនលោកយាយទុរគតអាយុ៨១ឆ្នាំ ដែលកំពុងរស់យ៉ាងលំបាកជាមួយចៅប្រុសអាយុ១០ឆ្នាំ លើដីស្ថានីយរថភ្លើងរមាស ក្នុងភូមិស្រែតាជ័យ ឃុំអភិវឌ្ឍន៍ ស្រុកទឹកផុស ។
ខេត្ដកំពង់ឆ្នាំង ៖ ទឹកប្រាក់ចំនួន១៥៦ម៉ឺនរៀល និងគ្រឿងឧបភោគបរិភោគមួយចំនួន ដែលជាអំណោយដ៏ថ្លៃថ្លារបស់សប្បុរសជនរស់នៅរាជធានីភ្នំពេញ ត្រូវបាននាំយកទៅប្រគល់ដោយផ្ទាល់ដៃជូនលោកយាយទុរគតអាយុ៨១ឆ្នាំ ដែលកំពុងរស់យ៉ាងលំបាកជាមួយចៅប្រុសអាយុ១០ឆ្នាំ លើដីស្ថានីយរថភ្លើងរមាស ក្នុងភូមិស្រែតាជ័យ ឃុំអភិវឌ្ឍន៍ ស្រុកទឹកផុស ។
ការប្រគល់អំណោយនេះ បានធ្វើឡើងនៅព្រឹកថ្ងៃទី២១ ខែសីហា បន្ទាប់ពីមានសេចក្តីអំពាវនាវរបស់លោកយាយតាមរយៈសារព័ត៌មានកោះសន្តិភាពដែលបានចុះផ្សាយកន្លងទៅ ។
លោក ហ៊ួត ជា នាយកក្រុមហ៊ុនផ្គត់ផ្គង់ សម្ភារសំណង់ថ្លែងថា ក្រោយពីបានទទួលព័ត៌មានពីលោកយាយ អ៊ូ យឿន អាយុ៨១ឆ្នាំ តាមរយៈសារព័ត៌មានកោះសន្តិភាព ដែលកំពុងរស់នៅយ៉ាងលំបាកដោយបានចៅប្រុសឈ្មោះ ឈិន វីរៈ ហៅចយ អាយុ១០ឆ្នាំ រៀនថ្នាក់ទី២ ដើររើសអេតចាយបានប្រាក់បន្តិចបន្តួច ទិញបាយសម្លចិញ្ចឹមលោកយាយនៅក្នុងខ្ទម សាងសង់លើដីស្ថានីយរថភ្លើងរួចមក រូបលោកនិងក្រុមគ្រួសារបានមូលមតិគ្នាប្រមូលថវិកា និងទិញគ្រឿងឧបភោគបរិភោគមួយចំនួនមកប្រគល់ជូនលោកយាយ។
អំណោយទាំងនោះបានការឧបត្ថម្ភពី ក្រុមហ៊ុន ហ៊ួត ជា និងបុគ្គលិក ទឹកប្រាក់ចំនួន៨០ម៉ឺនរៀល ម្ចាស់ហាង ហ៊ួត សុខគា ចំនួន២០ម៉ឺនរៀល ម្ចាស់ហាង ហ៊ួត គាម ចំនួន២០ម៉ឺនរៀល ម្ចាស់ហាង ម៉េង សិទ្ធិ ចំនួន៨ម៉ឺនរៀល ម្ចាស់ហាង រិទ្ធ ម៉ី ១២ម៉ឺនរៀល និងលោក សែម បូណាត ៤ម៉ឺនរៀល សរុបទឹកប្រាក់មានចំនួន ១៤៤ម៉ឺនរៀល។ ក្រៅពីនោះនៅមាន អង្ករ១០០គីឡូក្រាម មី១កេស ទឹកផ្លែឈើ១កេស ទឹកបរិសុទ្ធវីតាល់១កេស ទឹកដោះគោឆៅ២យួរ ត្រីខ២យួរ មុង១ កន្ទេល១ ភួយ១ មីកំប៉ុង៣យួរ និងផ្លែក្រូច១ផ្លូនផងដែរ ។
លោក ហ៊ួត ជា ក៏បានថ្លែងអំណរគុណដល់សារព័ត៌មានកោះសន្តិភាពដែលបានផ្តល់ព័ត៌មានពិតស្តីពីទុក្ខលំបាករបស់លោកយាយខាងលើនេះ ។ ក្នុងនាមលោកជាកូនខ្មែរមួយរូបនិងក្រុមគ្រួសារ តែងតែធ្វើបុណ្យចែកទានទៅគ្រប់ទីកន្លែងកន្លងមក ហើយនៅថ្ងៃទី២២ ខែសីហា លោកនិងក្រុមគ្រួសារទៅចូលរួមចែកអំណោយនៅស្រុកកោះដាច់ខេត្តកណ្តាលបន្តទៀត ដែលតាមការប្រមាណ ទឹកប្រាក់ដែលត្រូវចូលរួមចែកអំណោយនោះមានជាង២លានរៀល ។
ជាមួយគ្នានេះ ទឹកប្រាក់ចំនួន១២ម៉ឺនរៀលតាមរយៈកោះសន្ដិភាព ក៏ប្រគល់ជូនលោកយាយដែរ ដោយបានទទួលពីកញ្ញា ពេជ្រ នារី អនុប្រធាននាយកដ្ឋានសវនកម្មផ្ទៃក្នុងក្រសួងឧស្សាហកម្ម និងសិប្បម្ម លោកស្រី ពេជ ដារី និងលោកស្រី ពេជ្រ ម៉ាលីន ។
ក្នុងពេលនោះដែរ លោក គុយ ឡេង មេឃុំអភិវឌ្ឍន៍ បានមានប្រសាសន៍ថ្លែងអំណរគុណលោក ហ៊ួត ជា និងក្រុមគ្រួសារ ដែលបាននាំយកនូវអំណោយដ៏ច្រើនសន្ធឹកសន្ធាប់មកជូនលោកយាយ អ៊ូ យឿន ដែលកំពុងជួបការលំបាកខ្វះខាតក្នុងជីវភាពរស់នៅជាមួយចៅប្រុសយ៉ាងលំបាកនេះ សូមជូនពរដល់សប្បុរសជនទាំងអស់ដែលនាំយកអំណោយមកជូនលោកយាយក្នុងថ្ងៃនេះ ជួបនូវពុទ្ធពរទាំង៤ប្រការគឺ អាយុៈ វណ្ណៈ សុខៈ និងពលៈ កុំបីឃ្លៀងឃ្លាតឡើយ ។
សូមរំឭកថា លោកយាយ អ៊ូ យឿន ត្រូវបានកូនស្រីគាត់ឈ្មោះ ប្រាក់ ដាវី ចេញទៅរកស៊ីហើយក៏បាត់រហូត ដោយបន្សល់ទុកកូនប្រុសម្នាក់ឈ្មោះ ឈិន វីរៈ ហៅចយ ឱ្យគាត់មើលថែ ដោយមិនដែលបានផ្តល់លុយកាក់មកឲ្យគាត់១រៀលឡើយ ។ លោកយាយបានធ្លាក់ខ្លួនពិការកាលពី២ឆ្នាំមុន ដោយសារធ្លាក់ពីលើគ្រែ ៕
ចែករំលែកព័តមាននេះ